По објавувањето за повлекувањето на некои сили од Романија, администрацијата на американскиот претседател Доналд Трамп планира да го намали бројот на војници во Бугарија, Унгарија и Словачка следниот месец. Овој потег, кој веќе предизвика остри реакции од двете страни на политичкиот спектар на Капитол Хил, иницира нови прашања за долгорочната посветеност на Вашингтон на одбраната на источниот крило на НАТО, пишува „Киев пост“.

Иако одлуката за повлекување на ротационата бригада од Романија предизвика негодување, неколку извори потврдија дека ова е само првиот чекор. Зад затворени врати американските претставници им сигнализираа на сојузниците дека намалувањата во Романија се само почеток и дека понатамошни намалувања во Бугарија, Унгарија и во Словачка може да се очекуваат веќе кон средината на декември. Таквиот временски рок предизвика загриженост кај дипломатите на НАТО, кои бргу ги проценуваат последиците за безбедноста на најотворената граница на алијансата.

Двајца западни претставници запознаени со дискусиите рекоа дека Пентагон го разгледува повлекувањето делумно затоа што европските копнени сили сега се сметаат за поподготвени отколку во последните години, што го прави ограниченото приспособување на присуството на САД соодветно. На сојузниците им е кажано дека веројатно ќе бидат направени дополнителни приспособувања в година. Американскиот допис ги опиша планираните намалувања во сите четири земји како маргинални.

За да ги уверат сојузниците, претставници на администрацијата нагласија дека нивото на американски трупи во Полска и во балтичките држави, најсилно утврдените источни позиции на алијансата, ќе остане непроменето. Тие ги истакнаа силните трошоци за одбрана на овие земји и нивната тесна соработка со американските сили велејќи дека посветеноста на Вашингтон кон НАТО останува силна.

Објавата дојде во услови на растечки критики за првичната одлука за Романија, при што и републиканците и демократите предупредуваат дека потегот може да ја охрабри Москва и да го поткопа единството на алијансата. Пратеникот Мајк Тарнер (Р-Охајо), шеф на американската делегација во Парламентарното собрание на НАТО, изрази длабока загриженост за намалувањето на силите во клучна земја на првата линија на одбраната.

„Како шеф на американската делегација во Парламентарното собрание на НАТО загрижен сум од извештаите за намалување на американските сили во Романија“, напиша Тарнер на социјалните медиуми нагласувајќи ја потребата од силно и решително присуство на САД во Европа.

Тој директно го поврза прашањето за трупите со неодамнешните руски провокации. „Агресивните акции на Русија против земјите од источниот дел преку намерни упади во воздушниот простор ги нагласуваат амбициите на Русија надвор од Украина“, предупреди тој.

Дипломатот Даниел Фрид, поранешен помошник-државен секретар и еден од архитектите на американската политика во Источна Европа, верува дека новата политика одразува бирократско маневрирање, а не кохерентна стратегија.

„Во рамките на администрацијата на Трамп се води тековна дебата за глобалното распоредување на силите“, објасни Фрид наведувајќи ги спротивставените фракции што се залагаат за стратегијата „Азија на прво место“, пристапот „Тврдина Северна Америка“ или традиционален став кој „сериозно ја сфаќа руската закана“.

Фрид го нарече повлекувањето грешка тврдејќи дека секое видливо намалување на американските сили во Европа испраќа погрешен сигнал до Путин. Сепак, тој забележа дека најавените намалувања се ограничени. „Бројките се толку мали што нема да ја променат воената рамнотежа. Но, сигналот е лош“, рече тој.