Пратеникот од СДСМ, Оливер Спасовски на денешната собраниска седница за пратенички прашања, потенцираше дека Мицкоски и ВМРО ДПМНЕ, направија целосен демант на ветувањата во изборната кампања кои се однесуваат на формирање на професионална департизирана администрација.

„Во време на изборната кампања имаше ветување дека ќе се формира мала професионална администрација во којашто департизацијата ќе биде основа, дека нема да имаме непотизам, дека само стручни и компетентни кадри ќе бидат поставени на позиции. Само во овие 100 дена направивте целосен демант со постапките за коишто можеби знаете како одлуки а можеби и не знаете“, рече Спасовски.

При тоа, Спасовски во прашањето до Мицкоски, посочи дека во првите 100 дена од Владата на ВМРО ДПМНЕ, јавноста е сведок на повеќе примери на непотизам.

„Сестрата на министерот за култура Љутков, вработена во Музејот во Велес во овој период, братот на помошникот на министерот за внатрешни работи во Центарот за обука се вработил во Центарот како предавач од неодамна. Во Македонски Брод има една цела листа за 100 дена, може да кажеме 100 дена или 100 дена вработувања од семејството“, рече Оливер.

Говорејќи за стручноста и компетентноста на дел од избраните кадри на ВМРО ДПМНЕ, Спасовски го посочи за пример изборот на директорката на Комисијата за верски заедници, Оливера Трајковска.

„Започнала студии на Теолошкиот факултет во Скопје во 1997 година, дипломира 2023 година, значи после 26 години кај колега со кој заедно почнале да студираат.Дали ова се критериумите? И ако се тргне од претпоставката, тој што најдобро знае за теологијата, нема конкуренција личност што толку време студирала. И втората работа е во однос на стекнувањето на дипломата, бројот на годините колку што треба за директор и учеството односно работењето во државната администрација. Дали овие принципи коишто ги заговаравте претходно на стручност, на компетентност, на немање на непотизам, исто така ќе побарате ревносно да се расчистат во јавноста, и тие коишто искористиле одредени позиции на моќ за да успеат во намерите на своите блиски да ги вдомат, дали ќе преземат одговорност и ќе има разрешување, бидејќи тоа беа барањата коишто претходно како опозиција ги баравте“, порача Спасовски.

Денес на седницата за пратенички прашања во Собранието на Република Македонија, пратеникот од редовите на ВМРО ДПМНЕ Антонијо Милошоски му постави прашања на претседателот на Владата, Христијан Мицкоски, на министерот за внатрешни работи, Панче Тошковски, и на министерот за транспорт и врски, Александар Николоски.

Првото прашање беше до претседателот на Влада, Христијан Мицкоски и се однесуваше на Републичкиот судски совет. Милошоски напомена дека моментално целото правосудство има низок углед и висока недоверба и тоа влијае на довербата на граѓаните во институциите. Тој истакна и дека ова долго време се провлекува во извештаите на ЕК и дека е време да се преземат чекори.

,,Моето прашање е дали до овој момент, Републичкиот судски совет како целина и тело или некои членови до вас доставија издржан предлог за реформи на оваа институција или доколку нема кој е вашиот план за реформа на Републичкиот судски совет со цел да се зголеми довербата во оваа институција и да има поголема стопанска извесност и капацитет за владеење на право и борбата против корупција?“, праша Милошоски

Второто прашање беше до министерот за внатрешни работи Панче Тошковски и се однесуваше на акцијата која беше спроведена по налог на надлежните институции во струмичкиот регион против неколку фирми од кои што најзвучна во јавноста беше фирмата на Крмзов.

,, Која е вашата проценка за овој случај? За какви дела станува збор или какви индиции ако може да се соопшти, и дали очекувате разрешница на овој кривично правен настан, според она што може вие да го процените како министер за внатрешни работи?“, рече Милошоски

Третото прашање беше до министерот за транспорт и врски Александар Николоски, во однос на делницата Прилеп-Битола. Милошоски напомена дека долго време пелагонискиот регион има потреба од оваа делница и сметаме дека би било многу добро ако навремениот почеток и реализација кој вклучува и експропријација и поместување на одредени надвозници кои веќе ги има тој пат.

,,Би сакал да ја слушнам вашата проценка, за почетокот и реализацијата и во кој временски период овие два стопански центри во Прилеп и Битола ќе бидат поврзани?“, заклучи Милошоски.

Милошоски постави и дополнително прашање во однос на Републичкиот судски совет. Тој напомена дека не може да се очекуват исти резултати ако оваа екипа во РСС продолжи да биде истата во следните 2 до 3 години.

,,Јас сум песимиста дека ќе имаме подобрување во судскиот совет доколку оваа екипа остане. Моето дополнително прашање е дали имавте веќе разговор на оваа тема со европскиот експерт? Бидејќи законоски е регулиран со закони кои се гласаат со 2/3 мнозинство во Собранието, доколку се предложи одреден закон за темелна реформа на судскиот совет освен парламентарно мнозинство, да обезбедиме 2/3 мнозинство за темелна реформа на Републичкиот судски совет“, дополни Милошоски.

„Господине Оливер Спасовски, да биде Сања Божиновска дел од македонската Влада треба да е привилегија, затоа што, тоа што она го има на професионален план во енергетиката направено не можете ниту да го сонувате, а камоли па да се приближите“, му порача претседателот на Владата Христијан Мицкоски на Оливер Спасовски на денешната седница за поставување на пратенички прашања.

Премиерот Мицкоски додаде дека за разлика од Спасовски кој делел македонски пасоши на белосветски криминалци, министерката Божиновска има долгогодишно работно искуство, а за неа како што рече знае светскиот бизнис крем од Украина до Шпанија и од Скандинавија до Атина.

„Нејзината биографија и нејзините постигнувања, се нешто за кое што барем можевте да излезете овдека и да кажете секоја чест за стручноста и за личното портфолио. И сега се доведуваме во ситуација, да е грев ако сме успешни. Се доведуваме во ситуација да зборуваме работи, кои што навистина немаат никаква врска, ниту па јавноста ја интересира, во врска со тоа кое што го води Сања. Еве јас ќе ви кажам бидејќи ја знам долго време, да речеме 12-13 години. Верувајте ми за нејзе знаат светскиот бизнис крем од Украина до Шпанија и од Скандинавија до Атина. Додека имавме политичари во македонската влада, кои што даваа пасоши на белосветски криминалци. Тоа е ваша работа, тоа е директен ваш ресор и за тоа ќе ве напаѓам, ќе барам одговорност. Бидејќи го споменавте Панче Тошковски, ќе барам одговорност за тоа што сте го правеле, тогаш ќе барам одговорност. Сега да зборуваме за работи кои немаат никаква врска со енергетиката, ниту со рударството. Ниту со минералните суровини. Знаевте кои фирми носат јаглен во РЕК Битола и Осломеј. Знаевте? Знаевте кои носеа транспортни траки во РЕК Битола. Требало како МВР да го истражите тоа, бидејќи стигаа информации до вас, стигаше гласот, ние како опозиција зборувавме. Еве два реда позади вас еден поранешен ваш член од вашата влада ќе ви каже, за работи кои немаат никаква врска. Тоа била ваша работа, се надевам дека повторно никогаш нема да ви биде бидејќи тоа што таму го направивте е полошо и од најголемиот дебакл, кои што и се случи на Македонија. Ако вие сте постапувале, место да дават пасоши на светски нарко картели и лидери на такви нарко картели, и сте се фокусирале на тоа што ви е работа да истражите, зошто преку програмата за ФИТР се спонзорираа иновативни методи за креирање пица, вода за пиење, слично, кои носи јаглен, како се носи јагленот, кои врши ископ, како се врши ископ, зошто се плаќа вака, зошто ЕЛЕМ има најмногу договори во четири очи, тогаш ќе ви станело јасно, зошто денес имате 18 пратеника, а на следните избори, прашање е дали ќе имате двоцифрен број на пратеници, ако вака продолжите. Ваша работа била господине Спасовски да утврдите зошто фирми враќале данок на додадена вредност, пријавувајќи лажна консигнација, а празни магацини. Ваша работа било тоа господине Спасовски, не била моја. Ние како опозиција сме зборувале, немојте ова да го правите, немојте господине Спасовски, еве допрел до вас гласот, истражете, вие не сте го работеле тоа. Тоа е господине Спасовски ваша работа. Ќе ви дојде господинот Пекер, да му кажете не благодарам, а не лична карта да му вадите во 11 часот навечер во Драчево. И оние службеници таму кои што преземаат дело заради вас, по две три години што беа во затвор за патни исправи на српски кланови и на македонски кланови, кои што се занимаваат со криминал и корупција. Вие господине Спасовски треба да одговарате за тоа. И ако за тоа нема одговорност, тогаш да ќе барам одговорност. Тоа е работата господине Спасовски за која вие треба да се грижите. Кој каква имал самосвест, што имал самосвест, јас ви кажувам и ви гарантирам и ви потпишувам, дека Сања Божиновска е многу поголема Македонка од вас сите заедно. Запишете го ова. Јас ова ви го кажувам и ви потпишувам да знаете. Заедно седиме тука се бориме и Македонци и Албанци и левичари и десничари, заедно сме во иста влада и работиме за еден интерес, за една кауза, тоа се вика Македонија. И ќе продолжиме да се бориме, нема да застанеме“, кажа премиерот Мицкоски.