Свет
Русија и Украина почнаа мировни преговори во Истанбул – Кремљ: Ќе бидат тешки

Русија и Украина денеска ја почнаа третата рунда директни мировни преговори во Истанбул, јавува руската новинска агенција ТАСС.
Делегациите на двете земји веќе пристигнаа во главниот град на Турција, но и двете страни предупредуваат дека разговорите нема да бидат лесни.
Од Кремљ порачаа дека процесот ќе биде сложен, а украинскиот претседател Володимир Зеленски изјави дека неговите очекувања не се високи, бидејќи разговорите за прекин на огнот не се на дневен ред.
Според Зеленски, денешната средба треба да се фокусира на теми како враќањето на украинските воени заробеници и децата кои, како што тврди Киев, биле одведени од Русија. Покрај тоа, ќе се разговара и за можноста за организирање лидерска средба на претседателско ниво.
Претходните две рунди преговори, одржани во Истанбул на 16 мај и 2 јуни, не донесоа напредок во однос на прекин на огнот. Единствен резултат од тие средби беше договор за размена на заробеници и враќање на телата на загинатите војници.
Мировниот процес, според дипломатски извори, бил поттикнат и од американскиот претседател Доналд Трамп, кој неодамна јавно го критикуваше Кремљ за недоволен ангажман околу прекинување на војната, најавувајќи и нови санкции доколку нема резултати.
Украина бара итен и безусловен прекин на огнот како основа за натамошни разговори. Русија, пак, и натаму стои на своите барања – вклучувајќи целосно повлекување на украинските сили од источните територии што Москва ги анектираше.
Руската делегација повторно ја предводи претседателскиот советник и поранешен министер за култура, Владимир Медински. Од украинска страна, делегацијата ја води поранешниот министер за одбрана Рустем Умеров, кој сега е на чело на Советот за национална безбедност и одбрана.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин: Тони Блер можеби не е познат како ангел чувар на мирот, но е искусен политичар

Рускиот претседател Владимир Путин вчера го поддржа мировниот план на американскиот претседател Доналд Трамп за Блискиот Исток.
Најважниот елемент од мировниот договор во регионот останува решение за две држави меѓу Израел и Палестина, нагласи Путин на настан на политичкиот клуб Валдаj во Сочи. Сепак, подготвен e да му даде шанса на моделот на Трамп, рече тој. „Поранешниот британски премиер Тони Блер, кој е назначен за член во привременото меѓународно тело за мониторинг на Газа, можеби не е познат како ангел чувар на мирот, но е искусен политичар“, рече рускиот претседател.
Важно е што и Израел и Палестинската самоуправа и милитантната палестинска организација Хамас се согласија со решението, додаде тој. Трамп предложи прекин на огнот во Појасот Газа како дел од мировниот план од 20 точки што го презентираше во Вашингтон пред пет дена.
Планот вклучува целосно разоружување на Хамас и итно ослободување на сите преостанати израелски заложници што ги држи Хамас во замена за стотици палестински затвореници, како и повлекување на израелската војска од Појасот Газа.
Хамас нема да има никаква улога во управувањето со крајбрежниот појас, а на Израел му е забрането и да анектира територија. Наместо тоа, Појасот Газа ќе биде управуван од преодна влада на палестински технократи под надзор на идни меѓународни сили за стабилизација.
Германија, Франција и Обединетото Кралство, како и министрите за надворешни работи на неколку арапски држави, вклучувајќи ги Катар, Египет, Јордан, Обединетите Арапски Емирати и Саудиска Арабија, исто така изразија поддршка за планот.
фото: принтскрин
Свет
(Во живо) Последниот брод сè уште плови кон Газа, Израел објави забрана за влез

Последниот брод во меѓународната флотила за помош за Газа го продолжи своето патување рано утрово, според организаторите, откако околу 40 бродови беа пресретнати од Израел, кој се подготвува да ги протера пропалестинските активисти на пат.
„Маринет сè уште плови“, објави организацијата на социјалните мрежи доцна во четвртокот, додавајќи дека очекува наскоро пресретнување. „Тие се свесни што ги чека“, соопшти организацијата.
Бродот бил на околу 120 километри од брегот на Газа во 6 часот наутро, според геолокацијата споделена на веб-страницата на флотилата.
„Доколку се приближи, неговиот обид да влезе во активната борбена зона и да се обиде да ја пробие блокадата ќе биде спречен“, соопшти израелското Министерство за надворешни работи во четвртокот.
Повеќе од 400 активисти на 41 брод од флотилата беа уапсени за време на операцијата што траеше околу 12 часа, изјави израелски функционер во четврток вечерта.
„Тие се безбедно префрлени во пристаништето Ашдод за обработка од страна на израелската полиција“, додаде тој под услов да остане анонимен.
Флотилата „Глобал Сумуд“, во која се вклучени политичари и активисти како што е Грета Тунберг од Шведска, тргна од Шпанија во септември со цел да ја пробие израелската блокада на Појасот Газа.
Флотилата се претставува како „мирна и ненасилна хуманитарна мисија“.
фото: принтскрин
Регион
(Видео) Србија под снег: делови од земјата затрупани, патиштата блокирани

Почетокот на октомври донесе вистински зимски услови во делови од Србија. На Копаоник паѓа снег од синоќа, а и други делови од земјата побелеа, вклучувајќи ги Ивањица и Голија, што предизвика први проблеми во сообраќајот, објавува Нова.рс. Денес ќе биде постудено од вчера, со повеќе дожд и снег.
Паднати дрвја и блокади на патиштата
На социјалните мрежи се појавија видеа кои сведочат за последиците од првиот снег во сезоната. Во близина на Ивањица, дрвја паднаа на патиштата под тежината на снегот, блокирајќи го сообраќајот. Видео објавено на Инстаграм ги прикажува граѓаните како сами отстрануваат паднато дрво за да го расчистат патот.
Поради зимските услови на патот, на возачите им се препорачува да бидат исклучително внимателни и да ги одложат непотребните патувања.
фото: принтскрин