Биљана Ивановска, кандидатка за градоначалничка на Општина Центар од коалицијата Шанса за Центар, поддржана од граѓанската платформа Независни заедно, заедно со носителите на советничките листи за Општина Центар – Јане Димовски и за Град Скопје – Јана Белчева-Андреевска, денес одржаа теренска прес-конференција посветена на иднината на Спортско-рекреативниот центар „Кале“.

„Во нашата општина Центар, здравјето ќе биде врвен приоритет. Спортот е предуслов за здрав живот и затоа ќе биде достапен за секој жител. СРЦ Кале е пример за објект кој со децении пропаѓа поради штетни договори и несоодветно управување. Ревизорските извештаи бараат Владата да преземе мерки за заштита на државниот имот, а ние како општина ќе се заложиме, заедно со централната власт, Кале повторно да се стави во функција и да стане дел од современите содржини за спорт и забава“, изјави Ивановска.

Во визијата на тимот, како што беше појаснето, вложувањето во спортот е оправдано само ако тој е достапен за сите жители, особено за младите. „За нас спортот не смее да биде луксуз. Нашата должност е да обезбедиме услови за лесен пристап и модернизација на спортските објекти, со широки програми за масовен спорт. Кале ќе го отвориме за училиштата, универзитетите и сите граѓани, а општината ќе обезбеди соодветна опрема“, додаде таа.

„Средства има, ако приоритетите се постават правилно. Нашата цел е во управувањето да важат нови вредности – грижа за граѓаните, а не профит за поединци и партии“, порачаа од Шанса за Центар.

Носителката на советничката листа на Независни заедно за Град Скопје, Јана Белчева Андреевска, истакна дека тесно ќе соработуваат градските власти со општинските за повторно да се искористи потенцијалот на СРЦ Кале и на околината.

„Ова е подрачје кое е потенцијал за целиот град. Капацитетот конкретно а овој простор е 3000 луѓе кои може да учествуваат во спортско-рекреативни активности. Мора да биде приоритет и на градот со општината да може да се возобнови не само како објект туку и како целосно решение за просторот кој ќе им служи на граѓаните и кој нема да биде управуван за тесни интереси или за политичка поделба меѓу малкумина моќници“ вели Белчева Андреевска.

Носителот на советничката листа на граѓанската иницијатива Шанса за Центар – Независни заедно, Јане Димески, се осврна на проблемот со дивата депонија која, како што оцени е на само неколу стотини метри од зградата на владата, како резултат на недостатокот на политики за справување со отпадот и на ниво на општина Центар и во градот Скопје.

„ Ова е резултатот кога им давате на работникците кои ви реновираат по дома за неколку стотки да ве ослободат од отпадот. Тој завршува тука и на слични локации. Ќе направиме постојани локации за собирање на кабастиот отпад. Просторот како овој тука бараат постојан видео и човечки надзор за да се спречи ова нелегално фрлање на отпад, најмалку јавното претпријатие ПОЦ да добие компостара за да не ги носи лисјата и гранките кои ги собира по општината на депонија, туку да ги компостира, ни треба драстично проширување на начинот на селекција на отпадот од граѓаните наместо овој средновековен начин кој го имаме во моментот“ вели Димески.

Од Горно Лисиче, го најавуваме проектот за изградба на 110 км топлификациона мрежа која ќе ги опфати населените места Долно Лисиче, Горно Лисиче и населба Лисиче, изјави кандидатот за градоначалник на Општина Аеродром од ВМРО-ДПМНЕ, Дејан Митески.

„Решаваме еден децениски проблем, проблем којшто не значи само затоплување на домаќинствата, туку и намалување на загадувањето на воздухот во зимскиот период. Градиме инфраструктура согласно потребите на граѓаните“, рече тој.

Претседателот на СДСМ, Венко Филипче, изјави дека спиновите и лагите со кои се служи премиерот и ВМРО-ДПМНЕ изминатиот период се резултат на целосна безидејност и обид да се сокрие неспособноста на власта да испорача резултати.

„Спиновите и лагите со кои што се служи премиерот и ВМРО-ДПМНЕ изминатиот период се резултат на една целосна безидејност што друго да направат. Немаат што да прикажат, немаат сериозен проект се вадат и како алиби го кажуваат тоа дека за некои работи биле потребни децении,“ рече Филипче.

Тој нагласи дека власта бара оправдување затоа што граѓаните гледаат дека нема ништо реализирано, за разлика од конкретните резултати што ги постигна СДСМ во својот мандат.

„Соочени се со тоа што ние го кажуваме што ние сме направиле во нашиот мандат за само година или две. И ако ние сме можеле за две години да ги зголемиме платите на лекарите, да почне зголемувањето на минималната плата која до крајот на мандатот е дуплирана. Платите на докторите до крајот на мандатот за 2,5 пати некаде зголемени, ако сме можеле за само два години од мандатот Социјалната помош да ја зголемиме за 300%, ако сме можеле за само две години да ги решивме 30 -годишните отворени стечајците, тие да се целосно обештетени, зошто тогаш ВМРО-ДПМНЕ бара некакво алиби за тоа дека за некои работи требале децении? Не е тоа вистината. Вистината е дека немаат ниту капацитет, ниту волја, ниту визија како да ја водат државата напред,“ истакна Филипче.

Претседателот на СДСМ додаде дека ваквото однесување станало постојана пракса на власта:

„И во таква ситуација се што прават, спинуваат. Куфери со пари, предавства, поделба на граѓаните. И тоа е нешто што го прават во континуитет, тоа не е нешто ново. Тие, исто како и ланската кампања, и сега ја тераат кампањата. Ама сега водат државата, имаат одговорности, мораа да покажат резултати. Граѓаните гледаат дека нема никаква испорака, се намалуваат платите, се скратија пензиите, просечната плата паѓа 3 месец поред,“ рече Филипче.

„Ппензионерите наместо 1000 денари зголемување, требаше да имаат 2000, ако го продолжеа нашиот систем на зголемување на пензиите со методологијата, они се одлучија за линарно зголемување. И сега парите се скратија. Предупредувавме дека така ќе биде,“ изјави Филипче.

На крајот, тој упати критика за, како што кажа, неконтролираниот раст на цените и неактивноста на Владата:

„Цените се надвор од контрола. Никој не ги контролира цените во маркетите. А има владата механизам да го направи тоа. Ниту една добра мерка која ќе предложиме не ја подржаа. Во таква ситуација барат предавници, го делат народот, а државата стагнира,“ порача претседателот на СДСМ Венко Филипче.