Македонија
Кисела Вода доби уште едно целосно инклузивно детско игралиште
Најмладите жители на општина Кисела Вода добија нов простор за игра и разонода. Денес беше ставено во функција целосно инклузивно детско игралиште на површина од над 400м2. Градоначалникот Ѓорѓиевски ја истакна континуираната заложба за унапредувањето на јавниот простор и квалитетот на животот и се заблагодари на Државна видео лотарија – Casinos Austria за покажаната општествена одговорност. Преку нивната донација беше реализирана темелата реконструкција на овој простор, кој до пред еден месец беше во многу лоша состојба.
-Продолжуваме со посветено и континуирано инвестирање во унапредувањето на јавниот простор и квалитетот на животот на нашите сограѓани. Денес, токму во центарот на Кисела Вода го отвораме новиот реконструиран простор на површина од над 400м2, предвиден за детска игра.
Новото детско катче кое од денес го ставаме во функција е целосно инклузивно. Реквизитите ќе можат да ги користат сите, вклучувајќи ги и дечињата со посебни потреби, а се поставени врз гумена подлога и просторот е ограден и безбеден за користење. Реконструкцијата опфаќа и кошаркарско игралиште кое ќе се наоѓа во склоп на самиот парк па така, жителите од овој дел на општината ќе имаат и можност да спортуваат на нов и модерен терен. Секако, паркот добива и нова урбана опрема кој ќе понуди совршен амбиент за сите посетители. Сакам да се заблагодарам на Државна видео лотарија – Casinos Austria за покажаната општествена одговорност преку донација на средства со кои се овозможи од едно руинирано, да прерасне во модерно катче за непречена детска забава и игра. Продолжуваме да ја менуваме Кисела Вода секој ден кон подобро, секој ден поубава-истакна градоначалникот Орце Ѓорѓиевски.
Претставникот на Државна видео лотарија, Вики Чадиковска, истакна дека нивната компанија досега инвестирала во 18 вакви игралишта низ Македонија. 19-тото е баскет игралиштето кое се наоѓа непосредно до денес отвореното детското игралиште и ќе биде завшено до крајот на 2024 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
По поплаките на жителите, Министерството за животна средина ќе изврши увид во работата на депонијата „Дрисла“
Првиот потпретседател на Владата и министер за животна средина и просторно планирање Изет Меџити, денеска на средба ги прими претставниците на Здруженијата „Ринија е Батинцес“ и „Вукат“ кои ја изразија својата загриженост и незадоволство за лошото управување со отпадот и медицинскиот отпад од страна на Јавното претпријатие „Дрисла“ со кое раководи Град Скопје.
Во име на жителите на село Батинцe и населбите кои гравитираат околу депонијата „Дрисла“, претставниците на двете здруженија информираа дека како резултат на несоодветното управување од страна на дирекцијата на оваа депонија, има драстично влошување на здравствената состојба на жителите на село Батинцe и околината.
Според нив, тие имаат само едно барање, современа депонија со еколошки и европски стандарди.
Меџити на средбата рече дека министерството во соработка со Државниот инспекторат за животна средина ќе го разгледа нивното барање и ќе извршат увид во дејноста и начинот на кој ова претпријатие постапува со отпадот, доколку ги исполнува своите должности и евентуалните отстапки заедно со нивната работа.
По набљудувањето на ситуацијата на терен, Министерство за животна средина ќе ги разгледа можности за изнаоѓање на потребните средства и алатки за модернизација на депонијата „Дрисла“, и подобрување на животниот стандард на жителите кои живеат во нејзина близина.
Македонија
Регистриран земјотрес во Македонија
Попладнево нов земјотрес е регистиран во Македонија.
Се работи за земјотрес со интензитет од 2.1 степен според Рихтеровата скала.
Епицентарот е на 12 километри североисточно од Демир Капија. Длабочината на потресот е на 5 километри.
Македонија
Делегацијата на Бирото за јавна безбедност на официјална средба со раководството на ИЦИТАП
Македонската делегација која присуствува на годишната конференција на Меѓународната Асоцијација на шефови на полиции, предводена од Директорот на БЈБ, Александар Јанев, се сретна со Директорот на ИЦИТАП, Грегори Дукот и неговиот тим.
Темите за дискусија беа фокусирани на продолжување на одржливоста на проектите имплементирани со поддршка на Владата на САД преку Амбасадата на САД во Скопје, вклучувајќи мобилни камери за снимање кои се користат од страна на сообраќајната и граничната полиција во државата, како и процесот на дигитализација кој ќе продолжи со забрзан тек во Министерството за внатрешни работи, а во насока на успешно справување со криминалот и корупцијата на сите нивоа.
Концептот за полициско-граѓанско партнерство „До Вас, за Вас” е еден од приоритетите на раководството во МВР, кој во периодот што следи ќе биде имплементиран на целата територија на нашата држава. Во текот на посетата на САД, нашата делегација имаше прилика да се запознае со моделот на полицијата од Бостон за блиска соработка со граѓаните.
Нашата визија е јасна, македонската полиција да се зацврсти на високо ниво со професионалност, отчетност, транспарентност како и релевантен и рамноправен партнер за соработка со странските агенции за спроведување на законот во борбата со глобалните предизвици и облици на организиран и транснационален криминал.