Премиерот Христијан Мицкоски денеска одговарајќи на новинарско прашање, кои се последните сознанија и каква е сега состојбата, после инспекциите за трговците коишто ги зголемија цените производите, информираше дека најголемиот дел од трговците ги враќаат цените на производите, на она ниво коешто беа пред да добијат покачување.

„Утрово разговарав со господинот Дурмиши министерот за економија и труд, но и претходниве ден-два добивам информации од страна на Државниот пазарен инспекторат дека најголемиот дел од трговците ги враќаат цените на она ниво на коешто беа пред да добијат покачување. Го почитуваат укажувањето и замолницата којашто јавно ја упативме до нив. Очекувам во периодот којшто следи тоа да продолжи иако редовно со интензивна контрола од страна на Државниот пазарен инспекторат ќе се следи состојбата и доколку имаме девијантно однесување од страна на трговците ќе бидат преземени мерки. Инаку последната мерка којашто ја има Владата на располагање е да донесе повторно ограничување или лимитирање на цената, но во овој момент гледаме дека најголемиот дел од трговците она укажување ќе повторам и замолница ја почитуваат“, изјави премиерот.

Портпаролката на СДСМ, Богданка Кузеска, оценува дека по многуте скандали што се случија во изминатите шест месеци, Тошковски требаше да поднесе оставка.

„Серијата скандали и неуспеси во изминатите шест месеци ги потврдуваат неспособноста и опасноста од партизацијата на институциите од страна на ВМРО-ДПМНЕ.

Скандалите на аеродромот, бегствата на криминалци преку косовската граница, запалените возила, убиствата и секојдневните пресметки на криминални групи, па сè до послендниот скандал со пуштањето на Артан Груби, се јасен доказ.

Имаше убиство на бизнисмен кај „Мавровка“, обид за убиство на градоначалник во Арачиново, убиство на доктор во населбата Железара, пукање и убиства во Синѓелиќ, во Чаир, Батинци, Тетово, на пластичарската улица. Дестина случаи на запалени автомобили на инспектори, началници, командири, општински функционери и други“, вели Кузеска.

Како што вели, повеќето од овие случаи сè уште не се расчитени и сето ова за само шест месеци.

Наместо ред и поредок, граѓаните, додава таа, добија хаос и несигурност.

„Тошковски нема контрола над косовската граница и тоа е серозна опасност за националната безбедност. Две бегства за шест месеци, а и за двете Тошковски се обидува да се амнестира. Последниот случај со бегството на Артан Груби е само потврда дека криминалците и терористите може да го минуваат граничниот премин без проблеми. Замислете, објаснувањето на Тошковски е дека граничниот службеник се вознемирил од политичката тежина на Груби и од луксузот на возилото. Вакви апсурди и скандалозни изговори за бегање од одговорноста досега се невидени“.

Кузеска напоменува дека нема оправдување за сите овие скандали, ниту за враќањето на ВМРО-МВРО, и Тошковски треба да понесе одговорност.

Пратеникот на СДСМ, Оливер Спасовски, денес реагираше во собраниската седница откако власта најгрубо ја крши демократијата, не дозволува дебата и носи закони по итна и скратена постапка.

– Она што ни се случува денес во Собранието и ваквиот начин на функционирање, каде што во моментот ги добиваме точките на дневен ред и не известуваат во собраниските служби, и во ист тој момент се става на дневен ред, тоа го нема во ниту едно слово во деловникот, ниту пак може да се оправдаат ваквите постапки. Мислам дека и потпретседателот и претседателот на Собранието, или кој се учествуваат во креирањето на ваквите седници се однесуваат како целосно суспендирање на парламентот и на дебатата во парламентот. И ова е неприфатливо, рече пратеникот на СДСМ, Оливер Спасовски.

Тој потенцираше дека најголемиот дел од законските текстови се однесуваат на усогласувањето со законот на организацијата и работа на органите на државната управа и станува нејасно, како може, министрите, замениците министри, службите, да не знаат дека тоа усогласување треба да го направат до 31. декември.

– И денес по итна постапка, по скратена постапка, сите закони треба да се донесат. Баш денес ли гори, и сега ќе мораме да ги донесеме. Мислам дека ваквото однесување не треба да се толерира посебно од оние коишто доаѓаат овде ни делат лекции во парламентот за демократија, а на ваков начин се однесуваат и не ставаат сите во позиција во којашто целосно го рушиме нашиот систем на парламентарна демократија. Доколку власта смета дека не треба да има никаква дебата или парламент, дајте тогаш да не трошиме ниту пари на граѓаните, ниту ресурси, ниту време. Нека си измислат некој друг начин во кој ќе ги носат законите, повикувајќи се на тоа дека имаат парламентарно мнозинство и дека тоа треба така да се прави, рече Спасовски.