Обземени од желбата за власт, но и исплашени од нејзиното губење, ДПМНЕ и нивните кандидати за градоначалници и советници забораваат дека во политиката, исто како и во животот, треба да се има и лице, и образ, и обзир, изјави Петра Лукароска, кандидатка на СДСМ и Коалицијата за градоначалник на општина Прилеп.

„Господа од ДПМНЕ, чиста небулоза е да го шетате низ чаршија Панче Тошковски, министерот во чиј мандат во Прилеп се запалени триесетина автомобили, фрлени се бомби во угостителски објекти и во домови на наши сограѓани. Тешко лицемерие е да зборувате за „грижа за младите“, кога општина Прилеп е меѓу ретките во државата во која не постои Младински центар. Со тоа, не само што го прекршивте Законот за младинско учество и младински политики, туку покажавте и непочит кон сите млади. Исто како и пред 4 години, и денес ветувате изградба на градинка. Истото ветување, истата градинка, на истата локација како и тогаш. Кој може да верува во вакво ветување кажано од истите оние на кои им требаа три и пол години да стават во функција речиси изградена градинка, наследена од претходната локална власт на СДСМ? Со кое лице ветувате реконструкција на улици, кога за 4 години потрошивте над 100 милиони евра а улиците ги оставивте изрешетени со дупки како кратери? Нели ви е незгодно да се сликате на спортски натпревари, кога токму вие сте тие кои го уништија прилепскиот спорт а „Победа“ ја избришаа од фудбалската мапа? Како ќе им објасните на граѓаните дека вие и вашите партиски директори ги поскапевте данокот на имот, водата, комуналните услуги, градскиот превоз, но и покрај тоа сите 4 јавни претпријатија станаа загубари со финансиска “дупка“ поголема од 2 милиони евра? И сето ова се случи за време на вашето владеење со општина Прилеп, период во кој сите конци ги влечеа градоначалникот Борче Јовчески и претседателот на Совет и претседател на Општинскиот комитет на ДПМНЕ, Дејан Проданоски. Четиригодишната агонија во режија на тандемот Јовчески – Проданоски, прилепчани нема така лесно да ја заборават“, рече таа.

Претседателот на Социјалдемократскиот сојуз на Македонија, Венко Филипче, вечерва од граѓанската трибина „Се бориме за нашиот дом“ во општина Дојран, истакна дека актуелните градоначалници на СДСМ со дела покажауваат како домаќински и чесно може да се водат општините и порача дека континуитетот и искуството се клучни за напредокот на општина Дојран.

„Над 200 имплементирани проекти, од кои сигурно 15 до 20 капитални, и над 30 милиони евра инвестирани во Дојран за 8 години. Нема лажење – има работа. Затоа, Анго, искрени честитки за твојата посветена, искрена и чесна работа за Дојран,“ изјави Филипче, потенцирајќи дека неговата работа и резултатите ја докажуваат посветеноста на СДСМ кон Дојран и граѓаните.

Филипче нагласи дека СДСМ и понатаму ќе биде двигател на локалниот развој и гаранција за стабилност, чесност и конкретна работа во Дојран.

„Сега ве повикувам да го направиме истото. Да ја оставиме апатијата и разочарувањето што несомнено ја има насекаде, особено после ланските избори, и да покажеме дека веруваме во вредностите и политиките. Да покажеме дека имаме добри кандидати, дека имаме чесни луѓе кои ќе ја продолжат работата за Дојран да продолжи да се развива и да остане омилено, вистинско место во Македонија,“ рече тој.

Лидерот на СДСМ кажа дека кандидатот за градоначалник Ристо Џинев и неговиот тим советници имаат капацитет и знаење да продолжат со проектите за развој на Дојран и ги повика граѓаните масовно да ја поддржат листата на советници на СДСМ и кандидатот за градоначалник, Ристо Џинев.

„Ристо имаш голем предизвик но сум сигурен дека имаш и знаење и капацитет заедно со тимот којшто ќе го предводи развојот на Дојран, да продолжи и понатаму да се надградува со нови содржини со се што сакаат да бидат жителите не само на Дојран туку и на цела држава, коишто се се почести посетители тука во овој наш туристички бисер“, нагласи Филипче на граѓанската трибина на СДСМ и Коалицијата „Се бориме за нашиот дом“ во општина Дојран, која денеска се одржа во општина Дојран.

Мартин Андоновски, носител на советничката листа на ВМРО-ДПМНЕ во Гостивар, се обрати на денешниот народен митинг во рамки на изборната кампања со слоган ,,Вистинскиот избор! Твојот човек! Твоето место! За твојата иднина!, за претстојните локални избори. Андоновски потенцираше дека фокусот е ставен на приоритетните проекти кои ќе го подобрат животот на граѓаните во Гостивар.

,,Како носител на оваа советничка листа, со целосна одговорност тврдам: нашите настапи во Советот секогаш ќе бидат во интерес на граѓаните аргументирани, достоинствени и секогаш бескомпромисно на страната на вистината. Ќе бидеме гласот на разумот и совеста, будното око што неуморно ќе следи што се работи, како се работи и дали се работи во интерес на граѓаните. Ќе го следиме и ќе го посочиме секој извор на неправичност, секој облик на неодговорно, нечесно или штетно постапување“, вели Андоновски.

Андоновски додаде дека главниот водич е креирање и реализирање на силна одговорна и развојна локална програма.

,,Нашата заложба ќе биде локалната самоуправа да стане синоним за одговорност, транспарентност, развој и просперитет. Главна водилка ќе ни биде креирање и реализација на силна, одговорна, развојна локална програма, затоа што тоа го должиме на нашите сограѓани, на сите оние кои живеат, и ја сакаат Република Македонија“, рече Андоновски.

Тој истакна дека ќе работи посветено на тоа приоритетните проекти од програмата да добијат заслужено место во буџетот, со цел реално да се подобри квалитетот на животот, да се создадат нови можности и да се обезбеди видлив напредок и модерна инфраструктура за сите граѓани.

,,Ќе се залагаме проектите кои се приоритет во нашата програма да добијат соодветно место во буџетот на Општина Гостивар, со цел секој еден од вас да сведочи на проекти кои ќе донесат реален напредок, нови можности, подобра инфраструктура, како и поквалитетен живот за сите“, кажа Андоновски.

Според него, политиките на Владата предводена од ВМРО-ДПМНЕ, донесоа пресврт во односот кон локалната самоуправа односно по години стагнација, конечно централната власт ги поддржува општините во реализацијата на важни проекти.

,,Благодарение на политиките и заложбите на централната власт предводена од Претседателот на Владата, Христијан Мицкоски, сведоци сме на еден целосен пресврт во политиката кон локалната самоуправа низ цела Македонија. После долги години стагнација, имаме позитивен пристап, чесни луѓе и власт која служи на граѓаните преку поддршка на општините во реализација на клучните проекти“, заклучи Андоновски.