Свет
Палестинските власти тврдат: Илјада цивили загинаа на северот на Газа за три недели
Управата за цивилна одбрана на Газа објави дека најмалку 1.000 Палестинци се убиени во израелските напади врз северниот дел на Појасот Газа во последните три недели.
Портпаролот на администрацијата Махмуд Басал изјави дека најмалку 1.000 луѓе ги загубиле животите во овие напади што израелската армија ги изведува на северот на Газа.
Басал рече дека најмалку 100.000 луѓе биле изложени на блокади и напади во Џабалија, Беит Ханун и Беит Лахија, а дополнителни 100.000 биле раселени во градот Газа.
Според него, израелските сили го спречиле секој што се обидел да им достави помош на Палестинците во северниот дел на Газа. Басал го обвини Израел дека го користи отсуството на реакција од меѓународната заедница за спроведување на политиката на етничко уништување во северниот дел на Газа и апелира до меѓународните институции да дејствуваат итно за да ги спасат цивилите во регионот.
На 5 октомври израелската армија изврши интензивни воздушни напади на северот на Газа, вклучувајќи го и бегалскиот камп Џабалија, а на 6 октомври беа извршени копнени напади во тие области.
Се претпоставува дека овие акции се дел од пошироката стратегија за евакуација на Палестинците од северна Газа како подготовка за евентуалното израелско населување на областа, но овие тврдења сè уште не може со сигурност да се потврдат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Кинеската влада најави мерки за зголемување на наталитетот
Кинеската влада денеска објави мерки за подобрување на планирањето на семејството и родителството во обид да се зголеми наталитетот.
Државниот совет на Кина повика на напори за изградба на нова култура на брак и породување истакнувајќи дека се усвоени мерки за да се понудат поповолни породилни бенефиции, како и субвенции за децата и нивното образование, објави „Ројтерс“.
Во Кина минатата година наталитетот достигна рекордно ниско ниво.
Свет
Детали за престрелката во Австрија: освен градоначалникот, убиено уште едно лице, мештаните се кријат во своите домови
Утрово, во Милвиертел, Горна Австрија, е убиен градоначалникот на Кирхберг об дер Донау, Франц Хофер. Набргу потоа беше пронајдено уште едно тело, а медиумите ја објавија можноста за трета жртва, што полицијата сѐ уште не ја потврдува.
Во истиот кварт е пронајдена и втората жртва.
Според првите информации, се претпоставува дека градоначалникот е убиен во Алтенфелден, општина што граничи со Кирхберг об дер Донау. Се вели дека осомничениот напаѓач, кој моментно е во бегство, е ловец и се верува дека е вооружен со долга пушка.
Во тек е опсежна потрага, во која се вклучени специјалните сили, вклучувајќи ја и екипата „Кобра“. Пошироката област е опколена, а на местото на инцидентот се ангажирани сите служби за итна помош. Мотивот за злосторството сѐ уште не е познат, но според весникот „Ди пресе“, можно е причина за овој трагичен настан да биде спор за ловот.
На терен се присутни многубројни полициски сили.
Регион
Училиштата во Сараево веќе еден месец добиваат закани за бомби
Редовната настава во неколку средни училишта во реонот на Сараево денеска повторно мораше да биде прекината откога добија закани за бомби, со што се потврди дека претходната полициска истрага и многуте апсења на малолетници не го решиле овој проблем, кој интензивно трае веќе еден месец.
„Полицијата ги претресува училиштата, а за сѐ е информирано Обвинителството“, изјави Мерсиха Новалиќ, портпаролка на полицијата на Сараевската жупанија.
Ова е веќе четврта недела во која во училиштата во Сараево пристигнуваат закани за поставени бомби, па според утврдените процедури, наставниот процес мора веднаш да се прекине и специјализирани полициски екипи да излезат на терен за да извршат увид. Сите извештаи досега се покажаа како лажни, но наставниот процес е загрозен, а повеќето училишта во такви ситуации прибегнуваат кон онлајн-моделот на настава, кој се практикуваше за време на пандемијата.
Заканите за бомби до училиштата најчесто доаѓаат преку е-пошта од лажни адреси или други онлајн-платформи, а полициските истражители со недели трагаат по испраќачите, кои тешко може да се пронајдат.
Сепак, досега успеале да идентификуваат и приведат 12 такви лица. Само еден од нив бил полнолетен и имал 18 години, а сите други биле малолетни.