Македонија
(Видео) Јовановска: Децата со попреченост повторно оставени без личните асисенти

„Деновиве има бура од реакции на родители на деца со попреченост од истокот на Македонија на коишто им е ускратено законски загарантирнато право на лични асистенти”, истакна на прес – конференција координаторот на Сектор – социјала при партијата Левица, Катерина Јовановска.
„Согласно информациите кои ги добивме од револтираните родители, децата со попреченост од Штип, Кочани, Св.Николе и Пробиштип од јануари годинава немаат лични асистенти, бидејќи нема таканаречени провајдери, односно договорите кои претходно биле потпишани за обезбедување на оваа услуга истекле на 31.12.2024 година, а нови сѐ уште не се потпишани“, образложи Јовановска.
На прес-конференцијата, од партијата Левица јавно прашаа:
– Зошто веќе 3 месеци надлежното министерство и министерот Лимани немаат потпишано нови договори за обезбедување на услугата лична асистенција во Штип, Кочани, Свети Николе и Пробиштип?
– Како е можно од 66 активни провајдери, Министерството да не се склучи договор со ниту еден од нив за обезбедување на услугата на лична асистенција за оваа година?
Јовановска потсети дека Владата иако во повеќе наврати ветуваше дека ќе го реши пробелемот со личните асистенти, за жал, решение сѐ уште нема.
„Владата не само што не обезбеди лични асистенти за сите лица на коишто им се потребни, туку сега и оние лица со попреченост коишто имаа лични асистенти, сега повеќе ги немаат. Личните асистенти се нужно потребни на децата и лицата со попреченост за да можат непречено да ги извршуваат своите секојдневни обврски“, додаде Јовановска.
Од Левица потенцираа дека, за жал, поради мизерните услови за работа, сѐ помал број лица имаат интерес да работат како лични асистети.
Јовановска појасни дека личните асистенти се ангажираат со договор на дело и за надомест од само 17.000 денари, којшто е крајно понижувачки, но дека и тој надомест Владата не им го исплаќа редовно, што беше причина пред само неколку месеци личните асистенти да излезат на протест и да си ги бараат заостанатите надоместоци.
„Бидејќи ваквото несовесно и нетранспарентно работење на надлежното министерство предизвикува штета на и онака кревкото психофизичко здравје на децата со попреченост и на нивните родители, апелираме Владата предводена од ДПМНЕ, ЗНАМ и ВРЕДИ – во најбрз можен рок да потпише договор за обезбедување на услугата личен асистент за градовите Штип, Кочани, Свети Николе и Пробиштип, да го реши статусот на личните асиситенти и да овозможи секое дете и лице со попреченост да има личен асистент“, апелираат од Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: За време на СДСМ улица во Драчево е преименувана во Азем Морана

Срамно и дрско е СДС да зборува за темелите на македонската државност откако променија знаме, име и Устав на државата, реагира ВМРО-ДПМНЕ на обвинувањата од СДСМ.
„СДС која тоне се подолу во рејтингот меѓу граѓаните, заборава дека име на училиште го дава општинскиот совет, а не Владата. За да ги потсетиме, токму тие во време Зоран Заев како премиер и градоначалник на СДС во Скопје, во Драчево улица е преименувана во Азем Морана, откако претходно се викала Јустинијан Први. СДС говори за македонска државност, а во нивно време се променија и името, и знамето и Уставот на Македонија. Ги распродаваа државните интереси на кој стигнат за ден повеќе власт. Затоа граѓаните не им дадоа доверба и тонат секојдневно се повеќе. Подлоста на СДС оди во невидени размери, а ние како ВМРО-ДПМНЕ сме вчудоневидени на нивното однесување“, пишува во реакцијата.
Македонија
Клиниките за Токсикологија, Неврологија и Кардиологија добија нови директори

Министерството за здравство информира дека се именувани нови в.д. директори во четири јавни здравствени установи.
На Универзитетската клиника за токсикологија за в.д. директор е именуван д-р Арѓенд Имери, на местото на д-р Андон Чибишев.
На Универзитетскиот институт за клиничка биохемија за в.д. директор е именувана д-р Мимоза Бафќари-Бакији, на местото на д-р Николина Граздановска.
На Универзитетската клиника за неврологија за нов директор е именуван д-р Игор Кузмановски, на местото на д-р Фатмир Меџити.
На Универзитетската клиника за кардиологија за нов директор е именувана д-р Даница Петкоска Спирова, на местото на д-р Беким Поцеста.
Новоименуваните директори ја извршуваат оваа функција почнувајќи од вчера.
Македонија
СДСМ: Осуда за скандалозната одлука за именување на училиште во Студеничани со името на Азем Морана

Социјалдемократскиот сојуз на Македонија најостро ја осудува, како што велат, скандалозната одлука на Владата за именување на општинското основно училиште во Општина Студеничани со името на Азем Морана, според СДСМ, познат балист и соработник на фашистичкиот окупатор за време и по Втората светска војна.
„Ова именување е историски неосновано и претставува директно понижување на антифашистичката борба на македонскиот и албанскиот народ. Тоа е навреда за сите борци од НОБ, за жртвите од фашистичкиот терор, за вредностите врз кои е изградена нашата држава, слободна, демократска и европска Македонија. Преку рехабилитација на фигури поврзани со балистичкото движење што ја прават ВМРО-ДПМНЕ и ВЛЕН се нарушуваат темелите на идеологијата врз која е изградена македонската државност: антифашизмот, народниот суверенитет и демократските вредности. Според десничарската матрица, тие свесно и систематски го бришат антифашизмот од колективната меморија заменувајќи ги партизанските имиња со имиња на балисти, соработници со фашистичкиот окупатор“, велат од СДСМ.
Од партијата додаваат дека бескомпромисната борба против фашизмот не е само дел од нашето историско наследство, туку е структурна вредност на нашиот уставен поредок, на нашиот идентитет и на нашата евроинтегративна определба.
„Срамно е една влада којашто тврди дека е за Европа да дозволува вакви опасни чекори. Наместо да ги едуцира младите за вистинските херои на слободата, таа ги учи да ги слават соработниците и поддржувачките на фашистичката идеологија. Тоа е образовно и морално злосторство за едно деморкатско општество коешто се стреми кон европските вредности“, велат од СДСМ.
Партијата ја повикува Владата итно да ја преиспита одлуката, водејќи се од почитта кон борците и да поднесе итна иницијатива до надлежните институции за нејзино укинување. Од СДСМ велат дека ќе побараат и отворена расправа во Собранието, како и поддршка од Сојузот на борците и од сите прогресивни сили во државата.
„Нема да дозволиме ВМРО-ДПМНЕ и ВЛЕН да ја поткопуваат идеологијата на антифашистичката борба и македонската историја. Македонија е изградена врз темелите на антифашизмот, а не врз ревизионизам и така мора да остане“, велат од СДСМ.