Македонија
Дурмиши: Безбедноста и здравјето на работниците се наш приоритет, работиме на рергулатива за новите предизвици во секторот

Безбедноста и здравјето при работа е тема која не е само дел од нашите професионални обврски, туку нешто многу поголемо. Тоа е прашање на човечност, на грижа за секој поединец и на заштита на она што е најдрагоцено – животот, кажа министерот за економија и труд Бесар Дурмиши на денешното обраќање на настанот по повод Европската недела на безбедност и здравје при работа, кој се одржа во организација на Министерството за економија и труд во соработка со Советот за безбедност и здравје при работа и во партнерство со Канцеларијата на Фондацијата „Фридрих Еберт“
„Во време на дигитализација, кога технологијата секојдневно ги менува нашите работни места, воодушевени сме од сите придобивки што таа ги носи – од поедноставување на процесите, до зголемување на ефикасноста. Таа ни овозможува да избегнеме многу физички ризици, да ги автоматизираме ризичните задачи и да ја зголемиме продуктивноста. Но, технологијата не е одговор на сè. Дигитализацијата носи нови предизвици кои не се толку видливи, но се подеднакво важни – менталниот товар на работниците, стресот од постојаното присуство во дигиталниот свет, оддалеченоста од традиционалната работна средина и притисокот да се биде постојано достапен“ кажа министерот Дурмиши.
Министерот потенцираше дека Министерството за економија и труд е посветено на развивање на регулативи кои ќе одговараат на новите предизвици што ги носи дигитализацијата. Работиме на создавање на законска рамка која ќе ги земе предвид и физичките и психо-социјалните аспекти на работата во современиот свет. Клучно е да работиме на усогласување на новите технологии со политиките за безбедност и здравје. Дигиталните алатки можат да ни помогнат во следењето на здравствените ризици, но не смееме да создадеме средина која е нездрава или стресна за работниците. Менталното здравје е подеднакво важно како и физичката безбедност на работниците.
„Како министер, но и како човек, верувам дека нашиот прв приоритет треба да бидат луѓето, затоа што и во сржта на секоја промена, на секој технолошки развој, стојат луѓето. Мораме да бидеме свесни за тоа како технолошките промени влијаат на физичкото и менталното здравје на работниците. Законот и регулативите се важни, но поважно е, како општество, да изградиме нов образец на работно место – каде технологијата ќе служи за да ги подобри условите, но не и да го игнорира човечкото достоинство“ кажа Дурмиши и додаде дека безбедноста и здравјето при работа не е одговорност само на владата или институциите.
“Тоа е заедничка одговорност. Сите – од работниците, преку работодавачите, до институциите – мора да соработуваат за да се обезбеди безбедна и здрава работна средина. Културата на безбедност и грижата за здравјето треба да биде вградена во секојдневната работа на сите нивоа.
На крај, сакам да нагласам дека технологијата е тука за да ни помогне, но човечкиот фактор останува клучен. Наша задача е да осигураме дека дигиталниот напредок оди рака под рака со грижата за здравјето и благосостојбата на работниците. Напредокот и технологијата можат да создадат подобар свет, но само ако тој свет е изграден врз основа на безбедност, доверба и грижа за луѓето“ потенцираше министерот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.