Пратеничката група на СДСМ и коалицијата денеска во Собранието на Република Северна Македонија, поднесе предлог-Закон за поддршка на настраданите во пожарот во дискотеката во Кочани, како и за членовите на нивните семејства. Предлогот е поднесен по скратена постапка.

„Сметаме дека после настанот што се случи на 16-ти март оваа година во дискотеката во Кочани, државата има обврска да има институционален одговор, за којшто постојано укажуваме. Мора да имаме и брз институционален одговор којшто пред сè ќе даде поддршка на семејствата на жртвите и на оние лица коишто настрадаа во пожарот во Кочани“, рече координаторот на пратеничката група на СДСМ, Оливер Спасовски.

Законот предвидува директна финансиска поддршка за семејствата на загинатите, како и низа мерки од сферата на социјалата, здравството и работните односи за сите настрадани.

„Овој чин нема да ги залечи болките, но е сигнал дека државата стои зад своите граѓани. Очекуваме поддршка од сите пратеници и политички партии – да испратиме порака на единство, солидарност и одговорност“, рече Спасовски.

Тој потенцираше дека институционалниот одговор ќе значи темелна промена на многу законски решенија, коишто ќе придонесат за поинакво функционирање на целиот овој систем.

Пратеничката група на СДСМ како одговорна и како совесна партија, понуди решение и секогаш ќе нуди решенија коишто ќе бидат од интерес на државата и на граѓаните.

„Очекувам, и ги повикувам сите политички партии, сите пратеници во законодавниот дом да се обединиме околу ова законско решение да ја испратиме таа порака на единство и на солидарност и заеднички да го изгласаме законско решение коешто ќе биде за поддршка на семејствата на повредените од несреќата во Кочани“, порача Спасовски.

Апелациониот суд Скопје информира дека зголеми дел од казните на обвинетите за несреќата кај Ласкарци, која ја предизвика неисправниот автобус на „Дурмо турс“, во која загинаа 16 лица.

„Апелациониот суд Скопје информира дека постапувајќи по кривичниот предмет КЖ- 979/24, во јавноста познат како „Ласкарци“, по одржана јавна седница на 02.04.2025 година, а по спроведено советување и гласање на нејавен дел од седницата на ден 17.04.2025 година, донесе пресуда со која ги одби како неосновани жалбите на обвинетите Д.Б.од с.Б.Г, И.Ѓ.од Г., Г.Д. од Г., Ј.Б од Г., а делумно ги уважи жалбите на обвинетите Р.М. од с.Ч, Г и М.Т од Г. и делумно ја уважи жалбата на Основното јавно обвинителство Скопје, на начин што: Пресудата на Основниот кривичен суд Скопје ја преиначи спрема обвинетите Д.Б.од с.Б.Г, И.Г.од Г., Г.Д. од Г., Ј.Б од Г. во делот на кривичната санкција, за обвинетиот Р.М. од с.Ч, Г по однос на засметувањето на мерката куќен притвор во изречената казна и висината на истата и за обвинетиот М.Т од Г. по однос на засметувањето на мерката куќен притвор во изречената казна и се осудуваат и тоа: обвинетиот Д.Б.од с.Б.Г на казна затвор во траење од 10-десет години;

Обвинетиот Р.М од с.Ч.Г. на казна затвор во траење од 10-десет години,

Обвинетиот И.Ѓ. од Г. на казна затвор во таење од 7-седум години;

Обвинетиот Г.Д. од Г. на казна затвотр во траење од 7-седум години и обвинетиот М.Т. од Г. на казна затвор во траење од 14- четиринаесет години.

Истовремено под став II од одлуката, со решение се уважени жалбите на оштетените по однос на решението за трошоци кое овој суд го укина и предметот во тој дел го врати на повторно постапување пред првостепениот суд.

Жалбите на оштетените по однос на одлуката за имотно правно барање ги отфрли како недозволени, согласно член 411 став 4 од Законот за кривична постапка“ се истакнува во официјалната информација од Апелациониот суд.

Има фирми кои работат пазарно, се борат и се натпреваруваат и има фирми кои со СДС работеа само за тендери. За овие вториве СДС се патрон. Зачудувачки е како ЈО со години молчи за тендер шемите на Стентон Градба. Ова го изјави Валентин Манасиевски, член на Централниот комитет на ВМРО-ДПМНЕ.

Тој рече дека во период од 2019 до 2023 година, Стентон Градба добиле државни тендери од 66,5 милиони евра, што е за нецели 5 милиони евра помалку од вкупните приходи на друштвото.

„Мора да се нагласи дека и остатокот од 5 милиони евра, кои не се добиени директно од тендери, поголемиот дел се наплатени како подизведувачи на други фирми исто така на тендери. Дали некои фирми се направени само за да фаќаат тендери, додека остатокот треба да се мачат и по пазарни услови да се борат за корка леб? Како е можно Стентон Градба да нема никаква друга работа освен тендери, и тоа кога СДС беше на власт да биде во топ 10 тендераџии во државата? Дали институциите не го сметаат за сомнително тоа што фирмата 4 години буквално живеела само од тендери? Фаќала работа далеку од нејзината база, а фирми кои се многу поблиску истата не ја добивале? Дали и како Стентон Градба ги добивале тендерите? Дали игра клучна улога СДС, Заев и Филипче?“, праша Манасиевски.