Свет
Скандал во САД: Поранешен директор на модна компанија уапсен поради проституција
Поранешниот извршен директор на модната компанија „Аберкромби и Фич“, Мајк Џефрис, заедно со уште двајца мажи, е уапсен под обвинение за трговија со луѓе и меѓународна проституција.
Обвинението со 16 точки беше објавено утринава, десет години откако Џефрис ја напушти фирмата што ја водеше 22 години, објави „Би-Би-Си“.
Според истрагата, која беше покрената по анализа на „Би-Би-Си“ и колективна тужба, Џефрис и неговите соработници намамиле млади мажи со лажни ветувања за работа во моделирање за да ги однесат на патувања за време на кои сексуално ги злоставувале.
Американскиот обвинител Брион Пис истакна дека обвинетите во подолг временски период сексуално злоставувале млади луѓе во потрага по кариера во областа на модата и забавата.
„Овој случај треба да послужи како предупредување за секој кој мисли дека може да ги искористува другите“, рече Пис на прес-конференција.
Покрај Џефрис (80), обвинети се и неговите партнери Метју Смит (61) и Џејмс Џејкобсон (71), а сите тројца се соочуваат со обвиненија за сексуална трговија и меѓународна проституција, во кои се вклучени 15 неименувани жртви меѓу 2008 и 2015 година.
Доколку бидат прогласени за виновни, може да се соочат со доживотна затворска казна.
Според обвинението, Џефрис и Смит им платиле на десетици мажи за секс во нивните домови во Менхетен и Хемптонс, како и во хотели низ Европа. Исто така, беше наведено дека Џејкобсон имал „проба“ со младите луѓе пред да ги запознае со Џефрис и Смит.
Компанијата изрази шокираност и вознемиреност од обвинувањата против Џефрис, велејќи дека е тешко да се поверува дека компанијата има некаква врска со тоа.
Џефрис ја водеше компанијата од 1992 до 2014 година, кога поднесе оставка поради критиките дека не е во чекор со променливите вкусови на тинејџерите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Пред судот сведочеше жената чијшто сопруг со децении носеше мажи да ја силуваат: „Ме изневери, јас сум скршена“
Жизел Пелико, жената чијшто сопруг ја силувал, дрогирал и носел други мажи во куќата за да ја силуваат, за време на сведочењето изјави дека е скршена жена и дека не се ни сомневала во постапките и искреноста на мажот со кој го делела животот.
„Профилот на силувач не е некој што сте го сретнале на паркинг доцна во ноќта. Силувач може да биде и во семејството, меѓу нашите пријатели. Кога минатата недела видов еден од обвинетите кој без согласност влегол во мојата спална и куќа… Овој човек кој дошол да силува онесвестена 57-годишна жена, јас сум и мајка и баба… Би можела да бидам и негова баба“, рекла Жизел.
Таа рече дека е „скршена жена и не знае како да се опорави“.
„Секако дека денеска не чувствувам одговорност за ништо. Денеска пред се сум жртва“, истакна таа.
На судењето таа раскажа и како се консултирала со тројца гинеколози поради нејзините грижи.
„Неколкупати се будев и се чувствував како да ми пукнал водењакот, како што се случува кога се пораѓаш. Секогаш го јадам истиот појадок – сок од портокал, тост, џем, мед. Можел да ми стави дрога во сокот од портокал или во кафето“, рече Жизел.
Жизел Пелико потоа изјави дека сака да му се обрати на својот сопруг, нарекувајќи го Доминик, но инсистираше дека не сака да го погледне.
„Толку пати си кажав колку имам среќа што те имам со мене. Ти застана покрај мене кога имав невролошки проблеми (кои подоцна беше утврдено дека ги предизвикал тој што ја дрогирал), ме однесе на невролог, на скенирање. Отиде со мене на гинеколог. Целосно ти верував. Како може совршен маж да го направи ова? Како можеше да ме предадеш до овој степен? Како можеше да ги внесеш овие странци во мојата спална соба?“, праша скршената Жизел.
Судијата потоа ја праша за тоа што носела на видеата од силувањата. Нејзиниот сопруг ја пресоблекувал во текот на ноќта, а потоа ја облекувал повторно во пижами.
„Имав две фиоки полни со долна облека. Точно знам што носев, носев бела и портокалова облека. Долната облека на видеата не е моја. Не ми припаѓа мене, а не знам каде ја чувал“, рекла таа.
Доминик Пелико е обвинет дека со децении ја дрогирал и силувал Жизел, но донел и повеќе од 70 други мажи да ја силуваат.
Адвокатот на Жизел Пелико ја праша за нејзината ќерка Керолин, која им кажала на инспекторите: „Една ноќ видов дека татко ми ја фати мајка ми за врат, ја крена од земја и рече дека ќе ја убие“.
Адвокатот праша дали ова се однесува на моментот кога Доминик Пелико дознал дека Жизел имала вонбрачна врска.
„Да, Керолин беше осумгодишно девојче, таа не лаже. Таа ја виде сцената во бањата кога нејзиниот татко ми пријде. Ми го затресе вратот, така е“, потврди Жизел.
Повторно запрашана за можниот комплекс на инфериорност што наводно го покажал Доминик Пелико, Жизел рече дека секогаш се трудела да го израдува својот сопруг и покрај тешкото детство.
„Кога го запознав Доминик, и покрај тоа што ја изгубив мајка ми на многу млада возраст, секогаш бев опкружен со љубов. Доминик беше спротивно, имаше татко тиранин, целата плата им ја даваше на родителите“, изјави жртвата на масовното силување.
На прашањето на судијата како Доминик дознал за нејзината вонбрачна врска, таа рече дека сама му кажала.
– Бев во бањата. Тој имаше свои сомнежи. Тој виде дека не сум истата личност. Тој рече: „Морам да знам“, и јас признав. Му беше многу тешко. Не можеше ни да замисли дека можам да го направам тоа, но и тој имаше афери“, изјави Жизел.
На претходното рочиште беа објавени снимките од силувањата на Жизел Пелико. Нејзиниот поранешен сопруг, кој организирал се, си ги покрил очите во судницата.
Свет
И Ердоган пристигна во Русија; Кремљ: Членството во НАТО не е проблем, Турците можат да се приклучат на БРИКС
Рускиот претседател Владимир Путин го отвори самитот на БРИКС во Казан, во Руската Република Татарстан, поздравувајќи го подемот на „мултиполарниот свет“.
Со тој самит Путин сака да го демонстрира неуспехот на западната политика на економски санкции и дипломатска изолација на неговата земја од почетокот на руската инвазија на Украина во февруари 2022 година.
Исто така, има намера да го осуди она што Русија и Кина го опишуваат како западна „хегемонија“ во меѓународните односи, првенствено американски. Путин им објасни на лидерите на десетина земји од БРИКС, вклучително и кинескиот претседател Си Џинпинг и индискиот премиер Нарендра Моди, дека ќе разговараат за најитните прашања, вклучително и решавањето на регионалните конфликти.
„Процесот на воспоставување мултиполарен свет е во тек, динамичен и неповратен“, посочи тој.
Генералниот секретар на ОН, Антонио Гутереш, кој денеска пристигна во Казан, утре ќе разговара со Путин за Украина, соопшти Кремљ.
ОН официјално не го потврдија состанокот, но вчера најавија дека Гутереш ќе разговара со „голем број лидери кои учествуваат на самитот“.
Тоа ќе биде нивна прва средба во Русија од април 2022 година.
„Генералниот секретар ќе ги потврди своите добро познати позиции за војната во Украина и условите за праведен мир врз основа на Повелбата на ОН и резолуциите и меѓународното право“, рече неговиот портпарол, Фарха Хак.
Гутереш често истакнува дека нема место во современиот свет за руска анексија на украинските региони. Шефот на украинската дипломатија во понеделникот оцени дека Гутереш направил грешка со прифаќањето на посетата на Казан.
„Тоа само ќе му наштети на угледот на ОН“, објави тој на „Икс“.
Путин вчера имаше серија билатерални средби, пред се со кинескиот претседател Си Џинпинг и индискиот премиер Нарендра Моди. Тие земји не ја осудија инвазијата на Украина или анексијата на украинските територии. Путин денеска треба да се сретне со венецуелскиот и иранскиот претседател Николас Мадуро и Масуд Пезешкијан.
За денеска е предвидена билатерална средба со турскиот претседател Реџеп Таип Ердоган. Турција не е членка на БРИКС, но е членка на НАТО и има сложени односи и со Москва и со Западот. На почетокот на септември навести дека може да се приклучи на БРИКС, пред се од економски причини, според аналитичарите.
Портпаролот на Кремљ, Дмитриј Песков, денеска изјави дека членството на Турција во НАТО не е пречка за земјата да се приклучи на БРИКС доколку Анкара така одлучи, пренесе „ТАСС“.
БРИКС е основан во 2009 година од Бразил, Русија, Индија и Кина, а во 2010 година им се приклучи и Јужноафриканската Република. Годинава им се придружија Етиопија, Иран, Египет и Обединетите Арапски Емирати.
Свет
Америка: Севернокорејците се во Русија, тоа ќе има последици во Европа
Американскиот секретар за одбрана Лојд Остин денеска изјави дека има докази оти севернокорејските војници се во Русија и останува да се види што ќе направат таму.
„Постојат докази дека севернокорејските сили се во Русија“, изјави Остин пред новинарите во Рим денеска, пренесе Ројтерс.
„Што точно прават таму? Тоа останува да се види. Тоа се работите што треба да ги средиме“, додаде Остин.
Како што објави „Њујорк тајмс“, Остин го нарече присуството на севернокорејски војници во Русија „многу сериозна ескалација“ што „ќе има последици и во Европа и во Азија“.
Синоќа украинскиот претседател наведе разузнавачки информации за подготовка на две бригади во кои има до 12.000 севернокорејски војници, кои треба да учествуваат во војната против Украинците рамо до рамо со руските војници.