Македонија
Здружението „Палиум“ реализираше настан за поддршка на палијативните пациенти
Здружението за поддршка на палијативните пациенти и нивните семејства ПАЛИУМ организираше донаторски настан „Со помагала да помогнеме“ како дел од Проектот на УСАИД „Партнерства за донирање“ кој го спроведува Здружението КОНЕКТ.
Целта на овој настан е да се соберат средства за отворање на првата изнајмувачница во државата на ортопедски помагала за палијативни пациенти. Оваа можност во огромна мера ќе им ја олесни грижата и третманот во домашни услови на семејствата со член кој е палијативен пациент.
Палијативната нега е медицински пристап кој има за цел да го подобри квалитетот на животот на пациентите кои страдаат од неизлечиви и терминални болести. Оваа нега се поврзува најчесто со онколошки дијагнози, но исто така се користи во напредна и терминална фаза на многу други болести. Огромниот број на палијативни пациенти во државата ја наметна потребата од оваа иницијатива.
На донаторскиот настан присуствуваше директорот на Фондот за здравство Г-н Сашо Клековски, претставници од Министерството за Здравство, Министерството за социјална политика, демографија и млади, Невладиниот сектор и вработени во здравството кои придонесоа да се отвори дијалог за важноста од подобрување на условите и можностите за оваа ранлива категорија на пациенти.
Како најургентни мерки за кои се дискутираше на настанот се издвоија: подобри можности за палијативна нега во домот и достапност на ортопедски помагала, советодавна линија за поддршка на палијативните пациенти и нивните семејства, а на Македонија час поскоро и е потребно усвојување на Национална стратегија за Палијативна грижа со оглед на нагорниот тренд на раст на случаите со малигни неоплазми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Виновни се ВМРО-ДПМНЕ и Арсовска, велат од СДСМ за европскиот извештај за јавниот превоз во Скопје
Извештајот на Европската Комисија го потврди тоа што граѓаните на Скопје секојдневно го чувствуваат: јавниот превоз во Скопје е катастрофален, најлош во Европа, велат од СДСМ по извештајот што претходно беше објавен, а според којшто граѓаните на главниот град се меѓу најнезадоволните на европскиот континент од состојбата со автобусите.
Според опозициската СДСМ, локалната власт предводена од ВМРО-ДПМНЕ и градоначалничката Арсовска успеаја да го донесат Скопје на дното во Европа и во делот на транспортот и во секој можен поглед.
„Наместо да вложуваат во подобрување на услугите и модернизација, како што ветуваа, сведоци сме на епско потфрлање и тотален хаос во сообраќајот, што директно ги погодува жителите на Скопје. Советниците на ВМРО-ДПМНЕ намерно не гласаа за набавка на нови автобуси, Владата не презема ништо. ВМРО-ДПМНЕ бездушно ги остави скопјани да се справуваат со хаосот секој ден, само заради тоа што им пропаднаа бизнис зделките со Арсовска. ВМРО-ДПМНЕ создаде хаос во Скопје, тие се најголемите виновници за катастрофата која што му се случува на јавниот превоз и на целиот град“, се вели во соопштението на СДСМ.
Извештајот на ниво на европските градови покажува дека само 47 отсто од жителите на Скопје се задоволни од јавниот превоз во градот. Помало е задоволството само во Никозија, Белград, Подгорица, Тирана и во Рим. Најмногу граѓани изразиле задоволство од јавниот превоз во европските метрополи Виена, Хелсинки, Осло, Прага и Луксембург.
Македонија
Министерство за енергетика: Инвестиции во обновливи извори на енергија и целосна гасификација – клучни чекори кон енергетската транзиција
Министерството за енергетика, минерални суровини и рударство на Македонија ги продолжува своите активности насочени кон зелена енергетска транзиција и намалување на емисиите на јаглерод. Преку значајниинвестиции во обновливи извори на енергија и целосна гасификација надржавата, се создаваат услови за енергетска ефикасност и технолошки развој.
Овие активности ќе обезбедат доверлив и одржлив пристап до енергија за граѓаните и стопанството, истовремено заштитувајќи ја животната средина.
Министерката за енергетика, минерални суровини и рударство, Сања Божиновска, учествуваше како панелистка на настанот за презентација на резултатите од мониторирањето на квалитетот на воздухот во рамки на проектот „Справување со загадувањето на воздухот“, каде истакна дека енергетската транзиција е приоритет за Владата на Република Македонија.
„Декарбонизацијата и диверзификацијата на обновливите извори се клучни цели во процесот на зелена транзиција. Во оваа насока, продолжуваме да ги прошируваме капацитетите за обновлива енергија, преку инвестиции во фотонапонски електрани и ветерни паркови. Исто така, Министерството развива политики за искористување на други извори на енергија, како биомаса, биогас и геотермална енергија, со цел да ја искористиме целосната енергетска потенцијалност на нашата земја“, изјави Божиновска.
Таа истакна дека целосната гасификација на државата претставува столб во стратегијата за енергетска транзиција.
„Гасификацијата ќе овозможи значителни придобивки за општините во однос на намалувањето на загадувањето на воздухот и ќе овозможи изградба на когенеративни електрани, кои ќе бидат носечки извори на базна енергија во наредните децении,“ рече министерката.
„Преку гасни интерконектори со Грција, Србија и Косово, Македонија ќе го зајакне својот енергетски капацитет и ќе ја зајакне својата позиција во Југоисточна Европа, придвижувајќи се кон целосна енергетска независност,“ додаде таа.
Настанот, организиран во рамките на проектот „Справување со загадувањето на воздухот“, кој го спроведува УНДП во партнерство со Министерството за животна средина и просторно планирање, како и општините Куманово, Гостивар, Струмица, Кавадарци и Струга, претставува значаен чекор кон заедничките напори за подобрување на квалитетот на воздухот и заштита на животната средина во Република Македонија
Македонија
Одвојувањето на Албанија и прекинот на преговорите со ЕУ е голем пораз на Мицкоски, оценува СДСМ
Според СДСМ, одвојувањето на Албанија и прекинот на преговорите со ЕУ е голем пораз на погрешните политики на Мицкоски и ВМРО-ДПМНЕ.
„И како опозиција и како власт, ВМРО-ДПМНЕ и Мицкоски свесно и намерно го блокираат европскиот пат на државата. Резултат на тие погрешни политики и дипломатски промашувања го гледаме денеска. Албанија продолжува напред по патот на ЕУ а Македонија влегува во нова неизвесност, без план како да понатаму.
Наместо да биде ден кога сите политички субјекти и граѓаните заедно ќе се радуваат на нов национален и државен успех, на нова надеж за подобро утре, денеска со горчина може да контстаираме дека Македонија повеќе нема европска перспектива.
Никој друг не е виновен за тоа освен Мицкоски и ВМРО-ДПМНЕ.
СДСМ не може да биде параван за промашените политики на Мицкоски за ЕУ“, нагласуваат од оваа партија.
Додаваат дека со визионерски и храбри одлуки, СДСМ ги реши отворените прашања кои ги имавме, ја внесе Македонија во НАТО и ја донесе пред прагот на ЕУ.
Како што оценуваат од опозициската партија, последниот чекор кој ВМРО-ДПМНЕ намерно и свесно не го направи е единствено поради лични и бизнис интереси на Мицкоски и неговите соработници.
„Сега власта треба да излезе пред граѓаните, да им се извини и да каже која е алтернативата“, бара СДСМ.