Македонија
Бујар Османи му ја честита на Изет Меџити победата во Чаир

Кандидатот за градоначалник на Чаир од ДУИ, Бујар Османи, му ја честита на својот противкандидат Изет Меџити од коалицијата „Вреди“ победата во првиот круг на локалните избори.
Во објава на социјалните мрежи, Османи изрази задоволство што изборниот ден поминал успешно и без поголеми забелешки, нагласувајќи дека граѓаните го имаат последниот збор во политиката.
„Честитки до мојот противкандидат и до целата коалиција што застана зад него — тие се победниците на изборите во Чаир, и им посакувам успех во раководењето со општината во наредните четири години,“ напиша Османи.
Тој им се заблагодари на своите соработници, активисти и поддржувачи за, како што истакна, кампања исполнета со посветеност, визија и нови пријателства.
„Иако кампањата не беше фер ниту законита во секој аспект, не сакам да се жалам, затоа што искреноста и вредностите имаат смисла само ако ги задржите и во вакви ситуации,“ додаде Османи, најавувајќи дека за следните политички чекори ќе се произнесе во наредните денови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево со мала до умерена локална облачност, максималната температура до 20 степени

Сончево со мала до умерена локална облачност. Ќе дува слаб до умерен ветер од јужен правец. Минималната температура ќе биде во интервал од 1 до 8, а максималната ќе достигне од 14 до 20 степени.
Во Скопје, сончево со мала до умерена облачност. Ќе дува слаб до умерен ветер од југоисточен правец. Минималната температура ќе се спушти до 4, а максималната ќе достигне до 18 степени.
Времето во наредните денови
Следува период на променливо облачно време со сончеви периоди и со слаб до умерен јужен ветер. Во среда ќе има локални врнежи од дожд, а од четврток дневната температура ќе биде во пораст.
Македонија
Орце Ѓорѓиевски и Амар Мециновиќ одат во втор круг за градоначалник на Скопје, ВМРО-ДПМНЕ и Левица имаат најмногу гласови и во Советот

Кандидатите за градоначалник на Град Скопје од ВМРО-ДПМНЕ и Левица, Орце Ѓорѓиевски и Амар Мециновиќ ќе се соочат во вториот круг од локалните избори што ќе се одржи на 2 ноември.
Според податоците на Државната изборна комисија, од пребројани 91 отсто од гласовите, во водство е Орце Ѓорѓиевски со 36,62 отсто, односно 82.155 гласови, а зад него е Мециновиќ со 13,35 проценти, односно 27.686 гласови.
Зад нив е Башким Бакиу од „Влен“ со 12,15 отсто, Каја Шукова од СДСМ со 11,52 отсто и Скендер Реџепи од ДУИ до 11 отсто од пребројаните гласови.
ВМРО-ДПМНЕ и Левица доминираат и во Советот на Град Скопје. Според официјалните податоци од ДИК, ВМРО-ДПМНЕ во Советот има 35,46 отсто од гласовите, а зад нив е Левица со 12,04 проценти.
Македонија
Орце не бегај од дебата, од вечерва Левица е вистински лидер на опозицијата, порача Апасиев

Вечерва објавуваме дека Левица станува лидер на опозицијата во Македонија, објави на прес-конференција Димитар Апасиев, лидерот на оваа партија.
„За прв пат влегуваме во Советот на Општина Тетово, Виница, Берово, Пробиштип, Лозово, Ранковце, Струмица, Радовиш, Кривогаштани, Струга, Дебарца и Ресен. Покрај во главниот град, втора партија пред СДСМ, Левица станува во Аеродром, Карпош, Кисела Вода, Гази Баба, Бутел, Чаир и Велес“.
Лидерот на Левица со порака до кандидатот за градоначалник на Град Скопје од редовите на ВМРО-ДПМНЕ, Орце Ѓорѓиевски: „Орце не бегај од дебата“.
Амар Мециновиќ пак рече, дека денеска Скопје се разбуди а граѓаните покажале храброст дека се подготвени да изберат поинаку.
„Денеска Левица испиша историја затоа што првпат има кандидат во главниот град кој не е поддржан од ВМРО-ДПМНЕ и СДСМ.
Во првиот круг покажавме дека има надеж, во вториот круг сето тоа ќе го претвориме во реалност. Влеговме во вториот круг затоа што илјадници луѓе во Скопје се охрабрија да застанат на страна на промената. Скопјани имаат визија дека градот треба да се раководи од јавниот, а не од приватниот интерес, порача Мециновиќ.
На жителите од Скопје, во вториот круг им порача дека имаат две визии: едната како што рече е онаа која 35 години ја има во државата, која е застарена, коруптивна, криминална и им ги одзема годините, можностите и животите, и онаа втората, за која, како што истакна, е нивна визија, за град во кој сите ќе сакаме да живееме.
„Скопје во наредните недели ќе одлучи за својата судбина“.
Мециновиќ најави дека и во следните денови Левица ќе продолжи со средби со граѓаните.
Во следните недели нема да се занимаваме со тоа што сте навикнати да го гледате, а тоа се препукувања на монополот меѓу ВМРО-ДПМНЕ и СДСМ. Тоа време заврши. Цензурата е залудна, скопјани ја видоа нашата визија. Го дочекавме денот кога ВМРО-ДПМНЕ и СДСМ нема да ни бидат судбина“, порача Мециновиќ.
Ги повика сите оние што се разочарани и се двоумат во нивниот избор да им се придружат.