Македонија
Бугарскиот патријарх се помоли за загинатите и повредените во пожарот во Кочани

Бугарскиот патријарх и митрополит софиски Даниил денеска во митрополитската катедрална црква „Света Недела“ ја отслужи Трисагијата за загинатите во трагичниот инцидент во Кочани.
На богослужбата присуствуваше и амбасадорката на Македонија во Бугарија, Агнеза Руси.
Потоа се служеше малосвет за исцелување на настраданите.
„Ваша екселенцијо, браќа и сестри, жалиме заедно со народот на Северна Македонија во овие денови на жалост за загубата на сите луѓе кои загинаа во Кочани. Се молиме за покој на нивните души и изразуваме искрено и најдлабоко сочувство за несреќата што ве снајде“.
Според неговите зборови, живееме во денови на искушенија, особено сега, за време на Великиот пост, и обично во тоа време Ѓаволот користи за да напаѓа со уште поголема сила, да предизвика уште поголеми немири, тага, збунетост и не можеме да ја знаеме длабочината на Божјата промисла која го насочува спасението на сите нас, пренесе БНР.бг.
„Во овие вонредни околности што се случуваат во нашите животи, нашите мисли, постапки и дела неизбежно ни се такво божествено просветлување за размислување и покајание. Затоа што ако нешто се случи, нема смисла да размислуваме како можевме да го избегнеме овој инцидент, но можеме да ги видиме грешките што доведоа до оваа несреќа“, рече патријархот Даниел.
„Господ да ги охрабри повредените, се молиме за нивно исцелување, а Господ нека ги охрабри и нивните најблиски да го поднесат со трпение и без горчина она што се случи и да добијат утеха и сила од Бога да го надминат ова искушение“, рече патријархот Даниил.
БТА потсетува дека тој оствари телефонски разговор со поглаварот на Македонската православна црква, г.г. Стефан. Претставникот на Бугарската православна црква изрази најискрено сочувство за трагичниот инцидент во градот Кочани, во кој загинаа над 50 лица, а повеќе од 150 беа повредени. Патријархот Даниил го увери својот брат дека православните христијани во Бугарија се молат со сето свое срце за упокојување на душите на починатите, за утеха на нивните најблиски и за брзо закрепнување на сите повредени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Со 16 минути молк почна собирот во Скопје за настраданите во пожарот во Кочани

Со 16 минути молк, солзи во очите, наведнати глави и огромна тага почна собирот во Скопје, по трагедијата со настраданите во пожарот во Кочани.
Молкот од 16 минути, симболично го означи 16 март – датум кој со црни букви ќе остане врежан во колективната меморија, кога се случи пожарот кој однесе 59 животи, а со поврди се здобија 190 луѓе од кои 20 деца.
Собраните носеа транспаренти на кои пишуваше „Не сте сами“, „Лесно запалива држава“, „Немаше да има крв ако се е по закон“.
Повик за собирот вчера упатија од здружението „Кој е следен?“, апелирајќи собраните да носат црни ленти, а протестот да не се одржува по улиците каде поминуваат возила кои ги пренесуваат повредените пациенти.
Македонија
Беќаровски за пациентите на Токсикологија: Млади страдалници раскажуваат како мирисот на изгорено човечко месо им ги парал ноздрите, а нам солзи ни навираат

Докторот Нико Беќаровски на неговиот „Фејсбук“ посочи дека на Универзитетската клиника за токсикологија хоспитализирани се дваесетина млади лица повредени од пожарот во дискотеката во Кочани кои раскажуваат низ солзи како преку нив газеле други деца, бегајќи од пламените.
„На Универзитетската клиника за токсикологија хоспитализирани се дваесетина млади страдалници од хоророт кој го доживеаа во таканаречениот кабаре бар. Од една страна среќни што сепак извлекле жива глава, задоволни што поминале со некоја полесна изгореница, сѐ уште со гареж во нивните гради“, но секој од нив има своја траорна приказна за ужасот кој го доживеале тие 10-30 минути“, посочи докторот Нико Беќаровски и додаде:
„Раскажуваат низ солзи, како преку нив газеле други деца бегајќи од пламените, како изнесувале на своите раце изгорени и јагленисени свои другари, како мирисот на изгорено човечко месо им ги парал ноздрите, како топлината им го горела ждрелото, како чучнати во вецето го чекале судниот момент и уште многу други лични трауми кои ги погодија овие прекрасни млади личности. Тие раскажуваат, нас солзите нѝ навираат“.
Истакна дека ова се дваесетина индивидуални драми, но секој од тие петстотини невини фиданки, има своја приказна своја лична траума.
„Драми кои не може да ги креира ниту Холивуд. Физичките трауми ќе зараснат или ќе остават трајни физички дефекти, но душевните трауми уште долго или доживотно ќе бидат нивен следбеник. Ноќните кошмари уште долги години ќе бидат нивен несакан ноќен придружник. ЗОШТО ??? За туѓи бели дворови, копај си црни гробови”, завршува Беќаровски.
Директорот на Клиниката за токсикологија, Андон Чибишев, утрово извести дека првично кај нив биле хоспитализирани 18 повредени во пожарот во Кочани. Поради влошување на состојбата, четворица се префрлени во Клиниката за анестезија, реанимација и интензивно лекување (КАРИЛ). Директорот Чибишев не е до крај задоволен од состојбата на четворица пациенти кои се уште се на Токсикологија, оти не е целосно стабилизирана, а останатите рече дека се стабилни.
Македонија
Митева: Ќе се обезбедат 30 милиони денари за транспорт и сместување во странство на семејствата на повредените

На територија на државата извршени се околу 50 контроли во текот на 16 и 17.03. 2025 година во угостителски објекти коишто имаат лиценца за работа која се однесува на кабаре, ноќен клуб, диско-клуб и диско-клуб на отворен простор. Согласно овие контроли на увид се приложени лиценци за вршење на угостителска дејност коишто се со важност и тие се 22 на број на цела територија на државата, но има и 15 лиценци коишто се со истечена важност. Државниот пазарен инспекторат е на терен и се проверуваат сите 22 објекти коишто имаат важечка лиценца дали ги исполнуваат минимум технички услови коишто се потребни за да ја добијат таа лиценца. Заедно со останати надлежни институции за тоа ќе излеземе со дополнителни информации откако ќе заврши целиот надзор којшто тие го прават, рече владината портпаролка Марија Митева на прес-конференција
„За сите други објекти, коишто се со истечена важност на лиценцата или немаат воопшто лиценца, Државниот пазарен инспекторат донесе забрана за вршење на нивната дејност сè додека не се утврдат сите потребни документи, додека не се провери дали воопшто поседуваат услови, минимално технички услови за вршење на дејност за истите да можат да обезбедат дополнителна лиценца. Во Министерството за економија, пак сакам да информирам дека се прави и проверка на лиценците дали повторно има некој случај со злоупотреба на архивското работење, односно за некоја лиценца да е заведена по друга основа. Сакам да ја информирам јавноста за она што го најавивме вчера, дека ќе се донесе и официјализира одлуката во однос на помошта на семејствата за транспорт и сместување. Денеска Владата ја официјализираше таа одлука и го задолжи Министерството за финансии да обезбеди средства во висина од 30 милиони денари коишто треба да ги пренесе на Службата за општи и заеднички работи“, додаде Митева.
Посочи дека се обезбедени 58 лица, односно за истите се обезбедени транспорт и сместување.
„И дека оваа одлука ќе се однесува и на оние лица коишто заминале и пред донесување на оваа одлука, ќе може ретроактивно да им се изврши дополнителна исплата. Ова се актуелните случувања коишто на денешната седница на Владата, беа соопштени како информации и ова се заклучоците коишто беа донесени. Остануваме посветени, ќе ја информираме јавноста транспарентно за сите преземени чекори“, заврши Митева.