Свет
(Видео) Робот изврши операција целосно самостојно слушајќи ги упатствата на хирургот
Роботската хирургија достигна историска пресвртница. Првпат робот изврши операција за отстранување на жолчното кесе целосно сам, слушајќи и реагирајќи на гласовните команди на хирургот. Роботот следеше вербални инструкции откога беше обучен преку видеа од вистински процедури.
„Оваа работа претставува огромен скок напред во однос на претходните обиди бидејќи се справува со некои од фундаменталните пречки за примена на автономни хируршки роботи во реалниот свет“, рече водечкиот автор на студијата, Џи Вунг „Брајан“ Ким.
Обуката на робот да изврши сложена хируршка процедура со десетици чекори е огромен предизвик. Не е доволно само да се знае секое дејство што роботот треба да го преземе, вклучувајќи ги и клучните предупредувања, на пример, како што е – каде скалпелот никогаш не треба да биде. Најтешкиот дел е преведувањето на сите информации во софтверски код. „Тоа е она што го прави целиот процес неверојатно сложен. Како воопшто да го запишете? Како да го претворите во код?“, објасни д-р Матијас Унберат, вонреден професор на Универзитетот „Џонс Хопкинс“.
„Може ли да научам што да правам гледајќи човек? Ако е така, работите стануваат многу поедноставни“, додава Унберат. Овој пристап се нарекува учење преку имитација и е основа на најновото истражување. Под надзор на колегата на Унберат, професорот Аксел Кригер, тим научници од Универзитетот „Џонс Хопкинс“ почнаа со обука на системот користејќи видеа од операции за отстранување на жолчното кесе извршени од човечки хирурзи на трупови од свињи.
Тимот на Кригер веќе покажа минатата година дека робот може да научи да ракува со хируршка игла, да крева ткиво и да шие по само неколку секунди обука. Но, отстранувањето на жолчното кесе е многу посложена постапка, која се состои од 17 индивидуални чекори, од препознавање на ткивото до прецизни засеци и поставување спојници знаејќи дека секој од нив носи свои предизвици.
За разлика од претходните автономни роботи, новиот систем, наречен SRT-H (Surgical Robot Transformer-Hierarchy), е нешто сосема друго.
„Како да научите робот да се движи по кој било пат, во какви било услови и да реагира интелигентно на сè што ќе му се најде на патот“, објасни Кригер.
Значи, отстранувањето на жолчното кесе не беше проблем. Откако „гледаше“ видеотуторијал со објаснувања, роботот ја изврши постапката со 100 проценти точност. Иако траеше подолго од човечки хирург, резултатите беа еднакво добри. Успешно ги повтори сите 17 чекори на осум свински жолчни кеси надвор од телото (ex vivo).
Благодарение на можностите за обработка на природен јазик, напојувани од истиот вид машинско учење, како популарниот џет џи-пи-ти, системот реагира во реално време на гласовните команди на хирургот, како што е командата „поместете ја левата рака малку налево“ и учи од повратните информации додека се добиваат. Роботот не попушти дури ни кога истражувачите намерно ја комплицираа задачата, како, на пример, со промена на неговата положба или додавање бои што го менуваа изгледот на ткивото.
„Ова е доказ дека е можно автономно да се извршуваат сложени хируршки процедури. Го потврдивме концептот и покажавме дека имитациското учење може да автоматизира толку сложена процедура со исклучително висока сигурност“, рече Кригер.
„Нашата работа покажува дека моделите со вештачка интелигенција може да станат доволно сигурни за хируршка автономија – нешто што до неодамна изгледаше како далечна иднина, но сега е докажано дека е изводливо“, заклучи Ким.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лавров: ЕУ и НАТО се обединија против Русија
Речиси сите членки на Европската Унија и НАТО се обединија за да ѝ нанесат стратешки пораз на Русија со започнување војна против Москва преку нацистичкиот режим во Киев, изјави денес рускиот министер за надворешни работи Сергеј Лавров.
Во видео порака што беше прикажана за време на церемонијата на отворање на VIII Глобален форум на млади дипломати, Лавров рече дека пред 80 години Русија ѝ нанесе решителен пораз на „нацистичка Германија, која ја обедини практично цела Европа во тоа време под своето знаме украсено со свастика“, пренесува РИА Новости.
Лавров рече дека оваа година се одбележува 80-годишнината од победата во Втората светска војна и Големата патриотска војна, како и 80-годишнината од основањето на ООН, и дека значењето на овие настани, кои беа пресвртница за целиот повоен светски поредок, не може доволно да се нагласи.
„Важно е да се потсетиме на ова денес, кога Берлин упатува неодговорни повици повторно да ја направи германската армија најсилна на континентот и кога речиси сите членки на Европската Унија и НАТО повторно се обединија за да ѝ нанесат стратешки пораз на нашата земја со започнување војна против Русија преку нацистичкиот режим, кој нелегално беше доведен на власт со државен удар во февруари 2014 година“, рече Лавров.
Тој рече дека Руската Федерација, како постојана членка на Советот за безбедност на ООН и најголемата евроазиска сила, е целосно свесна за својата посебна одговорност за зачувување на меѓународниот мир и безбедност.
Лавров нагласи дека Русија продолжува енергично да работи на создавање поправеден светски поредок, кој мора да се базира на принципите на Повелбата на ООН и мора да ја земе предвид целата културна и цивилизациска разновидност на светот.
Фото: принтскрин
Свет
Азаров: ЕУ ја претвора Украина во воена населба по должината на границата со Русија
Поранешниот украински премиер Никола Азаров изјави дека Европската Унија постепено ја претвора Украина во „воена населба“ по должината на границата со Русија, што, како што изјави, е услов за континуирана финансиска поддршка на Киев.
„ЕУ ќе ја претвори Украина во воена држава, воена населба. Само под овие услови ќе продолжи да добива финансирање“, напиша Азаров на својот Телеграм канал.
Тој додаде дека за таа цел, европските лидери „цицаат стотици милијарди од своите економии“ и носат, како што вели, ирационални одлуки што ќе имаат далекусежни последици.
Азаров нагласи дека Украина ја изгубила контролата врз сопствената политика и сега служи како „воен инструмент“ на западните структури во конфронтацијата со Русија.
Фото: принтскрин
Свет
Трета средба меѓу Зеленски и кралот Чарлс од почетокот на годината
Украинскиот претседател Володимир Зеленски денес се сретна со кралот на Велика Британија, Чарлс III, во замокот Виндзор, објави Би-би-си. Ова е трета средба меѓу украинскиот лидер и британскиот монарх од почетокот на 2025 година, што укажува на континуираната дипломатска поддршка на Лондон за Киев.
Според извори од британската влада, разговорот се фокусирал на хуманитарната ситуација во Украина, како и на прашањата за реконструкција и повоена обнова. Кралот, како што беше додадено, изразил почит кон украинскиот народ за неговата „издржливост и храброст во тешки околности“.
По приемот во Виндзор, Зеленски ќе се сретне со британскиот премиер во Лондон, каде што заедно ќе учествуваат на состанок на групата земји што ја координираат воената и финансиската поддршка на Украина.
Оваа средба следува по неодамнешните разговори на Зеленски во Париз со францускиот претседател Емануел Макрон за време на кои украинскиот лидер истакна дека „постојат реални шанси за политичко решение на конфликтот“, но дека за тоа е потребна „обединета позиција на западните сојузници“.
Во последните неколку дена Зеленски ја продолжи својата дипломатска турнеја во европските престолнини обидувајќи се да обезбеди долгорочна поддршка и зголемување на финансиската помош во време кога западната јавност се соочува со зголемен воен замор, анализира медиумот.
Фото: принтскрин

