Македонија
(Видео) Мицкоски не дава оставка: Прво ќе ги поразам сите овие кои го доведоа овој систем да биде корумпиран, а потоа ќе излеземе на избори

Премиерот Христијан Мицкоски на вонредна прес-конференција кажа дека дискотеката имала фалсификувана лиценца издадена на 13 март 2024 година, потпишана од тогашниот државен секретар.
„Се работи за лиценца за кабаре“, рече Мицкоски и додаде дека без разлика што е фалсификувана лиценцата архивскиот број е од 13.03 2024, односно на 14.03 2025 таа била истечена.
На прашањето дали ќе биде разрешен директорот на Државниот пазарен испекторат, Мицкоски возврати со прашање по која логика и кој член на Законот да биде разрешен.
„Овој документ е фалсификат, лиценца нема, правен документ објектот нема од пред повеќе од една година. Овој документ е фалсификат. Дали Пазарниот инспекторат требало да излезе вчера токму во оваа дискотека, тоа не го пишува никаде во законот ниту во надлежностите на Државниот пазарен испекторат. Последен пат таму државен пазарен инспектор се појавил во 2022 година. Зошто не констатирал тогаш пропусти и недостатоци за кои што денеска јавноста виде дека постојат во самата градба и архитектура на објектот ќе следи дополнителна одговорност и истрага. Државниот пазарен испекторат не е надлежен секој ден во годината, тој не мора 365 дена во годината да ги контролира објектите“, рече Мицкоски.
Премиерот кажа дека не е точно дека полицијата ги затворила вратите вчера.
„Полицијата не била таму да контролира дали има важечка лиценца, туку се вршела проверка бидејќи постоело сомневање дека се тргува со недозволени супстанци и дека во местото има малолетници. Полицијата доаѓа пет минути пред да се случи овој настан. Во тој момент група полицајци е со лице за кое се сомнева дека тргува со недозволени супстанци, а додека полицаецот кој загина врши легитимирање на гостите и констатира дали се или не малолетници.
Објектот е кабаре и според Законот за угостителство, кабарето не е надлежност на градоначалникот туку на Министерството за економија и има работно време од 22 до 04 часот. За се останато министерот Тошковски кажа“, одговори Мицкоски и замоли да не се шират шпекулации.
„Да не правиме естрада, покажете почитување кон жртвите“, додаде премиерот.
Во однос на тоа дали ќе поднесе оставка премиерот одговори:
„Прво ќе ги поразам сите овие кои го доведоа овој систем да биде корумпиран, а потоа ќе излеземе на избори пред граѓаните и тие се најголемата морална потврда за кредибилитетот за еден политичар“.
Тој додаде дека бил цел ден во Кочани, од шест часот утрово.
„Моралната димензија кај мене како човек секогаш постои. Немам никаква дилема. Осум месеци работам за да го поразам овој корумпиран систем. Сите ние треба да чувствуваме морална одговорност“, додаде Мицкоски.
Премиерот кажа дека не планираат вонредна состојба или вклучување меѓународни експерти во делот на истрагата.
„Повеќе од 20 луѓе се приведени или изведени пред обвинител на распит. Ќе излезат уште многу други работи кои што се катастрофални. Тоа што некој за пари фалсификувал лиценци е најмал проблем, како воопшто добиле лиценца од 2014 па наваму, па таа се пренесувала од едно, на друго на трето име, а потоа зошто е фалсификувана, па е препокривана со друга, а и двете се лажни. Тоа ќе го покаже истрагата“, рече премиерот и додаде дека ова не е единствен случај.
„Ова е само потврда дека вакви случаи има стотици, илјадници, кои на ваков начин уживаат од овој корумпиран систем“.
Тој кажа дека таа фалсификувана лиценца ја издало Министерството за економија, а потпишан е тогашниот државен секретар.
Премиерот најави дека од утре започнува голема акција во насока на проверка на сите документи, лиценци, дозволи за градба, дозволи за употреба, дозволи за работа на овие објекти.
„Јас сум убеден дека ќе најдеме стотици. Милиметар да недостасува ќе бидат затворени. Нема да има милост кон никого. Не сезона, свети сезона нека е. Овој објект е прошируван и легализирани се дополнителни квадрати“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Србија испраќа нов авион за транспорт на уште 12 пациенти од пожарот во Македонија

На барање на Владата на Република Северна Македонија, денеска продолжува помошта и евакуацијата на повредените во пожарот во Кочани, соопшти српското министерството за одбрана.
„За целите на медицинска евакуација, уште еден авион на српската армија CASA C-295 со четворица лекари и четворица медицински техничари полета за Северна Македонија. Планирано е 12 пациенти да бидат евакуирани со авион. Потсетуваме дека синоќа 12 пациенти кои беа лекувани во Воено-медицинската академија и Клиничкиот центар на Србија, исто така, се превезени со воздухопловство на Србија“.
Покрај авионот, денеска во Северна Македонија беше испратено и амбулантно возило со медицински тим од Воената болница во Ниш за да ги превезе пациентите кои ќе бидат хоспитализирани во таа болница, пренесуваат тамошните медиуми.
Шест членови на Воено-медицинската академија останаа во Северна Македонија – двајца хирурзи, анестезиолог и двајца медицински техничари – инструментари за да им пружат помош на повредените.
Со авион на српската армија во неделата вечерта во Белград беа пренесени 12 пациенти.
По трагедијата во Кочани, 18 март во Србија е прогласен за Ден на жалост.
Македонија
Само 12 лиценци за кабареа биле издадени лани, Мицкоски вели – сите што работат на диво ќе бидат затворени

Премиерот Христијан Мицкоски изјави дека минатата година биле издадени смо 12 лиценци за кабареа, а може а се заклучи колку многу клубови работат во државата. Како што рече, сите кои се без лиценци ќе бидаат затворени и ниту еден клуб нема да работи нелегално.
„Состојбата е шокантана.Дојдовме до заклучок дека во 2024 година се издадени вкупно 12 лиценци за кабареа, а сега можете да претпоставите колку клубови работат низ државата, а само 12 поседуват лиценци и тоа од тие не знаеме кои се се уште валидни бидејќи на некои претпоставувам рокот им е изминат, затоа што тие се со важност од една година, така што не очекува многу работа. Очигледно е дека некој не си ја вршел работата и сега се обидува под наводно некаква политизација да ја сокрие криминалната работа која што ја правел изминативе години додека раководел со тaа институција. Нема да има милост, од која сака нека е етничка припадност или политичка партија, ако треба за уши ќе ги влечеме од дома“, рече Мицкоски, додвајќи дека ова е масовно убиство што некој го дозволил за пари и криминал.
За клубот „Пулс“ каде што се случи пожарот, Мицкоски рече дека низ годините речиси цело време работел без лиценца, а извадил само во 2021 и 2023 година.
За кочанскиот градоначалник кој поднесе оставка, Мицкоски тврди дека тој немал никаква одговорност, но постапил правилно со оставката. Мицкоски рече дека како што Владата досега успеала да се избори со уличната мафија, мафијата со казината, мазутот, така и ќе ја порази административната мафија.
Тој им се заблагодари на соседите и земјите кои хоспитализираа пациенти, како и на домашните здравствени работници за пожртвуваноста. Ги повика и сите кои биле во или околу објектот да побараат медицинска помош, бидејќи може да има ефекти по неколку дена, па состојбата треба да се следи. Се прават надчовечки работи за сите пациенти да бидат стабилни, рече Мицкоски.
Во пожарот во клубот „Пулс“ во Кочани, животот го загубија 59 лица, а 162 се повредени. Досега се уапсени 11 лица. Претходно денес беше објавено дека починал и возачот на брзата помош од Кочани кој ги превезувал повредените. По трагедијата и трауматичниот работен ден, дошол дома и заспал, и повеќе не се разбудил, објавија повеќе медиуми.
Македонија
Петнаесетмина експерти за изгореници од странство се стигнати во земјава, ќе ги лекуваат 84-те пациенти од пожарот кои се во македонските болници

Некои од лекарите специјалисти за лекување изгореници, кои најавија дека ќе дојдат за да помогнат во лекувањето на повредените од пожарот во Кочани, се веќе во земјава. Министерот за здравство Арбен Таравари денес извести дека повредените кои беа сместени во болниците во Кочани и во Штип се донесени во Скопје. Од вкупно 135 повредени во пожарот, 51 пациент се на лекување во странство, а останатите 84 се сместени во скопските болници, односно во Клиничкиот центар „Мајка Тереза“ има 49 пациенти, во Клиничката болница „Св. Наум Охридски“ има 17 пациенти и во Градската општа болница се сместени 18 повредени.
„Веќе се стигнати доктори од повеќе држави, од Чешка, од Израел треба да стигнат, од Белград се стигнати. Околу 15 колеги веќе се во Македонија. Ќе ги распределиме по клиниките каде што има најмногу потреба за да работат со нашите колеги и да го споделат искуството“, рече денес министерот Таравари.
Директорот на Фондот за здравствено осигурување, Сашо Клековски, рече дека се работи за лекари со големо искуство во лекување изгореници.
„Докторите од Белград, Прага и Израел се воени доктори со искуство во изгореници. Кај нас и кога се случувало да имаме изгореници тоа е еден или два тешки случаи на две години, не станува збор за хируршкиот или интензивниот дел кој го владееме добро туку сепак станува збор за настани што не се со таква инциденца во Македонија за да го имаме акумулирано потребното искуство“, рече директорот Клековски.
Министерот Таравари и директорот Клековски утрово апелираа на лекар да се јават дури и оние кои се чувствуваат добро, а вечерата биле во дискотеката во Кочани кога изби пожарот за да се провери дали имаат внатрешни оштетувања на дишните органи.