Свет
Како да се направи разлика помеѓу новата варијанта на ковид и настинка?
Кашлицата и кивањето се неизбежни во ова време од годината. Без разлика дали сте на работа, патувате или се релаксирате дома, тешко е да се избегнат. Новите варијанти на ковид се раширени, а во морето информации сè потешко е да се каже дали болно грло или течење на носот е знак за ковид или е типична сезонска настинка.
Што предизвикува настинка и што предизвикува ковид?
„Настинките се предизвикани од цела низа вируси, но најчестиот виновник е риновирусот, кој сака да се насели во носот и во грлото“, рече д-р Чун Танг од „Пал Мал медикал“, приватен здравствен центар во Велика Британија. „Ковид, од друга страна, е предизвикан од еден вирус, SARS-CoV-2, и е еден вид коронавирус“.
„И двата го напаѓаат вашиот респираторен систем, но ковид има тенденција да влијае подлабоко, понекогаш на белите дробови, па дури и на други органи“.
Која е новата варијанта на ковид и по што се разликува?
Стратус (XFG) и нимбус (NB.1.8.1) се некои од најновите варијанти на сојот омикрон-коронавирус, кои од неодамна доминираат во медиумите.
„Стратус е поврзан со засипнатост и замор, а нимбус со чувство на брич во грлото и дигестивни симптоми, како што се гадење и надуеност“, рече д-р Бруно Силвестер Лопес, професор по микробиологија на Универзитетот „Тис сајд“ во Велика Британија.
„И двата се многу заразни, но не се поопасни од претходните варијанти“, додаде тој.
Како се шират ковид и настинките?
„Двете болести се шират главно со капки кога некој кашла, кива или дури и зборува во ваша близина“, рече Танг. „Сепак, ковид може да се шири и во воздухот преку ситни честички, аеросоли, кои остануваат таму, особено во преполни или лошо проветрени простори“.
„Значи, додека настинката бара малку поблизок контакт за да се пренесе, ковид може да ви се прикраде од другата страна на просторијата, ако немате среќа“.
Дали симптомите на настинка и на ковид се разликуваат или некои се преклопуваат?
Може да биде тешко да се направи разлика помеѓу настинка и ковид бидејќи многу од симптомите се преклопуваат.
„Двете болести може да предизвикаат болно грло, течење или затнат нос, кивање и кашлање“, рече Танг. „Сепак, ковид може да предизвика и треска, замор, болки во мускулите и она карактеристично губење вкус или мирис, иако е поретко кај поновите варијанти“.
„Ковид е исто така поверојатно да ве нокаутира како да сте биле удрени од камион, а настинката нема тенденција да го прави тоа“.
Дали симптомите на настинка и на ковид траат исто толку долго?
„Симптомите на настинка обично траат од една недела до 10 дена“, рече Лопес. „Симптомите на ковид обично траат до две недели, но некои луѓе може да ги доживуваат подолго, дури и месеци“.
„Ковид може да предизвика и сериозни компликации, како што се пневмонија или долгорочен ковид, што влијае на повеќе од само респираторниот систем“.
Дали постојат разни третмани за настинки и за ковид?
„Настинката може да се лекува со одмор, многу течности и лекови што се продаваат без рецепт, како ацетаминофен и деконгестанти“, рече тој.
„Благите случаи на ковид се третираат слично, но на луѓето што се изложени на ризик може да им се препишат и антивирусни лекови“.
Дали сепак треба да се тестирате на ковид?
„Да, особено ако не се чувствувате добро и работите со ранливи популации, како што се здравствени работници и домови за стари лица или ако сакате да спречите ширење на вирусот кај членовите на семејството што може да бидат изложени на ризик“, рече Танг.
Кога треба да го посетите вашиот матичен лекар за настинка или ковид?
„Треба да го посетите вашиот матичен лекар ако имате висока температура што не се намалува, ако имате тешкотии со дишењето, ако имате болка во градите или ако вашите симптоми траат повеќе од 10 до 14 дена ,без подобрување“, советува Танг.
„Особено во случај на ковид побарајте помош бргу ако имате недостиг на воздух или ако сатурацијата на кислородот во крвта ви се намали. Секогаш верувајте им на вашите инстинкти, ако сте загрижени, одете на лекар“.
Како можете да спречите настинка или ковид во ова време од годината?
„Мијте ги рацете често, проветрувајте ги просториите во кои се наоѓате и обидете се да не го допирате лицето премногу“, советува Танг.
„Избегнувајте близок контакт со луѓе што очигледно не се чувствуваат добро, а ако се чувствувате лошо, бидете внимателни кон другите, останете дома и одморете се“.
„За ковид, вакцинирањето со најновите препорачани вакцини за моментно циркулирачките соеви обезбедува одлична заштита и не потценувајте ја моќта на добриот сон, како и балансираната исхрана и редовната физичка активност“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лавров: Европа се подготвува за војна
Рускиот министер за надворешни работи Сергеј Лавров ја оцени состојбата на безбедносната архитектура во Евроазија на Меѓународната конференција за евроазиска безбедност во Минск, зборувајќи за „агресивните планови на Западот“, проширувањето на НАТО, перспективата за решение на конфликтот во Украина и односите со Вашингтон.
Лавров предупреди дека Русија нема да дозволи Евроазија да стане „феуд на НАТО“, обвинувајќи ги западните земји дека „се подготвуваат за нова голема војна“, објави РИА Новости.
Тој оцени дека Алијансата „ги проширува своите активности кон Арктикот и Тихиот Океан“ со цел да ја ограничи Кина и да ја изолира Русија.
„Многу пати сме рекле дека никогаш немавме, ниту имаме намера да нападнеме која било моментална членка на НАТО или ЕУ. Подготвени сме да ја вклучиме оваа позиција во идните безбедносни гаранции за овој дел од Евроазија, но лидерите на ЕУ избегнуваат да ги разгледуваат овие идни гаранции на вистински колективна основа“, рече Лавров, наведувајќи ги договорите меѓу Франција и Велика Британија за координација на нуклеарните сили и договорот меѓу Лондон и Берлин за воена соработка како доказ за милитаризацијата на Европа.
Зборувајќи за новата безбедносна архитектура на Евроазија, Лавров повика на создавање „панконтинентална структура отворена за сите земји од регионот“, заснована на принципите на суверена еднаквост и неделивост на безбедноста.
„За разлика од Западот, Русија и нашите партнери – Кина, Индија, Иран, земјите од ЗНД – се убедени дека стабилноста и просперитетот бараат еднакви права за сите земји, а не доминација на привилегираните“, рече Лавров.
Осврнувајќи се на конфликтот во Украина, рускиот министер ги обвини европските членки на НАТО за продолжување на војната со „пумпање оружје и пари за режимот во Киев“.
„Европските лидери прават сè за да го убедат Вашингтон да се откаже од решавањето на конфликтот на преговарачка маса“, рече Лавров.
Тој додаде дека Москва ги полага своите надежи на договорите постигнати меѓу претседателите на Русија и САД, Владимир Путин и Доналд Трамп на самитот во Алјаска, велејќи дека Русија очекува САД да останат посветени на тие принципи.
Зборувајќи за билатералните односи со Вашингтон, Лавров рече дека Русија предложила враќање на директниот воздушен сообраќај, но дека „американската страна не му дава приоритет“.
Тој исто така истакна дека Москва очекува одговор од САД на нејзиниот предлог за нов договор за намалување на стратешкото оружје, како и на тестирањето на руските крстосувачки ракети „Буревестник“.
„Не слушнав никаков одговор преку дипломатски канали. Сите молчеа“, заклучи Лавров, пренесува Танјуг.
Фотот: принтскрин
Свет
Пожар на крузер на Нил, евакуирани 60 италијански туристи
Денес избувна пожар на туристичкиот крузер „Емпрес“ што плови по Нил во близина на Луксор во Египет. На бродот имало околу 60 италијански државјани, но никој не е повреден и сите патници се безбедни, потврди италијанското Министерство за надворешни работи Фарнезина, објавува „Ил Месаџеро“.
Фарнезина соопшти дека внимателно ја следат ситуацијата заедно со амбасадата во Каиро и дека министерот Антонио Тајани е информиран за сè. За какви било итни случаи, италијанските граѓани ги имаат на располагање броевите на амбасадата во Каиро и на Кризната единица.
Сите патници се згрижени
Евакуираните туристи веднаш беа згрижени од туристичките оператори Corsini Viaggi и Travco Tours.
Пожар предизвикан од краток спој
Според првичната истрага, пожарот избувнал во кујната на бродот додека бил закотвен во пристаништето на селото Асфун. Причината бил електричен краток спој во еден од кујнските апарати. Пожарникарите брзо го изгаснале пламенот пред да се прошири на остатокот од крузерот, а во инцидентот нема повредени туристи или членови на екипажот.
Истрагата е во тек
Сите патници се префрлени на други бродови од безбедносни причини, додека властите започнаа со инспекција на бродот за да ја утврдат точната причина за пожарот. За инцидентот е известено и државното обвинителство, кое ќе спроведе официјална истрага.
Фото: принтскрин
Свет
Белорусија ќе распореди руски ракетни системи „Орешник“ на своја територија
Белорусија ќе распореди руски ракетни системи „Орешник“ на своја територија во декември, објави денес кабинетот на белорускиот претседател Александар Лукашенко.
Се вели дека подготовките за распоредување на ракетите се при крај, објавува Ројтерс.
Лукашенко изјави дека распоредувањето на хиперсоничните балистички ракети „Орешник“ е одговор на ескалацијата од Западот.
Ракетите „Орешник“ беа вклучени во заеднички маневри меѓу Русија и Белорусија минатиот месец.
Фото: принтскрин

