Претставници на Министерството за правда учествуваа на јавната трибина за измените на Законот за безбедност во сообраќајот на патиштата и Законот за прекршоците.

Проектот „Безбеден град“ започна во октомври 2024 година со една едноставна, но силна идеја: да ги обединиме капацитетите на Министерството за правда и Министерството за внатрешни работи, да ги надминеме старите системски бариери и да креираме ефикасен и транспарентен правен процес, соопштија од министерството.

Нагласуваат дека е формирана меѓуресорска работна група предводена од Министерството за правда која имаше обврска да ги подготви измените и дополнувањата на Законот за безбедност на сообраќајот на патиштата, Законот за прекршоци и измени на Кривичниот законик со цел да се обезбеди имплементација на проектот ,,Безбеден град”.

„Со цел да се подобри безбедноста во сообраќајот, започнaвме со нови измени во Законот за прекршоците. Предвидена е посебна постапка за прекршоците од областа на безбедноста на сообраќајот на патиштата, која се однесува на прекршоците утврдени со помош на електронски системи за детектирање, како што е системот „безбеден град“. Воведуваме скратени постапки со кратки рокови за судење и засилени казни за рецидивистите, вклучувајќи забрана за управување со возило по третиот прекршок. Прекршочните налози ќе се доставуваат брзо и ефективно преку СМС и е-пошта. Сторителите ќе имаат право на судска заштита ако не ја прифаќаат одговорноста. Овие промени ќе ја подобрат брзината и ефикасноста на постапките.

Како дел од нашите стратешки приоритети, во соработка со Министерството за внатрешни работи во декември 2024 година го отворивме процесот на интероперабилност кој долго време беше задржан само на хартија. Со директно учество започнавме пат на поврзување на судовите и ЈО со МВР, нешто што беше неопходно, но не беше функционално. Ние како министерство овозможивме поврзување помеѓу МВР ,судовите и ЈО со цел да се потпишат директни меморандуми за соработка и договори за размена на податоци во електронска форма, преку Националната платформа за интероперабилност, која ќе овозможи пристап до бази на податоци на институциите, што ќе се користат во судските постапки. Ова значи дека сите релевантни институции имаат пристап до најактуелните и точни информации. Брзо и ефикасно. Без губење време. Без можности за манипулации. Без можност за корупција“.

Проектот, според соопштеното, е почеток на ефикасност и правда. Систем кој, како што велат надлежните, не само што ќе се справува со постоечките проблеми, туку ќе ги спречува новите.

Додека во Италија ист гел за туширање чини 184 денари, во Македонија истиот производ чини 399 денари. Меленото месо во Италија е 258 денари на килограм, во Македонија е 409 денари. Шери доматите се 165 денари, додека кај нас се 319 денари од килограм. Ова значи дека македонските граѓани плаќаат двојно поскапо за истиот производ, иако просечната плата е четирипати пониска од онаа во Италија, истакнуваат од Левица.

Ова, како што оценуваат, е директен резултат на неолибералните политики на Владата, која со години дозволува бесконтролен раст на цените, без да преземе никакви мерки за заштита на куповната моќ на граѓаните.

„Македонија не само што има поразително ниски плати, туку и повисоки цени за основни производи во однос на ЕУ, што ги осиромашува граѓаните! Владата дозволува: Монополска доминација на увозните ланци без контрола на маржите; Неспособност или свесно избегнување на ценовна регулација; Уништување на домашното производство во корист на увозни лобисти; Додека министерот за економија и владините функционери шетаат по луксузни вечери, народот се дави во сиромаштија и ценовен грабеж“, реагираат од оваа партија.

Бараат враќање на механизмите за контролирање на маржите на основните производи; Забрана на ценовни шокови за производи од секојдневна употреба; Намалување на ДДВ за хигиенски производи.

Левица соопштуваат од таму, ќе поддржи и ќе иницира генерален бојкот на сите ланци на маркети кои спроведуваат ограбувачки цени.

„Доста беше профитерство врз грбот на народот, време е за масовен отпор против корпорациите што ја изнудуваат последната пара од џебот на работникот. Македонските граѓани заслужуваат достоинствен живот, а не да бидат колонијална работна сила за европските капиталисти“.

На Меѓународниот ден на мајчиниот јазик, со гордост може да кажеме дека со своите државнички политики СДСМ успеа да го заштити, да го афирмира и да го унапреди македонскиот јазик, изјаваи на прес-конференција, Маја Серафимовска -Борозан, од Форумот на жени на СДСМ.

Таа рече дека македонскиот јазик денеска е признат во Обединетите нации, со потпишување на Договорот со Фронтекс тој стана дел од јазиците кои официјално се користат во Европската унија.

„Со буџетски средства ја поддржавме дигитализацијата на сите картотеки во Институтот за македонски јазик, со што трајно заштитивме 5 милиони вредни записи на македонски текстови. Го поддржавме и проектот за дигитализиран „Толковен речник на македонскиот јазик“. Го дигитализиравме и Правописот на македонскиот јазик, со што овие значајни јазични ресурси стануваат подостапни за пошироката јавност. После 24 години, за прв пат во време на владата на СДСМ обезбедивме нови вработувања на научници во Институтот за македонски јазик. Минатата година го донесовме и Законот за употреба на македонскиот јазик, со што испишавме нова страница во историјата на јазичната и културната политика во нашата држава.

Со овој закон се воведоа значајни мерки, меѓу кои и: Задолжително лекторирање на сите официјални материјали со јавно објавување на лекторите, Вработување на лектори по македонски јазик во сите јавни институции и органи на власт, Основање на Инспекторат за употреба на македонскиот јазик за контрола на примената на законот.

Но и стипендирање на ученици и студенти на сите нивоа за проучување на македонскиот јазик и отворање нови работни места за лектори во институциите, училиштата, издавачките куќи и медиумите.

Овој закон е конкретен доказ за нашата грижа за македонскиот јазик, за неговото унапредување и афирмирање“, изјави Серафимовска -Борозан.

Од СДСМ велат дека за жал, после 9 месеци власта нема ништо преземено иако има законски обврски за тоа.

Партијаата праша зошто не е основан инспекторатот за употреба на македонски јазик и зошто нема вработување лектори.

На меѓународниот ден на мајчиниот јазик СДСМ ја повикува власта да покаже барем малку грижа за македонскиот јазик и да ги преземе сите законски обврски што досега не се преземени: веднаш да биде отворен Инспекторатот за македонски јазик и сите останати обврски кои не се исполнети, додаде Серафимовска -Борозан.