Македонија
Пренџов: ДУИ е партија базирана на ширење нетрпеливост, лаги и манипулации

На денешната седница на Комисијата за политички систем и односи меѓу заедниците се обрати пратеникот од ВМРО-ДПМНЕ, Љупчо Пренџов кој се обрати до Европскиот Фронт и посочи дека ДУИ веќе една година гледа се низ призма на меѓуетнички односи, шири негативната енергија меѓу граѓаните, и ја разгорува нетрпеливоста.
„Голема е одговорноста на јавно кажаниот збор, од страна на пратеник, политичар и било кој друг функционер. Јас во ова Собрание бев опозиција додека вие бевте владејачка партија изминатите четири години, ние бевме жестока опозиција но никогаш не пуштавме негативна енергија врз основа на конструкции, лаги и манипулации“, истакна Пренџов.
Пренџов истакна дека ДУИ и покрај казнувањето со опозиција од страна на граѓаните, не ја научиле лекцијата и дека ДУИ останува нереформирана партија.
„Денеска е една година 8 Мај, лани на денешен ден отидовте во опозиција, денес на денешен ден ништо не сте научиле од таа лекција, останувате нереформирана партија, останувате партија којашто не е во тек со времето, друго време е други политики се. Друга е транспарентноста, друга е сега одговорноста“, посочи Пренџов.
Пратеникот исто така запраша:
„Зошто ДУИ во изминативе 25 години бил еден од важните фактори за формирање на Влада и никогаш ама баш никогаш во преговорите и со СДС и ВМРО-ДПМНЕ не рекол да, ние ќе бидеме коалиција со вас доколку Тетово-Гостивар имаат автопат. Тоа никогаш не сте го побарале. Вие како ДУИ никогаш не сте рекле нема да влеземе во Влада доколку патот Гостивар-Кичево не се направи и не биде пристоен за возење“, дециден е Пренџов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.