Македонија
Со заминувањето на СДС и ДУИ од власт завршија и погубните политики во образованието, велат од ВМРО-ДПМНЕ

„Образованието е столб на општествениот развој, започнати се крупни промени за поквалитетен образовен систем. Со заминувањето на СДС и ДУИ од власт, завршија погубните политики поради кои во изминатите 7 години бројот на ученици се намали за 17 илјади, а секоја година од државата се иселуваа по 2,5 илјади млади со академско образование. Завршија манипулациите со наставниците, учениците и студентите, времето на отворање приватни факултети заради лични и партиски интереси. Заврши користењето на министерските кабинети како игралишта за фудбал и кошарка, наместо за решавање проблеми и креирање стратегии за подобро образование“, реагира ВМРО-ДПМНЕ на прес-конференцијата на СДСМ.
„За Владата предводена од ВМРО–ДПМНЕ образованието е врвен приоритет и столб на општествениот развој. Со најголем буџет досега од речиси 40 милијарди денари, оваа година фокусот е насочен кон унапредување на сите аспекти на образовниот систем. Започнати се крупните промени коишто граѓаните ги очекуваат.
Грижата за ученичкиот и студентскиот стандард е евидентно зголемена. Младите изразуваат задоволство што се вклучени во креирањето на политиките кои ги засегаат и се излегува во пресрет на нивните потреби и барања. Средствата наменети за нив се зголемени за 500 милиони денари.
Се подобруваат условите во училиштата, спортските објекти, ученичките и студентски домови. Министерството за образование и наука во моментов реализира 40-тина крупни инфраструктурни инвестиции. Започната е етапна реконструкција на државните студентски домови. СДС не успеа да ги изгради „студентските градови“ кои ги предизборно секогаш ги ветуваа. Немаа пари за младите, но имаа за личен луксуз.
Се менува законската регулатива за повеќе и подобри можности за сите граѓани, а јавноста активно учествува во процесот.
Наставниците добиваат економска сигурност. Постигнат е долгорочен договор за етапно зголемување на платите на наставниците и тој веќе се реализира. Предвидуваме зголемување од 46 до 60%, во зависност од степенот на инфлација. Реален раст на платите, не како во времето на СДС и ДУИ кога инфлацијата беше двојно поголема од процентот одвоен за наставниците.
Образованието во Македонија ќе има подобра иднина од сегашноста во која се наоѓа поради погубните политики на СДС и ДУИ. Нашите деца имаат право на квалитетна едукација и Владата предводена од ВМРО-ДПМНЕ ќе им овозможи да се развиваат како нивните европски врсници“, се наведува во соопштението на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без струја делови од Карпош и Центар

Од ЕВН Македонија АД известуваат дека денеска ( среда ) без електрична енергија ќе останат:
– во периодот од 09.00 до 11.30 часот, корисниците од ул. Анкарска бр. 31. ( општина Карпош )
– во периодот од 09.00 до 13.00 часот, корисниците од ул. Загребска. ( општина Центар )
Македонија
Сончево и потопло со мала до умерена облачност

Времето денеска ќе биде сончево и потопло со мала до умерена облачност. Ќе дува слаб до умерен ветер претежно од југозападен правец.
Минималната температура ќе биде во интервал од 6 до 17, а максималната ќе достигне од 28 до 35 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 13, а максималната ќе достигне до 33 степени.
Времето во наредните денови
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец. Во сабота попладне и во текот на ноќта кон недела ќе биде нестабилно со локален пороен дожд и грмежи. Ќе дува умерен до засилен југозападен ветер, а во недела ветерот ќе го смени правецот во северен. Потоа следува период на стабилно и потопло време.
Македонија
Министерството за одбрана реагира на соопштението на СДСМ: Лицемерно, со манипулација на факти и со целосно извртување на вистината

„Лицемерно, со манипулација на факти и со целосно извртување на вистината – така се карактеризира соопштението од политичката партија СДСМ која се обидува редовна и навремена набавка која се спроведува години наназад и се однесува на потребите на Армијата и СИТЕ угостителски објекти на Министерството и Армијата, вклучувајќи го и Домот на Армијата, авто камповите во Дојран и Охрид, како и Хотелот „Шар“ на Попова Шапка, да ја претстави во сосема поинакво светло. Првенствено, треба да се има предвид дека набавеното кафе и пијалоци во угостителските објекти кои се од отворен карактер за граѓаните, се во слободна продажба, а приходот од продажбата повторно влегува во македонскиот буџет“, реагира Министерството за одбрана на соопштението од политичката партија СДСМ.
„Впрочем, имајќи предвид дека последните седум години со Министерството раководеа кадри на оваа политичка партија, кои ги правеле ИСТИТЕ набавки, се поставува прашањето – дали тие не знаеле што прават, дали се „луксузирале“ со народните пари или сега се обидуваат да стават сомнеж на функционирањето и побарувањата од не било која, туку најценетата и најпочитуваната институција во државата – македонската Армија?
Фактите се следни:
Набавката на кафе и алкохолни пијалоци е спроведена во јавна и транспарентна постапка. Целата документација, вклучително и тендерската документација, договорите и одлуките се јавно достапни на Порталот за јавни набавки и секој граѓанин, новинар или институција може слободно да направи увид, анализа и споредба со набавките од претходните години.
Набавката се однесува на угостителски објекти од отворен тип, кои се користат во рамките на протоколарни, воени и меѓународни активности, а не за „удобност“ на министри, како што лажно се тврди.
Години наназад е спроведена ИСТА ТАКВА НАБАВКА, која оваа година (во споредба со 2023 година) е со многу помали количини, на пример: ставката за алкохолни пијалоци е намалена од 50 до 88 проценти, а жестоките алкохолни пијалоци кои претходно биле набавувани се целосно отстранети.
Сумата на договорот во 2025 година е намалена за 15 проценти во споредба со 2024 година и за речиси 40 проценти во споредба со 2023 година.
Прашањата кои се поставуваат се логични: Или раководството од СДСМ кое го предводело Министерството не знаело што работи и што набавува или политичката партија влегува во едно црно сценарио во кое се обидува да ја вметне и македонската Армија.
Ги повикуваме сите медиуми да не ги земаат предвид ваквите дезинформации кои се пласираат во јавноста особено од страна на политички партии. Борбата со дезинформациите и манипулацијата со фактите е нешто против кое треба сите заедно да се бориме вклучувајќи ги и политичките партии, а не тие да потекнуваат токму од овие кујни.
Се работи за македонските граѓани и за Македонија и токму затоа не смееме да дозволиме граѓаните да бидат излажани“, се наведува во реакцијата од Министерството за одбрана на соопштението од политичката партија СДСМ.