Редно време е во СДС да се смират и да почнат да ја гледаат реалноста која се менува.
Венко Филипче кој е претседател на СДС, а во владата на Заев беше министер за здравство го уништи целиот здравствен систем. Сега Филипче нека се сврти околу себе и нека види дека работите се менуваат, велат од ВМРО-ДПМНЕ.

„Помина времето на СДС кога не се грижеа за граѓаните, сега е поинакво време, време на трансформација на Македонија во полза на граѓаните. За разлика од времето на СДС кога имаше долги на листи на чекање за снимање во ПЕТ центарот, денес истите се двојно намалени. Тоа е резултат на новото раководство на центарот. За разлика од времето на СДС кога акцелераторот на Онкологија не работеше сега истиот по осум години е ставен во функција, односно е на располагање на пациентите“.

За разлика од времето на СДС и Филипче, додаваат од ВМРО-ДПМНЕ, сега сите пациенти добиваат квалитетна радиотерапија согласно на стандардите на европските земји.

Со изјавата на Изет Меџити, партнерот на Мицкоски, дека планира две до три илјади вработувања на партиски кадри во администрацијата, се потврдува тезата на СДСМ дека се случува масовна партизација од страна на „Влен“ во сите институции, реагира опозицискта партија.

Душанка Георигиева Трпевски од СДСМ рече дека тоа се случува со амин и во договор со Мицкоски.

„Пред изборите ветија мерит-систем, професионализација и праведна држава, а сега веќе е нова песна. СДСМ предупредуваше дека ова се случува а сега доаѓа како директна и бесрамна потврда од Меџити. ВЛЕН ја третира државата како приватен бизнис, кој треба да го наполнат со партиски војници. Мицкоски седи и немо гледа што се случува. Но јасно е дека ова не е случајна изјава. Се поставуваат прашања – дали веќе постои подготвен план за масовна партизација на институциите пред изборите? Дали јавната администрација повторно ќе се претвори во партиски штаб наместо во сервис за граѓаните?“, рече Трпевски одговарајќи на новинарско прашање.

СДСМ побара итно стопирање на сите партиски вработувања и преиспитување дали постои организиран план за масовна партизација од страна на Меџити.

Првиот вицепремиер, Изет Меџити, на партиски настан по повод основањето на огранокот на Демократското движење во Шуто Оризари, истакна дека за една година Владата ќе реализира повеќе вработувања отколку што се направени во двата претходни мандати од другите албански политички субјекти.

„За прашањето на вработувањата, за една година ќе направиме онолку вработувања колку што тие направија за два мандати, осум години во Владата. Значи, ќе бидат стотици, ако не и 2-3 илјади Албанци во државната и јавната администрација и насекаде каде што има потреба од обновување на тие работни места, со што ќе се елиминира една пречка и проблем на нашите граѓани, за да не заминуваат во странство и да не ја гледаат својата перспектива надвор од државата“, изјави Меџити.

Тој додаде дека Демократското движење е посветено на обезбедување поправично и подостоинствено претставување на Албанците во државните институции, создавајќи конкретни можности за вработување и професионален развој.

Сашо Орданоски, кој важи за советник на Венко Филипче и СДС и сива еминенција во таа партија вчера во телевизиско интервју со најбрутални навреди го нападна претседателот на САД, Доналд Трамп, нарекувајќи го лажго и необразован. Дали Венко Филипче преку Сашо Орданоски ја нарече политиката на САД неонацистичка, прашува Бране Петрушевски, пратеник на ВМРО-ДПМНЕ.

„Се крие ли Венко Филипче зад Сашо Орданоски, и го напаѓа ли претседателот Трамп со навреди преку своите истурени играчи како Сашо Орданоски?

Дали Венко Филипче во очај, тргна по паметот на Левица и отвори војна со САД?

Очајот на Венко Филипче го проби секое дно“.

Венко Филипче да излезе, бара Петрушевски и да каже дали стои зад кажаното oд Орданоски, или ако не стои тогаш бараме јавно да се извини и откаже од него.