Министерство за дигитална трансформација како надлежно за уредување на прашањата поврзани со медиумите и медиумското работење апелира на одговорност, професионалност и заштита на медиумите и медиумските работници.

Од тука велат дека недопустливи се заканите упатени кон новинари, уредници и медиуми, кои имаат цел да спречат непристрасно, отворено и квалитетно медиумско известување.

„Во споредба со многу поразвиени општества, македонските медиуми и медиумските работници покажуваат исклучителна професионалност во работата и известувањето во овие траурни моменти на колективна тага и гнев. Апелираме до надлежните институции за итна и ефикасна реакција, со цел да се утврди одговорноста на секој оној што се заканува и го попречува работењето на медиумите за да се обезбеди заштита на новинарите од вакви притисоци“, велат од Министерството.

Се додава дека овие тешки моменти се тест за целата држава, а безбедноста на новинарите е од најголема важност за  функционирањето на демократијата.

Во текот на вчерашниот ден беа упатени закани кон медиуми и новинари. До тоа дојде откога неколку регионални медиуми споделија траурни фотографии и видеа од погребот на жртвите во кочанската дискотека, а на индиски јутуб- канал (за кој многумина помислија дека е Си-ен-ен) имаше и дирктен пренос од погребот во Кочани, каде што вчера беа закопани 30 млади луѓе. Македонските медиуми, кои неуморно работеа во текот на изминатите денови, се придржуваа до протоколот во зона оддалечена 300 метри од погребната церемонија и не прикажуваа снимки и фотографии од закопот.