Фондот на пензиското и инвалидското осигурување на Северна Македонија потпиша договор за електронска размена на податоци со Фондот на пензиското и инвалидското осигурување на Република Српска.

Директорот на Фондот на ПИОСМ, Никола Мемов, рече дека со потпишувањето на овој договор се заокружува регулирањето на размената на податоците од оваа област со државите од поранешна Југославија и претставува чекор напред во соработката што, секако, е во интерес и на корисниците на услугите на Фондот. Тој додаде дека соработката со Фондот на Република Српска во наредниот период треба да се прошири со размена на други податоци од интерес на двата фонда, а со што ќе се олесни и забрза процесот на остварувањето на правата од оваа област.

Директорот на Фондот на ПИО на Република Српска, Младен Милиќ, истакна дека потпишувањето на договорт е заоркужување на еден процес што треба да придонесе во точноста на податоците што се користат и разменуваат. Тоа, како што потенцира Милиќ, ќе овозможи да се исклучат можните грешки и да се подигне квалитетот на услугите за осигурениците од двете земји.

Договорот предвидува размена на податоци потребни за редовна исплата на пензија поради спречување неосновани исплати поради смрт на корисникот на пензија меѓу Фондот на ПИОСМ и Фондот на ПИО на Република Српска. Со него се регулираат и целта, начинот на размена, обемот и видот на податоците што се разменуваат и управувањето со нив, како и нивната запштита.

На средбата беше потпишан и технички протокол за спроведување на договорот од страна на Нехат Мустафа, директор на секторот за информатика, и Велибор Максимовиќ, помошник-директор за информатичка технологија. Исто така, беа назначени и контакт-лица за непречена и навремена комуникација за сите прашања што ги покрива.