Владата демантира дека изборниот процес ја блокира исплатата за 400 лица кои беа ангажирани во гаснењето на пожарите.

Фактите како што додаваат се едноставни и непобитни, и прецизираат дека ова е првпат во историјата на државата да се имплементира мерка за вработување која целосно ги искористува расположливите ресурси, со цел да се заштитат граѓаните од природни катастрофи и да се подобри животната средина.

„Што се однесува до исплатата на учесниците за оваа мерка која е наведена како 6.2 во оперативниот план и е наменета за заштита од пожари, апсолутно нема никаква поврзаност помеѓу распишувањето на локалните избори и исплатата на средствата, од причина што средствата се обезбедени и не станува збор за никакво вонредно плаќање.

За лицата кои се вклучени во оваа мерка ве информираме дека беа ангажирани на 08.08.2025 година, документацијата (извештајот за редовност) за исплата од страна на организаторот е веќе во тек и ќе биде испратена до центрите за вработување по што ќе следи и исплатата.

За разлика од СДС, ние работиме отчетно и транспарентно.

Ние сме тука да носиме конкретни решенија, додека опозицијата ќе продолжи да лаже и да се обидува да го наруши јавниот мир со невистинити приказни“.

Според Владата, сите обиди за политички саботажи нема да ја засенат нивната посветеност да работат за подобар живот за сите граѓани.

Министерот за здравство, Азир Алиу, синоќа се обрати на отворањето на 10 конгрес на Македонското стоматолошко друштво, на тема „Иднината на совршеност во стоматологијата: уметност на науката, знаењето и вештините“.

– Јас не сум лекар, јас сум инженер, токму тоа ме научи здравството да го гледам како комплексен систем, со елементи кои мора да функционираат поврзано, со транспарентност, ред и доверба. Систем во кој нема место за импровизации и каде не се прифатливи компромисите на штета на пациентот. Во светот, стоматологијата оди напред со невидено темпо: вештачката интелигенција, роботиката, дигитализацијата и телемедицината целосно го менуваат начинот на кој му се служи на пациентот. Иднината е веќе тука и ние имаме обврска да бидеме дел од неа, порача Алиу.

Во своето обраќање, тој истакна дека за бидеме дел од таа иднина, мора да ги изградиме темелите врз професионализам, интегритет и одговорност. Според него, Конгресот е доказ дека нашите стоматолози имаат волја и капацитет да постават нови стандарди, да ја освојат и задржат довербата на граѓаните и да бидат активен дел од здравствената трансформација што се одвива во земјата.

„Како министер за здравство, сакам да истакнам дека нашиот пат е јасен, никаков компромис кога станува збор за квалитетот на здравствената грижа и довербата на граѓаните. Ќе ја поддржиме стоматологијата со политики кои ќе го стимулираат образованието, иновацијата и транспарентноста. Само така можеме да изградиме силен и правичен систем за сите, истакна Алиу.

Мирисот на традиционалната пастрмајлија и музичката програма, ќе го одбележат новото издание на манифестацијата „Штипска пастрмајлијада“, што почна денес.

Градот и годинава се очекува да биде собирно место за илјадници посетители од целата држава, кои доаѓаат да уживаат во гастрономските специјалитети и во забавната програма.

Стартот на новото издание на манифестацијата го означи џиновската пастрмајлија, која оваа година е рекордно голема. Николче Малинов кој традиционално ја пригoтвува џиновската пастрамајлија, претходно изјави дека за првпат ќе се употреби 17 килограми свинско месо, најмногу до сега споредбено со годините наназад.

На отворањето присуствуваше и потпретседателот на Владата и министер за транспорт, Александар Николоски, кој нагласи дека ваквите настани се значајни за развојот на локалната економија.

„Навистина е чест да се биде денеска во Штип на отворањето на овој голем настан за кој живее овој град и целиот регион. Ова значи многу посетители и влез на неколку милиони евра директно во локалната економија, што е задвижување за целото стопанство и нешто што треба да биде поддржано“, изјави Николоски.

Тој додаде дека Владата продолжува да го поддржува Штип преку бројни капитални проекти – од изградба на брана на Отиња и урбанизација околу Кежовица, до подобрување на патната, водоводната и канализационата мрежа. Според него, покрај универзитетски и бизнис центар, Штип има потенцијал да стане и туристички центар во источниот дел на државата.

На шеталиштето се поставени 10-тина штандови со пастрмајлија. Утре, во склоп на манифестацијата, ќе настапи балканската мега ѕвезда Дино Мерлин, заедно со македонските ѕвезди Елена Ристеска и Владо Јаневски. Концертот со почеток од 20:00 часот, утре, ќе се одржи на градскиот стадион во Штип.