Венко предлага ,,црвени линии“ за заштита од францускиот предлог, кој пред една година го прогласи за победа, изјави Антонијо Милошоски, член на ИК на ВМРО-ДПМНЕ.

„Денес темата на оваа прес-конференција е ставот на Венко Филипче, претседателот на СДСМ за францускиот предлог и за резолуцијата која што тој ја нуди, со наводно патриотски црвени линии. Првата констатација е дека Венко Филипче ја менува својата политика и позиции во зависност од потребите на својот финансиски и политички ментор, Зоран Заев, а се во нивен заеднички интерес да се задржат на чело на СДСМ. На прес-конференција на 1 октомври 2024 година, Венко Филипче изјави дека францускиот предлог е победа и голем успех на нашата дипломатија. Парадоксот е толку голем, што денес една година потоа, Филипче изјавува дека се потребни црвени линии и резолуција за заштита од оваа негова во наводници прогласена дипломатска победа. Дали Венко Филипче лажеше 2024 година кога кажа дека дипломатијата победила со прифаќањето на францускиот предлог или лаже денес кога нуди предлог резолуција со црвени линии за заштита од истиот француски предлог којшто е целосно во корист на источниот сосед“, праша Милошоски.

Според него, ваквите изјави и изменети ставови на Филипче, не се порака до македонските граѓани, туку се порака до соседна Бугарија, бидејќи, како што кажа, Венко Филипче се надева дека источниот сосед или некој меѓународен актер ќе му помогне да дојде на власт, или барем да ја задржи водечката позиција во СДСМ, бидејќи знае дека нема поддршка од македонските граѓани, а нема поддршка ниту од најголемиот дел од симпатизерите или членовите на СДСМ.

Уште едно извонредно претставување на македонските средношколци – информатичари, како продолжение на уште една успешна година за Македонија на олимпијадите по информатика.

На 32-рата по ред Балканска олимпијада по информатика (БОИ 2025), која од 25-ти септември до 1-ви октомври се одржува во Удине, Италија, нашите ученици постигнаа нов значаен успех. Македонскиот тим на овој престижен меѓународен натпревар во програмирање, составен од учениците Дамјан Давков од Штип, Леонид Цуклев од Гевгелија, Виктор Максимоски од Гостивар и Владимир Грчев од Кочани, предводени од лидерите, д-р Емил Станков и Благојче Павлески од Факултетот за информатички науки и компјутерско инженерство (ФИНКИ), освои еден златен и два бронзени медали. Заедно со овие три, македонските ученици на меѓународните информатички олимпијади во текот на 2025 година досега освоија вкупно два златни, два сребрени, четири бронзени медали и четири олимписки пофалници – резултат достоен за респект, недостигнат и од многу поголеми држави од Македонија.

Балканската олимпијада по информатика (БОИ) е врвниот натпревар во програмирање за средношколци од земји кои се наоѓаат на или околу Балканскиот полуостров. Секоја земја – членка на БОИ заедницата учествува со тим составен од 4 натпреварувачи, избрани преку годишните национални натпревари во програмирање, како и лидер и заменик лидер на тимот. Учениците се натпреваруваат во решавање на алгоритамски проблеми во два натпреварувачки дена.

Главен организатор на овогодинешната БОИ е Националната асоцијација за натпреварувачко програмирање на Италија, со поддршка на Италијанската асоцијација за информатика и автоматско пресметување. На годинешното издание на БОИ учествуваат вкупно 48 од најдобрите средношколци во областа на компјутерските науки од следните земји: Албанија, Босна и Херцеговина, Бугарија, Кипар, Грција, Италија, Македонија, Молдавија, Романија, Србија, Словенија и Турција. Дополнително, како претставници на земји-гости на БОИ, во неофицијална конкуренција учествуваат и 18 ученици од Швајцарија, Украина, Саудиска Арабија и Киргистан. Во ваква силна конкуренција, златниот медал за Македонија го освои Дамјан Давков, а бронзените медали ги освоија Владимир Грчев и Леонид Цуклев. Четвртиот наш натпреварувач Виктор Максимоски исто така освои признание, олимписка пофалба.

Нашиот тим за БОИ 2025 беше избран преку целогодишен циклус натпревари, којшто редовно се организира од Здружението на информатичарите на Македонија (ЗИМ), а оваа година се одржуваше по 36-ти пат. И оваа година, циклусот натпревари беше организиран со поддршка на Факултетот за информатички науки и компјутерско инженерство, како и неколку општествено одговорни компании.

Во изјавата на Претседателот на Здружението, проф. д-р Миле Јованов се вели: „Секогаш сум среќен кога целогодишниот труд на нашите натпреварувачи вродува со плод. Дамјан и Леонид се ученици од Математичко информатичката гимназија во Скопје, кои штотуку запишаа четврта година, а Владимир како ученик кој само што заврши основно образование успеа да се пласира во овој повисок натпреварувачки ранг. Дамјан со неговиот медал и резултат застана пред 64 други учесници од олимпијадата, а Владимир го делеа само 5 поени (од можни 600) од освојување на сребрен медал. Целогодишниот труд и на членовите од Здружението, професорите и студентите од ФИНКИ, во организацијата на натпреварите и на подготовките на најдобрите ученици е исто така валоризиран со овие резултати. Искажувам благодарност за здружението Бистри умови и општина Кочани за поддршката во организирањето на подготовките, како и на компанијата Сорсикс која и сега го поддржа нашето патување во Италија.“

Следната, 33-та по ред, Балканска олимпијада по информатика (БОИ 2026), ќе се одржи идната година во Црна Гора. Последен настан пак, кој претстои до крајот на оваа година за македонските ученици – информатичари, е Јуниорската балканска олимпијада по информатика (ЈБОИ 2025), која ќе се одржи од 24-ти до 30-ти октомври во Ларнака, на Кипар.

Кандидатот за градоначалник на Куманово и лидер на Движењето ЗНАМ – За наша Македонија, Максим Димитриевски, носителката на советничката листа Ивана Ѓорѓиевска, неколку други кандидати за советници и пратеникот од ЗНАМ Даниел Стојчевски, синоќа одржаа собир со граѓани во населбата Вера Которка. На настанот отворено разговараа за приоритетните проекти во населбата, но и генерално во општината, кои треба да придонесат за дополнително подобрување на квалитот за живот на Кумановци.

На присутните им се обрати носителката на советничката листа, Ивана Ѓорѓиевска, која е и актуелен претседавач со кумановскиот Совет. Таа им се заблагодари на жителите од оваа кумановска населба за поддршката што ја давале и ја даваат во конинуитет во работењето на градоначалникот и советот. Ги повика активно да учествуваат во носењето на сите идни одлуки за доброто на општината.

„Многу е важно, секој оној што ќе почувствува дека може да даде придонес за развојот на Куманово во било кој сегмент, да дојде и да даде идеја. Затоа што во целата општина, и во селата, и во приградските населби, и во градот има голем број луѓе кои може да помогнат. Нашата заложба е сите нив да ги пречекаме со отворени раце и да им ги сослушаме внимателно што имаат да нѝ кажат“, нагласи Ѓорѓиевска.

Таа потенцираше дека е потребно Советот на Куманово да има стабилно мнозинство кое со одлуки ќе ги спроведе сите предлози од градоначалникот за реализација на проектите. Но, уште повеќе е важно во Советот да членуваат луѓе кои доаѓаат од секој дел на општината, бидејќи тие знаат најдобро да се борат за интересите на жителите во средините од кои доаѓаат.

На присутните граѓани им се обрати и кандидатот за советник Аце Трајковски кој доаѓа токму од оваа населба. Тој се заблагодари за неговата номинација на советничката листа на ЗНАМ и најави дека ќе се бори да се чуе гласот на жителите од Вера Которка. Ги повика граѓаните на 19 октомври да излезат масовно и да гласаат за поддршка на нивната кандидатска листа и за кандидатот за градоначалник Максим Димитриевски.

Вечерва во 19:00 часот, на Градскиот плоштад во Куманово, ќе се одржи промотивната конвенција на Движењето ЗНАМ, на која ќе бидат претставени кандидатот за градоначалник, Максим Димитриевски и советничката листа предводена од Ивана Ѓорѓиевска. Од ЗНАМ ги повикуваат граѓаните да присуствуваат на настанот каде ќе се промовираат и клучните проекти за подобро Куманово во наредните четири години.