Илон Маск објави дека ја напушта администрацијата на Доналд Трамп, каде што ја водеше канцеларијата за намалување на трошоците на американската влада. Стотици илјади вработени беа отпуштени или прераспоредени за време на неговиот мандат.

Во објава на неговата платформа X, Маск му се заблагодари на Трамп за можноста да ја води новосоздадената Канцеларија за ефикасност на владата, позната под акронимот DOGE (Оддел за ефикасност на владата).

Според Би-Би-Си, Белата куќа го започна формалниот процес на неговото заминување од позицијата „специјален владин службеник“ во вчера вечерта, што му овозможи да извршува федерални работи до 130 дена во годината.

Позицијата на Маск беше привремена, а неговото заминување беше очекувано, но времето е значајно бидејќи доаѓа еден ден откако тој јавно критикуваше голем законодавен проект на администрацијата на Трамп.

„Бидејќи мојот мандат како специјален владин службеник истекува, сакам да му се заблагодарам на претседателот Трамп за можноста да го намалам расипничкото трошење“, напиша Маск на X.

„Мисијата на DOGE само ќе станува посилна со текот на времето, бидејќи станува начин на живот низ целата влада“, додаде тој.

Маск претходно изјави дека е разочаран од предлогот за буџет на Трамп, кој вклучува намалување на даноците во вредност од повеќе трилиони долари и зголемени воени трошоци.

Во времето на политичката вмешаност на Маск, Тесла забележа пад од 13% во продажбата во првиот квартал, најголем во својата историја. Акциите паднаа за дури 45%, и иако делумно се опоравија, тие сè уште се околу 10% под нивната почетна вредност.

Маск во вторникот на економски форум во Доха изјави дека ќе остане на чело на Тесла најмалку уште пет години.

Украинскиот претседател Володимир Зеленски не присуствуваше на доделувањето на наградата Карло Велики во германскиот град Ахен. Според весникот „Дер Шпигел“, причината за промената на планот е заканата од руска инвазија на Суми, па претсеедателот отпатувал директно од Берлин до Киев.

Пред две години тој лично ја доби наградата Карло Велики во Ахен. Зеленски овојпат планираше да учествува на церемонијата на доделувањето, која и беше врачена на претседателката на Европската комисија, Урсула фон дер Лајен. Меѓутоа, според германските медиуми, неговите планови за патување наеднаш се промениле.

Поради сериозната ситуација во Украина, Зеленски не летал од Берлин за Дизелдорф и оттаму за Ахен, туку, според безбедносни извори, се вратил директно во Киев.

Според украински извори, Русија собрала околу 50.000 војници за можна офанзива на регионот во североисточниот дел на Украина.

Украинскиот претседател разговараше со канцеларот Фридрих Мерц и доби нови ветувања за воена помош. Зеленски се сретна и со претседателот на Сојузна Република Германија Франк-Валтер Штајнмаер и со претседателката на Бундестагот Јулија Клекнер. Околу 20:00 часот, по повеќе од единаесет часа поминати во Берлин, владиниот авион со делегацијата на Зеленски повторно полета кон исток.

НАТО ќе побара од Германија да обезбеди уште седум бригади, односно околу 40.000 војници, за одбрана на Алијансата, во рамките на новите цели за вооружување и бројот на војници за кои министрите за одбрана на земјите-членки ќе се договорат следната недела, пренесува Ројтерс повикувајќи се на извори.

Неименуван висок воен претставник рече дека целта на земјите-членки на НАТО во иднина ќе биде да обезбедат меѓу 120 и 130 бригади.

Тоа би значело зголемување за околу 50 отсто во однос на сегашната цел од околу 80 бригади, вели изворот.

Портпаролот на Министерството за одбрана во Берлин рече дека не може да потврди какви одлуки ќе донесат министрите за одбрана на НАТО следната недела, како и лидерите на НАТО на самитот во Холандија на крајот на јуни.

„Покрај тоа, целите на планирањето и капацитетот на силите на НАТО се доверливи од безбедносни причини“, додаде портпаролот.

НАТО не одговори веднаш на барањата за коментар. Во 2021 година, Германија се согласи да обезбеди десет бригади единици, кои обично броjат околу 5.000 војници, за НАТО до 2030 година, а моментално има осум бригади и гради деветта во Литванија, која ќе биде готова од 2027 година.

Се проценува дека обезбедувањето дополнителни 40.000 активни војници ќе биде голем предизвик за Берлин, бидејќи германските вооружени сили, Бундесверот, сè уште не ја исполниле целта од 203.000 војници поставена во 2018 година, а според податоците на германското Министерство за одбрана, моментално имаат недостиг од околу 20.000 редовни војници.