Свет
(Видео) Трамп наметна царини од 20 отсто за ЕУ; Се обрати Фон дер Лајен: „Последиците ќе бидат страшни“

Претседателката на Европската комисија, Урсула фон дер Лајен, ги коментираше царините на Трамп во видео обраќање на неколку јазици: на англиски, германски и француски.
Американските царини се „тежок удар“ за глобалната економија и Европската унија подготвува контрамерки доколку преговорите не успеат, изјави претседателката на Европската комисија Урсула фон дер Лајен.
„Веќе го финализираме првиот пакет контрамерки како одговор на царините за челик“, рече таа во изјавата прочитана пред Самитот на партнерството меѓу ЕУ и Централна Азија.
The universal tariffs announced by the US are a major blow to businesses and consumers worldwide.
Europe is prepared to respond.
We'll always protect our interests and values.
We're also ready to engage.And to go from confrontation to negotiation ↓ https://t.co/WbXqsN4ZX7
— Ursula von der Leyen (@vonderleyen) April 3, 2025
„Дополнително подготвуваме нови контрамерки за заштита на нашите интереси и нашите компании, доколку преговорите не успеат“, заклучи таа.
Фон дер Лајен вели дека последиците од американските царини ќе бидат „огромни“.
„Глобалната економија ќе претрпи голема штета, неизвесноста ќе се зголеми и ќе се поттикне понатамошен протекционизам. Последиците ќе бидат страшни за милиони луѓе ширум светот, особено за најранливите земји кои сега се предмет на највисоките американски царини“, рече Фон дер Лајен.
На прес-конференција, таа додаде дека сите компании, „големи и мали“ ќе страдаат „од првиот ден“, погодени од прекини во синџирот на снабдување, поголема неизвесност и „тешка бирократија“.
„Трошоците за водење бизнис со САД драстично ќе се зголемат“, рече таа.
„Покрај тоа, се чини дека нема ред во овој хаос. Нема јасен пат низ сложеноста и хаосот што ги погодува сите трговски партнери на САД“, истакна фон дер Лајен.
Трамп претходно најави минимална царина од 10% за повеќето стоки увезени во Соединетите Американски Држави, со повисока стапка од 20% за Европската унија, што дополнително ја интензивира глобалната трговска војна која се заканува да ја зголеми инфлацијата и да го забави економскиот раст во САД и во светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Реакција од фон дер Лајен за средбата Путин – Трамп

Претседателката на Европската комисија, Урсула фон дер Лајен, објави дека денес разговарала со украинскиот претседател Володимир Зеленски.
„Разговаравме за настаните од изминатите неколку дена и следните чекори кон мировен договор, членството на Украина во Европската Унија и обновата на земјата“, рече таа.
„Ставот на Европа е јасен – ние целосно ја поддржуваме Украина и ќе продолжиме да играме активна улога во обезбедувањето праведен и траен мир“, додаде фон дер Лајен.
Таа не учествуваше во вчерашниот телефонски разговор меѓу американскиот претседател Доналд Трамп и Зеленски и лидерите на неколку клучни европски земји, вклучувајќи ги лидерите на Германија, Полска и Италија.
Денес беше потврдено и дека во следните денови ќе се одржи средба меѓу Трамп и рускиот претседател Владимир Путин. Кремљ вели дека подготовките се во тек, а Путин рече дека Обединетите Арапски Емирати би можеле да бидат едно од можните места за самитот.
Свет
Премиерот на Камбоџа го номинира Трамп за Нобелова награда за мир, испрати писмо до Осло

Премиерот на Камбоџа потврди дека го номинирал претседателот на Соединетите Американски Држави, Доналд Трамп, за Нобелова награда за мир, наведувајќи го неговото извонредно државничко творештво во прекинувањето на граничниот конфликт меѓу Камбоџа и Тајланд.
Хун Манет ја објави информацијата на Фејсбук, заедно со фотографија од американскиот претседател и писмо испратено до Норвешкиот Нобелов комитет. Во писмото се велича интервенцијата на Трамп како еден пример за неговите „исклучителни достигнувања во деескалацијата на тензиите во еден од најнестабилните региони во светот“.
„Ројтерс“ објави дека повикот на Трамп до лидерите на Тајланд и Камбоџа на 26 јули ги обнови напорите за прекинување на еден од најинтензивните конфликти меѓу двата соседа во поновата историја.
Тоа доведе до договорено примирје во Малезија на 28 јули. Двете земји се согласија во да обезбедат непријателствата да не се разгорат повторно и да поканат набљудувачи од Југоисточна Азија.
Пакистанските власти објавија во јуни дека ќе го номинираат Трамп за Нобелова награда за мир за неговата работа во решавањето на конфликтот со Индија, а израелскиот премиер Бенјамин Нетанјаху го објави истото минатиот месец.
Фото: ЕПА
Свет
Нетанјаху: Имаме намера да ја преземеме контролата врз Газа

Израелскиот премиер Бенјамин Нетанјаху денес изјави дека Израел има намера да го окупира Појасот Газа со цел да воспостави идна цивилна администрација ослободена од влијанието на Хамас, објави Анадолу.
„Имаме намера (да ја преземеме контролата врз Газа) за да ја обезбедиме нашата безбедност, да го отстраниме Хамас таму, да му дозволиме на населението да биде слободно и да го предадеме на цивилна администрација која не е Хамас и не е некој што се залага за уништување на Израел“, рече Нетанјаху во интервју за ФОКС њуз кога беше прашан дали Израел ќе ја преземе контролата врз Газа.
Тој рече дека целта не е трајно да се владее со енклавата, туку да се отстрани Хамас и да се дозволи различна локална администрација, поддржана од регионалните арапски партнери.
„Не сакаме трајно да ја држиме територијата, туку да воспоставиме безбедносен периметар“, рече тој.
На прашањето дали Израел ќе ја врати целата територија од 42 километри, како што правеше пред повлекувањето во 2005 година, Нетанјаху одговори: „Не сакаме да ја држиме. Сакаме да имаме безбедносен периметар“.
„Не сакаме да бидеме таму како управно тело. Сакаме да го предадеме на арапските сили кои ќе го управуваат правилно, без да ни се закануваат и да им обезбедат на луѓето од Газа добар живот“, додаде тој.
Израел се соочува со растечко внатрешно незадоволство поради деструктивната војна во Газа, каде што повеќе од 61.000 луѓе се убиени од октомври 2023 година.
Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со обвинение за геноцид во Меѓународниот суд на правдата поради неговата војна во енклавата.
Фото: ЕПА