Снег падна во поголеми делови од Австрија. Силниот студен фронт донесе не само дожд и бурни ветрови, туку и многу снег, дури и во пониските предели. Се очекуваат значителни количества свеж снег, особено на Алпите.

Австрија утрото го пречека под студен фронт кој не само што донесе дожд и снег, туку предизвика и бура, пренесува магазинот Феникс.

Во Форарлберг, Северен Тирол и јужна Корушка има до 50 сантиметри снег. Помали количества снег во петок навечер може да падне и во Виена, Долна Австрија и Градишче.

Екстремни температури се очекуваат во високите алпски области, особено во Бруненкогел во Тирол (3.400 метри надморска височина).

Според австриските медиуми, температурите се спуштаат и до -19 степени. Сепак, со брзина на ветер од 80 km/h и -10 степени се чувствуваат како -24 степени. При -18 степени и 40 км/ч се чувствува како -32 степени.

Сараево утрово осамна под снегот. Снегот кој почна да паѓа во средата попладне во Босна и Херцеговина за кратко време предизвика бројни проблеми на градските улици и  автопатишта.

Како што пренесува Кликс, најпрвин силен дожд, а потоа и поголемо количество снег предизвикале лизгави коловози, што довело до поголем број сообраќајни несреќи во Сараево.

Од тежината на влажниот снег има многу скршени гранки и дрвја, а се чини дека на пешаците им е најтешко со оглед на тоа што тротоарите се многу лошо или воопшто не се исчистени низ Сараево.

Зимските служби на КЈКП Рад во текот на ноќта го расчистија главниот пат, но споредните улици се уште се под дебел слој снег, пишува Кликс.

Поради уривањето на настрешницата на Железничката станица во Нови Сад, уапсени се 11 лица, соопшти Вишото јавно обвинителство во Нови Сад.

Настрешницата на станицата се урна на 1 ноември. Загинаа 15 лица, а две лица се уште се борат за живот.

По трагедијата во Србија беше следеа протести на граѓаните кои бараа одговорност за катастрофата што се случи.

Нова.рс дознава дека меѓу уапсените се Небојша Шурлан, поранешен директор на компанијата „Инфраструктура железнице“ и Јелена Танасковиќ, која до пред неколку дена беше директор на истата фирма.

Меѓу уапсените е и поранешниот министер Горан Весиќ, пишува Мондо.

Весиќ поднесе оставка од функцијата министер за градежништво, транспорт и инфраструктура. Тој поднесе оставка пет дена по трагедијата што се случи во Нови Сад во која загинаа 15 лица.

„Дадов оставка од функцијата министер за градежништво, транспорт и инфраструктура во Владата на Република Србија. Дадов оставка како одговорен човек кој со личен пример сака да покаже дека во денешна Србија има морална одговорност поради страшната трагедија која се случи во одделот што го раководам“, рече тој.

За делото е предвидена затворска казна од две до 12 години, информираат од обвинителството во Србија.