Бранислав Светозаревиќ, носител на советничка листа на ВМРО-ДПМНЕ во општина Тетово на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“ се обрати и на самиот почеток истакна дека општина Тетово на вториот јавен повик за финансирање на општините, аплицирала со 40 проекти во висина од 13 милиони евра и го истакна фокусот на советничката група на ВМРО-ДПМНЕ.

„Општина Тетово во рамките на вториот јавен повик за финансирање на инфраструктурни проекти од Владата на Република Македонија аплицираше со 40 проекти во висина од 13 милиони евра. Фокусот на идниот состав на советничката група на ВМРО ДПМНЕ, ќе се усмери кон решавање на најгорливите прашања на нашиот град и нашата општина. Еден од најголемите приоритети е квалитетот на живеењето на граѓаните, па покрај патната инфраструктура ќе се фокусираме во многу почиста средина од ова што денес го имаме, преку најразлични решенија за решавање на сообраќајниот хаос, поефикасен и бесплатен јавен превоз, поефикасно решавање на проблемот со градскиот смет, претоварна станица и селекција на отпад, обновување на водоводната мрежа, нов градски парк“, рече Светозаревиќ.

Светозаревиќ потенцираше дека за младите ќе се формира и дигитален центар, и дека со трудољубивост и многу работа општина Тетово ќе стане подобро место за живеење за сите граѓани.

„За младите Младински културен центар, потоа Центар за знаење и практични вештини, Бизнис инкубатор, формирање на дигитален центар, во кои ќе се собираат ученици и студенти кои работат на дигитални решенија. Затоа ви ветувам дека заедно со овие прекрасни луѓе од листата на советници на ВМРО ДПМНЕ ќе дадеме сѐ од себе, свесни на предизвиците и реалните проблеми со кои ќе се соочуваме, дека посветено ќе работиме на нашите планови и заедно со нашите коалициони партнери и поддршката на Владата и нејзиниот претседател Христијан Мицкоски, ќе успееме нашето Тетово и нашата општина да бидат подостоинствено место за живеење на сите граѓани во нив“, рече Светозаревиќ.

Претседателот на СДСМ, Венко Филипче, вечерва од Валандово каде продолжува изборниот караван со граѓанската трибина „Се бориме за нашиот дом“, порача дека неспособноста и безидејноста на владата е прочитана и затоа власта посегнува по црни кампањи.

„ВМРО-ДПМНЕ не испорача резултати туку се сликаше со проектите кои останаа недовршени од СДСМ. Без резултати власта прибегнува кон лаги и спинови“, рече Филипче.

„Кога се нема резултати, кога неспособноста се гледа, се прибегнува кон спинови, лаги и црни кампањи. Секој ден ја гледаме црната кампања против опозицијата и измислени афери што им се распаднаа, беа хибридни напади, дронови, сега стикови. Никако да разберат дека се прочитани и граѓаните веќе не им веруваат“, рече Филипче.

„Но, ниту јас, ниту СДСМ нема да влеземе во калта во која тие се чувствуваат комотно“, потенцираше тој.

„Ќе продолжиме да ја разобличуваме лажната и лицемерна власт, но уште повеќе ќе зборуваме за реалните проблеми на луѓето. Тоа е нашата борба, за поголеми плати на работниците, за 500 евра минимална плата, за поголеми пензии, за земјоделците, за докторите, за наставниците младите, за Европа.“, рече претседателот на СДСМ, Венко Филипче, вечерва во Валандово.

Тој кажа дека СДСМ покажала дека со вистински политики платите може да растат и во време на најтешките кризи кои некогаш ги имала државата.

„Минималната плата од 8.000 денари ја зголемивме на 22.500 денари, а просечната плата од 22.000 денари, на над 40.000 денари. Донесовме систем на зголемување на пензиите, ја зголемивме за 300% социјалната помош тројно, се спасија над 80 илјади работни места и фирми со антикризните мерки. Донесовме систем за зголемување на пензиите, ја зголемивме за 300% социјалната помош, дадовме мерки во трите последователни кризи на Ковидот, енергетската и финансиската криза во вредност од 2,6 милијарди евра, се спасија 80.000 работни места, 20.000 компании се спасија од затворање, 660 илјади семејства беа заштитени затоа што се субвенционираше сметката за струја. Тоа беа години кога државата стоеше зад човекот “, рече Филипче пред валандовчани.

„Овие резултати веќе ги нема, имаме неодговорна и неспособна власт која не се грижи за граѓаните“, рече претседателот на СДСМ, Филипче, притоа потсетувајќи дека борбата на СДСМ е за раст пензиите, за 500 евра минимална плата, за раст на платите на докторите, за наставниците, земјоделците, за младите и за Европа.

Кандидатот за градоначалник од СДСМ, Миле Атанасов, од трибината во Гевгелија ја побара довербата од граѓаните ветувајќи подобра иднина на градот, но и борба за достоинствен живот на своите сограѓани и решавање на нивните потреби.

„Гевгелија не е само град, Гевгелија е љубов, семејство, живот. Ќе се борам за секој наш сограѓанин, за пензионерот, за младите кои сонуваат да останат тука, за секое село. Во мојот мандат Гевгелија ќе биде врата од градот што ќе дише со своите луѓе, со својата убавина и со својата енергија,“ порача Атанасов.

Тој ја побара довербата од граѓаните и во својата програма и план за Гевгелија најави изградба на современ и модерен парк, зелена оаза на градот, нова спортска арена, мултимедијален центар за младите, Јужен булевар и катна гаража во центарот на градот.

„Посебно внимание посвети на новата населба за ранливите категории: Сум ги сретнал тие луѓе и сакам да им порачам дека таа нивна надеж ќе ја претвориме во нов почеток. Ќе изградиме нова населба со 36 домови. Секој дом ќе биде доказ дека оваа заедница не заборава, дека достоинството е право на секој човек,“ порача Атанасов.

Кандидатот најави и бесплатен оброк за учениците, бесплатен престој во градинките и ново транспортно претпријатие за поврзување на сите населени места.

„Ќе го решиме и деценискиот проблем со загадувањето, затоа што здравјето нема цена. Но, се обврзавме јавно и со изјави дека во општина Гевгелија во нашиот мандат никогаш нема да бидат доделени концесии за изградба на хидроцентрали, концесии за изградба на рудници, ниту ќе дозволиме мигрантски камп во општината,“ додаде тој.

„Ве повикувам, мои сограѓани, да се обединиме и заедно да го изградиме градот каков што го заслужуваме,“ порача Миле Атанасов.