Свет
Лукашенко: Подготвен сум за голем договор со Америка

Белорускиот претседател Александар Лукашенко изјави дека е подготвен за голем договор со САД нагласувајќи дека Украина мора да остане независна и да не создава проблеми или закани за никого.
Информацијата ја објави белоруската државна новинска агенција „Белта“ по состанокот за развојот на белоруско-американските односи, пишува „Украинска правда“.
Лукашенко нагласи дека политиката за обновување на односите со Вашингтон мора да се базира исклучиво на интересите на Белорусија.
„Без сомнение, нашата политика за обновување на односите со САД исто така мора да се базира исклучиво на белоруските интереси… Ќе чекаме на нивните големи предлози, на голем договор… Подготвени сме да склучиме голем договор со нив“, рече тој.
Тој додаде дека е подготвен за преговори. „На едната страна од вагата се нивните прашања, барања и тврдења; на другата страна се нашите прашања и тврдења. Ќе работиме ли на нив? Ајде да го направиме тоа. Ние сме подготвени за тоа“.
Иако рече дека е задоволен од предлогот на американскиот претседател Доналд Трамп, тој нагласи дека интересите на Белорусија мора да се земат предвид.
Коментирајќи го ставот на Вашингтон за постигнување мир во Украина, сојузникот на Кремљ рече дека Украина „мора да постои како суверена, независна и мирна држава“.
„Ние сме за запирање на војната сега. Во спротивно, оваа независна суверена држава (Украина) ќе исчезне…“, рече Лукашенко. „Ако Американците сакаат да го решат конфликтот во Украина и да видат некаква улога за нас во него, дури и мала, ние сме подготвени да учествуваме. Го искажавме нашиот став: мир, мир и само мир“.
Тој исто така ги спомена своите неодамнешни средби со Владимир Путин тврдејќи дека руското раководство, кое води војна против Украина три и пол години, е посветено на мирот.
Лукашенко предупреди дека „ниту една ракета ‘томахавк’ нема да реши ништо“ и дека нивната употреба само би ја ескалирала ситуацијата кон нуклеарна војна.
„Претседателот Доналд Трамп го разбира ова подобро од кој било друг бидејќи не брза да го предаде ова смртоносно оружје за длабински напади на руска територија, на што смета претседателот Зеленски“, додаде тој.
Овие изјави доаѓаат по низа дипломатски активности. Во јуни Лукашенко се сретна со Кит Келог, специјалниот претставник на Доналд Трамп за Украина, во Минск, по што белорускиот режим ослободи 14 политички затвореници.
Украинскиот претседател Володимир Зеленски неодамна разговараше телефонски со Трамп во два наврати, а медиумите известуваат дека една од темите била евентуалното стекнување на ракети Томахавк. Кремљ изрази сериозна загриженост за можноста, а Зеленски рече дека притисокот од таква испорака би можел да помогне во завршувањето на војната.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: Работата во Газа не е завршена, втората фаза од мировниот договор започнува веднаш

Претседателот на САД, Доналд Трамп, изјави дека работата во Газа не е завршена, бидејќи телата на починатите заложници не се вратени како што беше ветено, објави вечерва „Тајмс оф Израел“.
„Сите 20 преживеани заложници се вратија и се чувствуваат добро, како што може да биде. Тешкиот товар е отстранет, но работата не е завршена. Телата не се вратени, како што беше ветено“, напиша Трамп на социјалната мрежа „Truth Social“.
Договорот потпишан од Израел и Хамас минатата недела значеше дека Хамас ќе ги ослободи сите 48 заложници во рок од 72 часа од стапувањето во сила на прекинот на огнот.
Рокot истече во понеделникot напладне и Хамас ослободи 20 заложници живи, но ги врати само телата на само четворица од 28-те што загинаа во Газа, додека вечерва најави предавање на уште четворица.
Дадениот рок во договорот важи и за телата, пишува „Тајмс оф Израел“, но се чини дека на Хамас му треба повеќе време за да ги лоцира, па затоа е формирана заедничка работна група за да помогне во пронаоѓањето на телата што не се вратени во рок од 72 часа.
„Втората фаза започнува веднаш“, додаде Трамп, алудирајќи на делови од неговиот план од 20 точки за повоено управување и реконструкција на Газа, кој ќе го води преодна влада на палестински технократи и ќе го надгледува мировен комитет со кој претседава американскиот претседател и поранешниот британски премиер Тони Блер.
Првата фаза, според Трамп, вклучува ослободување на заложниците, повлекување на Израел од Газа и обезбедување хуманитарна помош, додека Хамас сè уште не се согласил со втората фаза, која вклучува нивно разоружување.
Фото: принтскрин
Свет
Сикорски: Европа мора да се подготви за „длабок“ руски напад

Полскиот министер за надворешни работи Радослав Сикорски денес предупреди дека Европа мора да биде подготвена за руски напад длабоко на нејзина територија. Тој оцени дека е „неодговорно“ што не гради одбранбени системи како што е „ѕид од беспилотни летала“ на неговото источно крило.
Во Лондон, каде што го претстави иранскиот дрон „Шахед-136“ соборен во Украина, Сикорски ги повика европските земји да „останат доследни“ во својата поддршка за Украина, наведувајќи дека се надева дека американскиот претседател Доналд Трамп ќе ги стави на располагање ракетите Томахавк со долг дострел на таа земја, пренесува Ројтерс.
Тој процени дека снабдувањето на Украина со дополнителна муниција за противвоздушна одбрана, како и оружје со краток и среден дострел, е неопходно за да се помогне во заштитата на Европа, наведувајќи ги како примери упадите на руски беспилотни летала над Полска и борбените авиони над Естонија.
Тој рече дека сè уште не е познато дали беспилотните летала забележани над Копенхаген биле руски.
Запрашан за можноста за проширување на иницијативата „ѕид од беспилотни летала“ за да се спротивстави на идните упади, Сикорски за Ројтерс изјави дека руските напади „за жал би можеле да стигнат длабоко во Европа“.
„Треба да бидеме подготвени да се спротивставиме на тоа и затоа мислам дека би било неодговорно ако не изградиме капацитети против беспилотни летала денес“, рече Сикорски, пренесува Танјуг.
Фото: принтскрин
Свет
Силен земјотрес во Турција

Земјотрес со јачина од 4,1 степени според Рихтеровата скала вечерва ја погоди западна Турција, објави Европско-медитеранскиот сеизмолошки центар (EMSC).
Во соопштението се наведува дека епицентарот на земјотресот бил на длабочина од девет километри.
Засега нема информации за евентуални повредени или штети.