Соединетите држави денеска воведоа санкции против шефот на кабинетот на унгарскиот премиер Виктор Орбан поради негова наводна вмешаност во корупција во таа земја, се вели во соопштението на американското Министерство за финансии.

Антал Роган, кој е задолжен за контрола на разузнавачките служби и медиумите, е обвинет за „оркестрирање системи на корупција за контрола на стратешките сектори на унгарската економија и пренасочување на приходите во своја корист и во корист на лојалните поддржувачи на неговата политичка партија“.

Ниту Роган, ниту портпаролот на унгарската влада не одговорија на барањето за коментар.

„САД нема да се двоумат да бараат одговорни поединци, како Роган, кои ја користат моќта на нивната функција за незаконски да се збогатат себеси и нивните пријатели на сметка на нивната земја и нивните сограѓани“, рече високиот функционер на Министерството, Бредли Т. Смит.

Роган со децении е близок соработник на Виктор Орбан, водејќи ја неговата медиумска машина, како и неговите изборни кампањи. Односите меѓу Унгарија и Соединетите Држави станаа сè понапнати за време на претседателствувањето на Џо Бајден, најмногу поради блиските врски на Будимпешта со Москва и покрај војната во Украина.

Орбан беше еден од најгласните поддржувачи на новоизбраниот претседател Доналд Трамп во Европа. Трамп ќе биде инаугуриран за претседател на САД на 20 јануари.

Вербалниот конфликт меѓу Братислава и Киев се засили откако беше откажан состанокот со претставници на Европската унија, на кој денеска требаше да се разговара за безбедноста на снабдувањето со енергија.

Министрите на Украина и Словачка требаше да се сретнат во Брисел за да разговараат за последиците од истекувањето на договорот за транзит на руски гас во Европа преку украинските гасоводи, кој истече на 1 јануари, со посредство на Европската комисија.

Словачка сакаше да го продолжи договорот и да продолжи со увоз на руски гас преку Украина, но нејзините барања беа отфрлени, што доведе до закани од премиерот Роберт Фицо за преки на испораката на електрична енергија за Украина и да ја намали поддршката за бегалците кои бегаат од војната во Русија.

Само неколку часа пред почетокот на состанокот во Брисел, словачката влада објави соопштение во кое се наведува дека украинската страна се повлекла од дискусиите.

„Поради фактот што украинската страна нема да учествува… Европската комисија одлучи да го откаже состанокот“, соопшти словачката влада.

Меѓутоа, во изјава за „Политико“, украинскиот амбасадор во ЕУ, Всеволод Ченцов, рече дека тврдењата се лажни и дека состанокот бил инициран од Киев за да се разговара за заканите на Фицо дека ќе го прекине снабдувањето со електрична енергија за Украина.

„Украина го започна механизмот за рано предупредување поради заканите дека ќе го запре снабдувањето со електрична енергија, а не поради разговорите за транзит на гас“, рече Ченцов.

Според него, украинскиот министер за енергетика Герман Галушченко планирал да учествува на дискусиите во Брисел, но бил принуден да остане дома поради тешката ситуација во енергетскиот сектор. Наместо да ја прифатат понудата на Украина за онлајн состанок, претставниците на Комисијата предложија да се одложи за друг датум, додаде амбасадорот.

„Комисијата е подготвена да ги продолжи преговорите и да разговара за ефектите од завршувањето на транзитниот договор со сите вклучени страни“, изјави портпаролот на извршната власт на ЕУ за Политико. „Се уште сме во близок контакт.

Во лобирањето за продолжување на договорот за транзит на гас, Словачка и Унгарија тврдеа дека неговото раскинување може да предизвика голема ценовна криза или недостиг на снабдување. Сепак, според претставниците на ЕУ, досега овие стравови не се остварени.

Најмалку 126 лица загинаа во силниот земјотрес што денеска ги погоди подножјето на Хималаите во близина на едно од најсветите места во Тибет, објавија кинеските власти.

Земјотресот со јачина од 7,1 степен се случи на околу 80 километри северно од Монт Еверест, највисокиот врв на светот, а беше почувствуван и во соседните земји Непал, Бутан и Индија.

Земјотресот најсилно го погоди тибетскиот регион Шигаце, каде живеат околу 800.000 луѓе. Регионот е управуван од истоимениот град, традиционалното седиште на Панчен Лама, една од најважните фигури во тибетскиот будизам.

Бројни куќи во областа се срамнети со земја, покажуваат снимките од службите за итни случаи на Тибет. Ситуацијата дополнително ја комплицираат ниските температури од -6 степени, кои во текот на ноќта би можеле да паднат и до -16.

Покрај досегашните 126 загинати, повредени се и 188 лица. Далај Лама, духовниот водач на Тибет, кој беше протеран во 1959 година со илјадници тибетански бегалци кои бегаа од кинеските комунистички власти, рече дека е длабоко тажен од веста.

Повеќе од 1.500 локални пожарникари и спасувачи се испратени во погодените области, јави кинеската новинска агенција Ксинхуа.

Југозападните делови на Кина, Непал и северна Индија често се погодени од земјотреси предизвикани од судирот на индиската и евроазиската тектонска плоча.

Во 2015 година, Непал беше погоден од земјотрес со јачина од 7,8 степени според Рихтер, одземајќи околу девет илјади животи.

Непалската национална управа за намалување и управување со ризици од катастрофи соопшти дека потресите биле почувствувани во седум ридски области кои граничат со Тибет.

Многу села во непалската погранична област се ретко населени и доста оддалечени, а до нив може да се стигне само пеш.

На 20 километри од епицентарот се три града и 27 села. Таму живеат вкупно околу 6.900 жители, објави Ксинхуа.