Премиерот Христијан Мицкоски, денес во Скопје оствари средба со еврокомесарката за проширување и добрососедска политика, Марта Кос, која престојува во дводневна посета на земјава по повод лидерскиот самит на Европската Унија и Западен Балкан.

На средбата се разговараше за европската перспектива на регионот, со фокус на спроведувањето на реформите, реализацијата на Планот за раст на ЕУ за Западен Балкан и унапредувањето на соработката со европските институции.

Мицкоски ја истакна цврстата определба на Владата за интеграција во ЕУ, достоинствено и преку спроведување на суштински реформи во областите на владеењето на правото, економскиот развој и дигиталната трансформација.

Еврокомесарката Кос ја поздрави реформската агенда на Владата и ја потврди поддршката на Европската комисија за напредокот на Регионот на европскиот пат.

Премиерот нагласи дека средбата претставува потврда за зголемената улога на државата во регионалните и европските процеси, како и признание за новата енергија со која Владата ги води реформите и создава предвидлива и стабилна иднина за сите граѓани.

Министерот за европски прашања, Орхан Муртезани, утрово во пресрет на официјалниот почеток на Самитот на лидерите од Западен Балкан, оствари билатерална средба со европската комесарка за проширување, Марта Кос. Ова, како што информираат од неговиот кабинет, е прва официјална посета на Кос во ова својство, а средбата со Муртезани претставува потврда за континуираната ангажираност и поддршка на Европската комисија за процесот на интеграција на Северна Македонија во Европската Унија.

Во рамки на средбата беа истакнати резултатите кои Северна Македонија досега ги постигна во спроведувањето на Планот за раст, кој е носечка тема на Самитот, како и Реформската агенда 2024-2027. Еврокомесарката Кос ги поздрави посветеноста и реформските напори на Владата, посебно во делот на успешно реализираните реформи, новоусвоените закони и динамиката на спроведување на приоритетните мерки во повеќе клучни сектори како што се: управување, енергетика, зелена транзиција, дигитализација, развој на човечкиот капитал, бизнис климата и владеење на правото. Комесарката ја охрабри Владата да продолжи со оваа динамика на реформи, истовремено укажувајќи на важноста од искористување на актуелниот момент за натамошен напредок и надминување на преостанатите предизвици.

Муртезани, во разговорите со Кос, изрази уверување дека оваа Влада останува цврсто определена за европската интеграција како апсолутен стратешки приоритет, осврнувајќи се на финализирањето на Патоказот за владеење на правото и Патоказот за реформа на јавната администрација, кои се одредници за отворање на првиот преговарачки кластер „Фундаментални вредности“ и ја реафирмираше подготвеноста на Северна Македонија за продолжување на тесната соработка со ЕК во контекст на целосна реализација на овие документи. Муртезани исто така ја нагласи и отвореноста на земјата активно да се вклучи во новите иницијативи што ќе бидат разгледани на Самитот, меѓу кои се подобрување на заштитата на потрошувачите, развојот на квалитетниот туризам и продлабочување на економската интеграција со Единствениот европски пазар.

На билатералната средба, беше заеднички констатирано дека Самитот во Скопје се одржува во период кога Северна Македонија ја потврдува својата водечка улога во регионот, како прва земја што ги заврши сите правни процедури за стапување во сила на финансиските договори од Планот за раст, овозможувајќи исплата на предфинансирање од ЕУ средства во износ од 52,4 милиони евра. Соговорниците се осврнаа и на неодамнешната апликација на Северна Македонија до Инвестициската рамка за Западен Балкан (WBIF) со четири нови проекти во областите кибер-безбедност, дигитализација и унапредување на образовната инфраструктура, како и на тековното спроведување на законите и мерките од Реформската агенда.

Муртезани и Кос се согласија дека следниот период е клучен за процесот на пристапување, нагласувајќи ја потребата од јасна политичка волја, динамична реализација на реформските обврски и искористување на сите нови иницијативи кои ќе произлезат од Самитот во Скопје. Воедно, беше реафирмирана заложбата на Владата да остане конструктивен и доверлив партнер на ЕУ, со фокус на конкретни резултати во интерес на граѓаните и стабилноста на целиот регион.

Заменик-претседателот на Владата задолжен за добро владеење, Арбен Фетаи, денес оствари средба со делегацијата на Европската служба за надворешни работи, предводена од Зузана Михаљцова Шутиакова, шефица на одделението за Западен Балкан.

На средбата, Фетаи нагласи дека Владата на Северна Македонија е посветена на враќањето на владеењето на правото во земјата, преземајќи конкретни чекори во борбата против корупцијата и нејзиното спречување.

Фетаи ја информираше европската делегација за чекорите што ги презел неговиот кабинет во оваа насока, вклучувајќи го усвојувањето на Годишниот план за работа, кој е главно насочен кон борбата против корупцијата, формирањето на Меѓуресорското тело за координација на борбата против корупцијата, како и усвојувањето на новата Стратегија за финансиски истраги и конфискација на незаконски стекнат имот.

Беше разговарано и за Реформската агенда на Владата, која продолжува со полн капацитет, во согласност со целите за усогласување со законодавството на ЕУ.