Потпретседателката на САД и демократска кандидатка на изборите, Камала Харис, не успеа да и’ обезбеди победа на својата партија, а сега првпат се огласи по поразот. Таа уште на почетокот им се заблагодари на сите луѓе кои гласаа за неа. Илјадници луѓе дојдоа да ја слушнат и видат Камала во живо, а громогласен аплауз го придружуваше нејзиното појавување на сцената, додека многумина плачеа во публиката.

„Моето срце е полно денес, полно со благодарност, љубов кон нашата земја. Исходот не е онаков каков што сакавме, за што се боревме, за што гласавме. Но, слушајте ме, светлината секогаш ќе гори, се додека се бориме“, изјави  Харис, која и самата беше на работ на солзите.

Истакна дека е горда на борбата и како таа се водеше, но и дека нема да се откаже од неа.

„Го признавам поразот, но не се откажувам од борбата што ја водев во кампањата. Борбата за слобода, правда… Тоа е борба од која никогаш нема да се откажам. Никогаш нема да се откажам од фактот дека Американците можат да ги остварат своите аспирации, во Америка каде жените имаат избори, во која училиштата и улиците се заштитени од оружено насилство“, рече таа.

Соопшти дека демократите ќе се придржуваат до принципот на мирен трансфер на власта.

„Ова ја разликува демократијата од монархијата и тиранијата. Не му должиме лојалност на претседателот и партијата, туку на американскиот Устав“, рече таа.

Камала претходно му се јави на Трамп на телефон и му ја честиташе изборната победа. Според нејзиниот висок функционер, таа разговарала за важноста на мирен трансфер на власта и статусот на претседател за сите Американци.

Републиканскиот кандидат Доналд Трамп победи на претседателските избори во САД откако освои мнозинство електорски гласови во сојузните држави, како и поголем број гласови на сојузно ниво од противкандидатот од Демократската партија, Камала Харис.

Потпретседателката на САД, Камала Харис се очекува да се обрати на јавноста по поразот од Доналд Трамп.

Во продолжение преносот во живо.

Џо Бајден му се јави на новоизбраниот претседател, Доналд Трамп, за да му ја честита изборната победа и да го покани во Белата куќа на состанок поврзан со трансферот на власта.

Белата куќа соопшти дека Бајден ја изразил својата посветеност за обезбедување непречена транзиција на власта и ја нагласил важноста да се работи за обединување на земјата.

Бајден утре ќе и се обрати на нацијата за да зборува за резултатите и трансферот на власта.

Претходно, поразената на изборите, актуелната потпретседателка Камала Харис, му се јави на Трамп, го призна поразот и му честиташе за победата.