Христијан Мицкоски, претседател на ВМРО-ДПМНЕ, на денешниот митинг во општина Ѓорче Петров, во рамки на изборната кампања за локалните избори 2025 година со слоган „Вистинскиот избор! Твојот човек! Твоето место! За твојата иднина!“, имаше свое обраќање.

„Сакам уште една работа да одговорам околу неговата „чесност“. Ја слушам и гледам една валкана кампања која ја тераат неговите прокси играчи и дебело платени мегафони со украдените пари. Слушаме приказни за тоа колку власта била нечестна, иако 7 години беа на власт, трипати ни го чешлаа секој денар и видоа дека нема ништо. Но, ајде да зборуваме за нивната чесност. Се сеќавате ли дека Венко Филипче заборави да пријави дека во Бугарија има фирма? Се сеќавате ли дека фирми кои работеа во РЕК префрлаа пари во Бугарија на други фирми блиски до струмичкото лоби и до братот на поранешниот премиер?“, запраша Мицкоски.

Претседателот Мицкоски потсети и на ковид вакцините, кои претходната влада ги имаше набавено преку фирми од, како што вели тој, втора рака, и кои беа тројно поскапи од оригиналните цени.

„Се сеќавате ли дека набавуваше вакцини против ковид од Кина по ултра дебели провизии, преку фирми втора рака, по трипати повисока цена од оригиналната? Се сеќавате ли дека монтажната зграда која му изгoре на Филипче се градеше без одобрение, а тој нè убедуваше дека „кабелот е крив“? За сите овие работи Филипче треба да одговара. Но, кога ќе се покрене тоа прашање — молк. Зошто?“, рече Мицкоски и додаде:

„Затоа што над 80 кривични пријави и случаи, за кои имаше и јавно објавени гласови и пријави во обвинителството, се ставени во фиока. Зошто? Затоа што таму 7 години се редеа послушни партиски кадри. Седум години имаа енормни скокови во кариерата луѓе блиски до струмичкиот клан и до Венко. Затоа СДСМ не гласаше за промена на Коцевски, затоа што судството и обвинителството се последната гранка на која седи раководството на СДСМ. А кривичните пријави кои ги поднесовме се длабоко ставени во фиока и заклучени. Клучот е кај Венко“.

Мицкоски истакна дека судството во земјава мора да биде независно и мора да има правда за сите, а додаде и дека по локалните избори следуваат промени затоа што судството мора да се ослободи од партиски и криминални стеги.

„Затоа, по овие избори, лично ќе се позанимавам со ова. Затоа што судството мора да биде независно и да има правда за сите. Знам дека таму не се собрани само интересите на СДСМ, туку и на ДУИ и на сите криминалци заедно. И нека се лутат колку сакаат, но ќе кажам: не само што не ги заслужуваат платите, туку и тие им се превисоки за таа неработа. Се разбира, има исклучоци, но сите други ја прават сликата јасна — ќе има промени и одговорност во судството и обвинителството. Македонија мора да успее и да победи. Затоа овие избори се важни. Да испратиме порака дека доаѓа крај на лицемерието, крај на криминалот и дека народот е посилен од ова сидро кое ја влече државата надолу. Затоа ќе победиме и ќе работиме за заедничка иднина“, заклучи Мицкоски.

Кандидатката за Градоначалничка Маја Хеско, од трибината во Велес, ја презентираше својата програма , со која вели дека Велес повторно ќе стане град каков што заслужуваат жителите, спротивно на она што денес е реалната слика на градот.

„Велес е запоставен и заборавен од централната власт, поминува низ тешка криза и веќе сериозно заостанува во развојот во споредба со околните општини како Штип и Кавадарци, иако некогаш беше далеку пред нив. Запуштен, заборавен, нечист, со сообраќаен хаос, загадена животна средина, со запуштени паркови и со градоначалник кој го шминка само централното градско подрачје, а ги запоставува останатите делови од градот и селата“, рече Хеско.

Таа потенцираше дека сегашниот градоначалник за четири години не асфалтираше ниедна педа од улиците во индустриските зони, не направи ниту еден метар водоводни и канализациски мрежи, а проекти кои ги наследи со обезбедени европски средства не успеа да ги заврши до крајот на мандатот.

„Оваа власт лажеше и не направи ништо. Велес назадува, младите ни бегаат, градот се гуши во загадување, а селата се напуштаат. Граѓаните не смеат да ја повторат истата грешка како на парламентарните избори, кога дозволија разни неранимајковци, кои ги делат граѓаните на патриоти и предавници, да ги прелажат со лажен патриотизам и евтин популизам“, порача Хеско.

Против овој тренд на занемареност, пропаѓање и манипулации од власта, Хеско ја претстави својата визија и план за Велес.

„Имам конкретен план и програма, кои се амбициозни, но со макотрпна и чесна работа се остварливи. Ќе работам со висок интегритет, чесно и одговорно, за сите граѓани, без поделби.“

Во програмата на Хеско за градот се вклучени крупни и долгорочни проекти, како изградба на нова комунална инфраструктура, инвестиции во образованието, грижа за старите лица, дигитализација на општинските услуги, воведување јавен превоз со еколошки возила, реконструкција на спортските објекти, спас на езерото Младост, инфраструктурна револуција со мостови, заобиколници и урбано ширење на градот.

Таа истакна дека ќе биде Градоначалничка на сите граѓани, без разлика дали гласале за неа или не, без поделби по партиска, етничка, религиска или социјална припадност.

„Да се бориме за нашиот дом. Заедно до победа. Заедно, до првата жена Градоначалник на Велес“, порача Маја Хеско.

Претседателот на СДСМ, Венко Филипче на граѓанската трибина во Велес, испрати силна порака дека борбата која ја води СДСМ не е само политичка, туку човечка, врз социјалдемократските вредности за достоинството на секој човек што живее од својата плата, за младите што ја гледаат својата иднина дома, и за пензионерите што заслужуваат сигурна старост.

„Да биде јасно: оваа борба не е само за СДСМ. Ова е борба за достоинството на секој човек што живее од својата плата. Ова е борба за работничката класа, за младите што не сакаат да заминат, за пензионерите што не треба да бројат денови до следната пензија,“ истакна Филипче.

Тој нагласи дека сега е вистинскиот момент граѓаните повторно да се обединат и да ја изградат силата што ќе ја врати државата во рацете на народот.

„Да ја вратиме надежта дека во Македонија може да се живее чесно, со труд, со работа што се цени. СДСМ е движење за слобода, за правда и за еднаквост,“ рече лидерот на СДСМ.

Филипче додаде дека СДСМ е партија која секогаш била со народот и дека без СДСМ нема борба и нема слобода.

„Без вас нема СДСМ, без вас нема борба, нема слобода. Затоа, токму од Велес да испратиме порака: се бориме за нашите луѓе. Се бориме за нашите плати. Се бориме за нашата иднина,“ потенцираше Филипче.

Тој нагласи дека 19 октомври ќе биде ден кога граѓаните ќе покажат дека не се плашат и ќе испратат јасна порака дека знаат кој работи, а кој лажи и манипулира.

„Да покажеме дека Велес е социјалдемократски град – град на трудот, чесноста и солидарноста,“ порача Филипче на граѓанската трибина на СДСМ и Коалицијата „Се бориме за нашиот дом”, која се одржа вечерва во Велес.