Кандидатот за градоначалник на Чаир, Бујар Османи, на прес-конференција ја претстави својата стратегија за решавање на хроничниот недостиг од паркинг-места, предупредувајќи дека општината е пред целосен колапс.

„Чаир е задушен, претворен е во општина на автомобили. Едноставно нема простор, улиците се претворени во паркинзи, тротоарите се претворени во паркинзи, и веќе нема слободни тротоари во Чаир. Дури и парковите почнаа да се полнат со автомобили. Граѓаните секојдневно живеат во анксиозност и стрес, а од разговорите со нив дознавам дека некои дури размислуваат да се иселат поради овој хаос“, изјави Османи.

Тој ја претстави краткорочната стратегија, која предвидува создавање паркинг-зони во секое маало, креирана во соработка со реномираниот светски архитект, Мишел Ројкинд.

„Во урбанизираните делови, во секоја улица, во секое маало да има најмалку по два паркинга: едниот бесплатен, другиот со наплата. Во првиот случај, општината ќе купи двор, куќа или простор и ќе го претвори во бесплатен паркинг.

Во вториот случај, граѓаните можат да ги отстапат своите дворови или куќи, а општината ќе им помогне да ги претворат во паркинзи со кои ќе стопанисуваат, во форма на приватно или јавно-приватно партнерство со општината, и тие ќе бидат со наплата“, појасни Османи.

Овој модел најдобро може да се примени во урбанизираните делови како што се Серава, Гази Баба, Дижонска, Дуканџик и Тенеќе Маало кои се посебно задушени од автомобили и потребно е нивно ослободување.

„Ја измапиравме целата карта на Чаир, ги идентификувавме зоните и решенијата што може веднаш да се применат. Време е Чаир да стане општина на луѓето, а не на автомобилите“, порача Османи.

Кандидатката за градоначалник на Град Скопје од редовите на СДСМ, Каја Шукова, денеска беше во посета на Општина Аеродром каде зборуваше за неисполнетите ветувања за изградба на парк, но и ја најави својата визија за позелено и поурбано Скопје.

„Денеска се наоѓаме на локација каде што требаше да никне ултрамодерен парк. За жал, и по четири години, оваа површина остана необработена. Аеродром, некогаш една од најзелените општини во Скопје, денес е во запуштена состојба“, изјави Шукова.

Таа нагласи дека запоставеност на зеленилото не е само локален проблем на Аеродром, туку за жал, опфаќа голем дел од скопските општини.

„Мојата визија е Скопје што позелено, но и со одржување не само со градење на нови паркови кои потоа ќе бидат оставени на забот на времето. Затоа во мојата програма предвидуваме изградба на 15 нови паркови за 15 месеци, но и сериозна рехабилитација на постојните зелени површини“, потенцираше Шукова.

Парковите, како што најави, нема да се градат исклучиво во центарот, туку и во урбаните населби и периферијата таму каде што најмногу недостига зеленило.

„Имаме мапирање на 15 локации дел ќе бидат нови паркови, дел целосно ќе се ревитализираат. Најмногу ќе се фокусираме таму каде што урбанизацијата е најголема и каде што зеленилото најмногу фали“, додаде таа.

Шукова нагласи и дека унапредувањето на зелената инфраструктура е директно поврзано со намалување на загадувањето.

„Знаеме дека Скопје е меѓу најзагадените градови во Европа. Зелените површини се природен филтер за ПМ-честичките и мора да станат приоритет. Парковите не се луксуз тие се неопходност за здравје и квалитет на живот“, рече таа.

Во програмата на Шукова се предвидени и мерки за поддршка на домаќинствата во борбата против аерозагадувањето, вклучително и бесплатни филтри за оџаци.

Ѓорче Петров добива пет нови детски градинки, изјави кандидатот за градоначалник на Општина, Ѓорче Петров, од ВМРО-ДПМНЕ, Александар Стојкоски.

„Нова детска градинка во Дексион. Проект којшто го најавувам подолго време, а денеска го потпишав Договорот, почнуваме со изградба веднаш. Покрај оваа детска градинка, во моментов ја градиме и детската градинка во Стопански двор, тоа е во напредната фаза. Со тоа го зголемуваме капацитетот за сместување за дополнителни најмалку 220 деца, на ниво на општината Ѓорче Петров. Дополнително, во нашата изборна програма ветувам изградба на уште три детски градинки, вкупно 5 детски градинки во наредниот мандат. Две во населбата Диво Маало, и во близина на Македонска војска и една за жителите на населбата Александрија“, рече Стојкоски.