Украинските сили ќе се борат дури и „со голи раце“ ако не добијат услови прифатливи за траен мир, изјави директорот на ЦИА Џон Ретклиф за време на сослушувањето во американскиот Сенат.

„Сакам да кажам дека во однос на украинскиот отпор, украинскиот народ и украинската војска се потценети неколку години. Од разузнавачка гледна точка, убеден сум дека тие ќе се борат со голи раце ако треба, ако немаат услови кои се прифатливи за траен мир“, рече Ретклиф.

Оваа изјава доаѓа во време на напорите на американскиот претседател Доналд Трамп да посредува за прекин на огнот и поширок мировен договор меѓу Русија и Украина. Ретклиф тврди дека Трамп се обидува да стави крај на војната под услови кои ќе обезбедат траен мир. Тој додаде дека ЦИА презела чекори за поддршка на дипломатските напори на Трамп.

Во договорот постигнат со посредство на САД, Москва и Киев се согласија да забранат напади насочени кон енергетската инфраструктура во Украина и Русија. Покрај тоа, завојуваните страни се согласија да ја „елиминираат употребата на сила“ и да спречат употреба на комерцијални бродови за воени цели во Црното Море.

САД и Украина првично поддржаа поширок 30-дневен прекин на огнот за време на разговорите во Џеда на 11 март, кој требаше да вклучи и прекин на копнените операции.

Една година по исчезнувањето на двегодишната Данка Илиќ во Бањско Поље кај Бор во Србија, клучните докази се уште ги нема. Телото на девојчето не е пронајдено, на местото на злосторството не се пронајдени биолошки траги, а обвинетите работници на Водовод во Бор ги повлекле признанијата и тврдат дека биле принудени.

Во меѓувреме, како што има сомнеж, Далибор Драгијевиќ, братот на еден од осомничените, бил убиен за време на полицискиот распит. Неговиот случај е префрлен во друго обвинителство, но и по 11 месеци никој не одговара за неговата смрт. Се поставува прашањето дали правдата ќе биде задоволена за случајот со исчезнатото девојче, пишува Нова.рс.

Работниците од „Водовод“ во Бор се обвинети за убиството на малата Данка, кои се товарат дека кобниот ден со службено возило го удриле девојчето, а потоа телото го ставиле во автомобил.

Според полицијата и обвинителството, Данка во еден момент се освестила, по што еден од осомничените наводно ја убил.

Иако осомничените првично го признале делото во полиција, подоцна на распитот во обвинителството ги повлекле изјавите, тврдејќи дека биле принудени со тепање во полициската станица. Оттука, обвинителството остана со задача да го изгради обвинението против нив врз други докази. Тврдењата за злоупотреба при сослушување, исто така, ја доведоа во прашање веродостојноста на досега собраните докази, додека се уште нема одговор на прашањето каде е телото на Данка Илиќ.

И покрај опсежното пребарување на Бањско поле и околните села, полицијата не успеа да најде ниту една трага за локацијата на телото. Стотици полицајци со денови ја пребаруваа областа, но безуспешно.

Тие се фокусираа конкретно на депонијата каде што осомничените претходно тврдеа дека го сокриле телото. Реонот бил пребаруван неколку пати, но без никакви траги кои укажуваат на присуство на девојчето.

Друго важно прашање на кое надлежните институции не нудат одговори е како е можно на местото на злосторството да нема биолошки траги од Данка Илиќ. Досега се анализирани повеќе од 500 примероци од автомобилите што ги користеле осомничените тој ден, но ниту на една не е пронајдена нејзината ДНК.

Покрај неизвесноста околу исчезнувањето и убиството на Данка Илиќ, контроверзно е и тоа што полициските службеници одговорни за смртта на Далибор Драгијевиќ во полициската станица Бор сè уште не се кривично гонети. Поминаа повеќе од 11 месеци од неговата смрт, а никој не е уапсен, иако обдукцијата покажа дека се работи за насилна смрт и дека има сериозни повреди.

Далибор Драгијевиќ, да потсетиме, почина во април минатата година на распит во полициската станица во Бор. Српското МВР тогаш соопшти дека му се слошило на распит и дека починал од природна смрт. Сепак, како што откри порталот Радар, Драгијевиќ бил претепан, а обдукцијата потврдила тешки физички повреди.

И покрај овие информации, до денес не е покренато обвинение ниту пак некој одговара за неговата смрт. Случајот прво го водело Вишото јавно обвинителство во Заечар, а подоцна е префрлен во Ниш. Драгијевиќ беше брат на еден од осомничените за убиството на Данка Илиќ, што дополнително ги продлабочува сомнежите и отвора голем број прашања за работата на институциите.

Поврзаноста меѓу овие случаи и фактот дека и двата се под истрага го отвора прашањето дали некогаш одговорните ќе бидат изведени пред лицето на правдата.

Пилот и две деца се спасени откако мал авион се урна во замрзнато езеро на Алјаска, соопштија властите по целоноќна потрага.

Пајпер ПА-12 Супер Крузер исчезна во неделата околу 22:30 часот по локално време во областа на езерото Тустумена и планините Кенаи, откако не се врати како што беше планирано.

Околу 12 часа откако авионот бил прогласен за исчезнат, пилот го забележал леталото на замрзнатата површина на езерото, што овозможило спасување на патниците.

„Рано утринава цивилен авион ги пронајде остатоците на источната страна на езерото Тустумена“, се вели во соопштението на државната полиција на Алјаска.

Локалните медиуми објавија фотографија од делумно потопен авион со три лица на крилата. Спасувачите ги бараа во текот на ноќта на температури под нулата, покажуваат локалните метеоролошки податоци.

Мажот и двете деца се пренесени во болница со повреди кои не се опасни по живот, се додава во соопштението.

Дејл Ајчер, еден од неколкуте локални пилоти вклучени во потрагата, рече дека патниците имале неверојатна среќа што преживеале.

„Не очекував да ги најдам, а камоли да ги најдам живи“, изјави тој за локалната телевизија КТУУ.

„Бев вклучен во неколку операции за пребарување и спасување, но тие не секогаш завршуваат вака добро“, додаде тој.