Македонија
Царината заплени накит, рачни часовници, цигари, автоделови, фалсификати
Во текот на минатата недела, царинските службеници спречија повеќе обиди за криумчарење разна стока, меѓу коишто накит, рачни часовници, цигари, тутун, девизи, автоделови, облека, техничка стока, суплементи, кафе во зрно и фалсификати.
– 19 парчиња накит (SWAROVSKI и COEUR.DE) и рачен часовник ESPIRIT, со вредност од околу 120.000 денари и избегнати давачки во износ од 42.132 денари, биле пронајдени кај патничка која допатувала со лет од Базел; 5 парчиња накит (прстени и нараквици) и 3 рачни часовници од марките ROLEX и CITIZEN, биле пронајдени кај патник кој допатувал со лет од Виена.
-Од страна на мобилните царински тимови во фабрички празнини на автобус со македонски регистарски таблички во два куфери при влез во државата на граничниот премин Деве Баир пронајдени се 23 штеки цигари Parliament aqua blue, без акцизни маркички.
-Во два одделни случаи на Меѓународниот аеродром Скопје при контрола на багажот откриени се 72 штеки цигари, од кои: 32 штеки цигари MARLBORO, PALL MALL, DAVIDOF и WINSTON, и 1500 грама тутун GOLDEN VIRGINIA, со македонски акцизни маркички, со вредност од 53.875 денар и 40 штеки цигари MARLBORO и MAYFAIR SKY BLUE, со косовски акцизни маркички, со вредност од 60.000 денари.
-Царински службеници во соработка со припадници на Министерството за внатрешни работи на пазар во Скопје одзедоа 23,850 килограми сецкан тутун за пушење и 18 штеки цигари за кои продавачот не поседувал документи за платени царински и акцизни давачки.
-При личен претрес на патник кој се пријавил за влез во државата на граничниот премин Блаце пронајдени се 4.000 швајцарски франци. Патникот пријавил дека носи со себе 9.900 швајцарски франци, но при претресот биле пронајдени уште 4.100 швајцарски франци. Согласно законските прописи, на патникот му биле вратени 10.000 швајцарски франци.
-Мобилните царински тимови при контрола на автобус со македонски регистарски таблички во внатрешноста на куфер сопственост на возачот, откриле 25.550 евра, од кои 10.000 евра му биле вратени на возачот согласно законските прописи, а 15.550 евра се задржани.
– Во багажникот на автомобил пријавен за влез во државата на граничниот премин Блаце, пронајден е и задржан менувач за патничко возило Audi Q5.
-114 парчиња разни авто-делови (греачи, стабилизатори, свеќички, црева за вода, филтри за гориво и друго) биле пронајдени во прегради во кабината и прегради на вратите од кабината на камион со македонски регистарски таблички пријавен за влез во државата на граничниот премин Блато. Вредноста на привремено задржаната стока изнесува 64.150 денари.
– На граничниот премин Табановце автопат биле пронајдени: 1 употребуван моторцикл Yamaha во делови, 1 нов професионален апарат за индукциско греење Telwin Smart Inductor 5000 и 6 употребувани волани за патнички возила во багажникот на минибус со македонски регистарски таблички пријавен за влез во државата.
– На граничниот премин Делчево во два одвоени случаи при контрола на два автомобили управувани од македонски државјани, пријавени за излез од државата откриени се 2 комплети бугарски регистарски таблички и сообраќајни дозволи. Во двата случаи возачите изјавиле дека табличките ги носат во Бугарија да ги одјават, а возилата на кои припаѓале биле продадени во отпад без претходно да бидат увозно оцаринети и платени увозни давачки.
-Царински службеници спречија повеќе обиди за шверц на разна стока, меѓу којашто 124 парчиња облека и 12 женски чанти на граничниот премин Делчево. На граничниот премин Ново Село во багажникот и под седиштата на автомобил, пријавен за влез во државата пронајдени се 21 парче облека. На граничниот премин Табановце автопат во багажникот и позади предните седишта на автомобил откриени се 14 машки јакни од познати светски брендови, со вредност од 810.000 денари и избегнати давачки во износ од 313.065 денари.
-Од страна на Службата за мобилни скенери во повеќе одделни случаи откриени се 1 нова справа за веслање и 4 употребувани технички производи (телевизор, машини за садови и машина за алишта), 50 терморегулатори за печки на пелети, 4 греалки на гас и 1 електрична греалка, 1 костум за маскирање и 4.410 капсули и 1,82 килограми разни суплементи.
-6,1 килограми кафе во зрно од марките BONCAMPO и INCAROM, 111 парчиња миризливи свеќи, 20 пакувања влажни шамивчиња, и 64 парчиња облека се пронајдени во повеќе торби и куфери во автомобил пријавен за влез во државата на граничниот премин Табановце автопат.
Од страна на мобилните царински тимови во царинската испостава Куманово откриена е и запленета е стока за која постои сомневање дека повредува права од интелектуална сопственост:
– 4.080 играчки и школски прибор со ознаки на заштитени трговски марки, со пријавена вредност од 225.057 денари биле пронајдени при контрола на стока со потекло од Кина, пријавена со две декларации за увозно царинење во царинската испостава Куманово.
– 180 пластични играчки со ознаки на заштитени трговски марки со пријавена вредност од 28.000 денари се откриени при контрола на стока со потекло од Кина, пријавена за увозно царинење во царинската испостава Струмица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На Божиќ се роди Миха – првото бебе во 2026 година во Кочани
На Божиќ, 7 јануари, во раните утрински часови се роди Миха, првото новороденче во 2026 година во Кочани. Мајката Виолета од Оризари роди здраво машко дете, второ во семејството Димитровски од Оризари.
Градоначалникот на Општина Кочани Владко Грозданов денеска го посети Гинеколошко-акушерското одделение во Општа болница – Кочани, каде што со д-р Илчо Атанасовски, којшто го изврши породувањето и со директорката на болницата Катерина Мирчовска-Паниќ ѝ ја честитаа рожбата на мајката.
Градоначалникот им ги врачи традиционалните подароци на бебето и на мајката и им посака добро здравје и многу среќа во животот.
– Во моментите кога го славиме најголемиот христијански празник, раѓањето на нашиот Бог, Исус Христос се раѓа и нова надеж во Кочани. Ова не е симболика, ова е јасна порака со која, Господ Бог е со нас и со негова помош ќе се трудиме да го направиме тоа што многупати го кажавме, за повторно раѓање на Кочани и на кочанската болница. Од мое лично име и од име на Општина Кочани на малиот наш сограѓанин, му посакувам безгрижно детство, многу здравје и да биде гордост на неговите родители и на нашиот град Кочани. Ние како Општина ќе бидеме посредник меѓу централната власт и институцијата болница во Кочани за што е можно побрзо возобноување и повеќе инвестиции, како на кадровско така и на организациско поле – рече градоначалникот Грозданов.
На Гинеколошко-акушерското одделение и на дежурната екипа градоначалникот им врачи подароци и им посака успешна работа во 2026 година.
Доктор Илчо Атанасовски соопшти дека во 2025 година на Гинеколошкото одделение во Кочани се извршени 1600 прегледи и 230 хоспитализации. Бројот на породувања е помал во споредба со лани, но бројот на дијагностицирани карциноми е зголемен од 5 во 2024 на 16 во 2025.
Според директорката Паниќ-Мирчовска се очекува брзо кадровско екипирање на Гинеколошко-акушерското одделение со нови специјалисти, како и подобрување на медицинската опрема во кочанската болница.
Македонија
Во прекин сообраќајот на граничниот премин Евзони
Од 17:00 часот сообраќајот на ГП Евзони (Богородица) е во прекин за секаков тип на возила, соопшти Автомотосојузот на Македонија (АМСМ).
Сообраќајот на државните патишта се одвива непречено, по влажни коловози. Врнежи од снег со променлив интензитет се бележат на Попова Шапка, но во моментов не преставуваат пречка за одвивање на сообраќајот.
Македонија
Евакуација во Кичево и поплавени подруми во Охрид по обилните дождови
Во Кичево се евидентирани поплави на повеќе стамбени објекти на улицата „Прилепска“, поради што е започната евакуација на жители. На терен интервенираат екипи на Општина Кичево, Дирекцијата за заштита и спасување, Црвениот крст, ЈКП „Комуналец“ и други надлежни служби.
Во Охрид, пак, пријавени се поплавени подруми, гаражи и дворови на повеќе локации. За состојбата се известени локалната самоуправа и Кризниот штаб на Општина Охрид, кои постапуваат по пристигнатите пријави.
Според информациите на Центар за управување со кризи, до 17:00 часот состојбата на поголемиот дел од територијата на Република Северна Македонија е стабилна, без нарушување на редовната состојба.
Во Куманово, Липково, Старо Нагоричане, Крива Паланка, Ранковце и Кратово не е евидентирано излевање на реки ниту последици од врнежите, а надлежните општински служби ја следат состојбата. И во Скопје, Струмица, Велес, Кавадарци, Неготино, Свети Николе и Штип не се пријавени поплави или одрони, а состојбата е под контрола.
Во Струга, по пријава преку бројот за итни повици 112, евидентиран е поголем одрон на патниот правец меѓу селата Татеши и Мислодежда. За состојбата е известено ЈП „Македонија пат“, при што се преземаат активности за санација.
Во Тетово и Гостивар регистрирани се одрони на патните правци Гостивар–Стража и Тетово–Бањиче, поради што сообраќајот се одвива со повремени отежнувања. По пријави преку 112, евидентирани се и излевања на реката Вардар во селото Балин Дол, Лукавичка Река во селото Мало Турчане и Сушичка Река во селото Горно Бањице, при што е поплавено земјоделско земјиште и дел од дворови. За состојбата се известени надлежните институции, а во ХЕЦ Маврово е преземено намалување на производството на електрична енергија.
Во Општина Боговиње, поради излевање на вода надвор од постоечките канали, поплавено е обработливо земјиште, а директорот на ЈКП „Шари“ е на терен и ги координира активностите со институциите.
Во Битола и Ресен, одронот кај селото Сирхан е саниран, додека во селото Дрмени се поплавени два двора, за што се известени Општина Ресен и надлежните служби.
Од Центарот за управување со кризи информираат дека врнежите продолжуваат и дека состојбата на теренот и водостоите на реките се следат континуирано.
Фото: pexels

