Вчера по барање на јавен обвинител од Основното јавно обвинителство Скопје се вршат координирани вонредни инспекциски надзори од страна на Државниот инспекторат за животна средина и општинските инспектори од општините на Град Скопје и Градот Скопје, како и од МВР и Дирекцијата за заштита и спасување на подрачјето на главнот град.

Дејствијата се преземаат во рамките на предмет поврзан со загадувањето на воздухот во Скопје, а сите надлежни институции се задолжени да изготват соодветни извештаи од извршените контроли и да ги достават до обвинителството.

Државните инспектори за животна средина треба да вршат надзори во инсталациите кои поседуваат А интегрирана еколошка дозвола и инсталациите кои поседуваат одобрен Елаборат за заштита на животната средина, а за чие одобрување е надлежно Министерството за животна средина и просторно планирање. Инспекцискиот надзор ќе биде фокусиран над инсталациите кои при извршување на технолошките процеси може да имаат удел во нарушување на квалитетот на амбиентниот водзух и во правните субјекти кои за загревање на објектите користат мазут/нафта.

Со иста задача, овластените инспектори за животна средина при Градот Скопје треба да направат направат вонредни инспекциски надзори во инсталациите кои поседуваат Б интегрирана еколошка дозвола и инсталациите кои поседуваат одобрен Елаборат за заштита на животната средина, а за чие одобрување е надлежен Градоначалникот на Град Скопје. Комуналните инспектори и комуналните редари се задолжени да вршат проверка над возилата кои излегуваат од градежните парцели дали ги мијат тркалата, дали има одлагање на отпад на јавни површини, палење на оган на отворено.

Овластените инспектори за животна средина при општините во градот Скопје треба да направат направат вонредни инспекциски надзори во инсталациите кои поседуваат одобрен Елаборат за заштита на животната средина, а за чие одобрување е надлежен Градоначалникот на општината.

Министерството за внатрешни работи врши контрола дали се почитува посебниот сообраќаен режим за тешките товарни возила, насочувајќи ги кон обиколни патишта со цел да се намали сообраќајот во урбаните средини.

Инспекторите во Дирекцијата за заштита и спасување треба да извршат контрола на правните субјекти, органите на државна управа, единиците на локална самоуправа, трговските друштва, јавните претпријатија, установите и службите за заштита и спасување од пожари на луѓето кои за загревање на просториите користат мазут/нафта дали редовно ги одржуваат горилниците и редовно ги чистат димоводните канали согласно пропишаната законска динамика.

По доставување на сите извештаи, доколку во нив се содржани елементи на кривично дело од областа на животната средина и природата, Основното јавно обвинителство Скопје веднаш ќе поведе постапки против сторителите.

Денеска во Скопје, во организација на Агенцијата за катастар на недвижности, се одржа првото советување наменето за правниците од агенцијата на тема „Актуелните дилеми и предизвици во врска со запишување на правата со сопственост во катастарот на недвижности, со посебен осврт на прашањата од практиката и работењето“. Главната цел на ова советување беше да се постигне воедначеност при постапувањето по предметите, со цел корисниците да ја имаат потребната правна заштита.

Ова е првото стручно советување ваков тип организирано од Агенцијата за катастар на недвижности. Како дел од заложбите на раководството за унапредување на стручноста на вработените и квалитетот на услугите за граѓаните, планирано е ваквиот тип на стручни советувања да станат редовна пракса и да се одржуваат неколку пати годишно.

На настанот свое поздравно обраќање имаше директорот на Агенцијата за катастар на недвижности, Иван Живковски, а во работниот дел стручни презентации одржаа професорката на правниот факултет во Скопје, Тина Пржеска, чие видување беше поткрепено со примери од практичната работа со која се соочуваат нотарите и извршителите, заедно со правниците и геодетите од Агенцијата за катастар на недвижности. На стручното советување, обраќање имаа нотарот Марјан Коцевски, извршителите Зорица Симиќ и Весна Јакимовска, како и државниот советник Елеонора Стефановска, која го стави фокусот на Законот за катастар на недвижности.

Во рамки на поздравното обраќање, директорот Живковски нагласи дека Агенцијата за катастар на недвижности работи врз основа на принципите на законитост, стручност, ефикасност, отвореност, сервисна ориентација, професионалност и одговорност за работењето и постигнатите резултати.

„Затоа, потребно е постојано учење на нови содржини и усогласување на постапките согласно со актуелните закони и правилници,“ истакна тој.

Тој додаде дека агенцијата, преку ваквите обуки, обезбедува континуирана едукација за вработените, со цел тие да овозможат поквалитетни и поцелосни услуги на корисниците.

„Агенцијата за катастар на недвижности се грижи за заедницата не само преку редовните сервиси и услуги кои ги обезбедува секојдневно, туку и преку обезбедување континуирана едукација за вработените, со која ќе им овозможи поквалитетни и поцелосни услуги на корисниците,“ додаде директорот.

Од 3 до 9 февруари пријавени се 2.880 случаи на зболени од грип и респираторни заболувања слични на грипот, што е за 5,1 проценти помалку во споредба со претходната недела.

Според податоците на Инстутот за јавно здравје, во однос на истата недела минатата годинa, сега е забележано зголемување за дури 53,6 проценти.

Од заболените оваа недела, 1.552 лица се на возраст помеѓу 15 и 64 години. 685 кај деца на возраст од 5 до 14 години, 317 кај деца на возрст од 0 до 4 години, 272 кај лица над 65 години, информира директорката на ИЈЗ, Марија Андоновска.

Најмногу пријавени случаи на грип има во Скопје по што следуваат Струмица, Битола и Свети Николе.

Во однос на вкупниот број на заболени оваа сезона, досега има пријавено 11.614 лица, што во споредба со мината година претставува зголемување од 10,2 проценти.

„Како заклучок може да се констатира дека се забележува зголемување на бројот на зболени од вируси слични на грипот, кој е над неделната граница за средна активност. Резултатите добиени покажуваат дека има широка географска активност на вирусот, а проценот на позитивност е над границата од 10 проценти пет недели по ред. Во согласност со податоците, Македонија има висок интензитет на вирусот на грип во овој период“, рече Андоновска.

Бројот на заболени е зголемен и во регионот и во другите европски земји.