Во срцето на Ѓорче Петров на локација веднаш наспроти новата општинска зграда ќе ја изградиме првата катна гаража во Ѓорче Петров, изјави кандидатот за градоначалник на Општина Ѓорче Петров од ВМРО-ДПМНЕ, Александар Стојкоски.

„Катната гаража ќе биде со капацитет од приближно 360 до 390 возила, ќе вклучува подземен паркинг кој ќе биде со големина од 1.800 метри квадратни и надземен паркинг со површина од 7.200 метри квадратни. Дополнително, овој современ и урбан објект ќе поседува и деловен простор од 2.000 метри квадратни“, рече тој.

Олимпискиот медал направи Бутел да биде најпозната општина во Македонија, вели кандидатот за градоначалник на Општина Бутел од ВМРО-ДПМНЕ, Дарко Костовски.

„Спортот прави чуда и создава историја. Во Бутел направивме спортска револуција, изградивме 5 спортско-рекреативни центри, направивме 13 спортски терени, 12 игралишта за деца, реконструиравме 2 училишни сали, директно помагаме на спортските клубови. Доделуваме над 200 стипендии за најдобрите спортисти од општината. Спортот раѓа здрава младина и дисциплина. Дисциплината создава подобро општество. Спортот ќе продолжи да биде еден од моите врвни приоритети“, рече Костовски.

„ВМРО-ДПМНЕ во Аеродром излажа за 4 градинки, сега ветува 5 – лагата ја менуваат со поголема лага Во изминатите четири години, ВМРО-ДПМНЕ во Општина Аеродром не изгради ниту една од ветените четири нови градинки. Овие градинки беа прв приоритет во програмата на Муцунски и Митески, со кои ја бараа довербата на граѓаните – нови објекти во Острово, Мичурин, Лисиче и Долно Лисиче“, реагира СДСМ на соопштението на ВМРО-ДПМНЕ.

„Четири години подоцна, резултатот е јасен: ниту една од овие ветени градинки не е изградена. Денеска, Митевски по стапките на Муцунски пред граѓаните настапува со поголема лага: дека ќе изгради 5 нови градинки.

Ваквото однесување на ВМРО-ДПМНЕ во општина Аеродром е безобразно и срамно! Над 700 деца секоја година остануваат на листа за чекање поради недостиг на капацитети.

Затоа го прашуваме в.д. градоначалникот Дејан Митески и неговиот претходник Муцунски:

Каде е ветената градинка кај ОУ „Браќа Миладиновци“? Каде е ветената градинка во дворот на ОУ „Блаже Конески“? Каде е ветената градинка кај последна 17-ка на Тодор Чангов?

Каде е ветената градинка во Долно Лисиче? Полни усти со ветувања пред изборите во 2021 година, 4 години подоцна уште поголеми ветувања, а нула реализација.

Граѓаните на Аеродром не заслужуваат вакви лажни проекти и лажни ветувања. Времето на ВМРО-ДПМНЕ и Дејан Митески во општина Аеродром, заврши!“, се додава во реакцијата на СДСМ.