Свет
(Видео) Загина творецот на играта Call of Duty: со „ферари“ се забил во бетонска ограда
Винс Зампела, визионерски развивач на видеоигри и еден од клучните луѓе зад глобално популарната франшиза Call of Duty, загина во тешка сообраќајна несреќа во неделата попладне. Несреќата се случи на автопатот Анџелес Крест во јужна Калифорнија кога Зампела ја изгуби контролата врз своето „ферари“, пишува „Ен-би-си Лос Анџелес“.
Трагична несреќа на планински пат
Според извештајот на Калифорниската сообраќајна полиција (CHP), несреќата се случила околу 12.45 часот. Зампела возел „ферари 296 ГТС“ и веднаш по излегувањето од тунелот на кривулестиот планински пат, возилото скршнало од патот и удрило во бетонска ограда. Поради силата на ударот, совозачот бил исфрлен од автомобилот, а Зампела бил заробен во возилото, кое потоа се запалило.
За жал, Зампела починал на местото на несреќата. Совозачот, чиј идентитет сè уште не е објавен, починал од повредите во болница. Сведок им доставил на властите видеоснимки од несреќата, но точните околности што довеле до губење на контролата врз возилото сè уште се истражуваат. Спортскиот автомобил беше напојуван од хибриден V6-мотор, кој произведуваше повеќе од 819 коњски сили.
Гигантот во гејминг-индустријата
Винс Зампела (55) беше почитувано име и една од највлијателните личности во индустријата за видеоигри. Како коосновач на Infinity Ward, тој беше клучен во создавањето на мегауспешната франшиза Call of Duty. Во 2010 година тој го основа Respawn Entertainment, студиото што ги донесе светските хитови како Titanfall, Titanfall 2, Apex Legends и STAR WARS Jedi: Fallen Order.
Неговото студио беше купено од гигантот EA во 2017 година, а Зампела продолжи да го води Respawn. Тој исто така го водеше тимот во студиото на EA со седиште во Плаја Виста, кое е одговорно за популарната франшиза Battlefield.
Збогување со визионерот
Веста за неговата смрт ја шокира гејмерската заедница. Џин Парк, критичар за видеоигри за „Вашингтон пост“, кој лично го познаваше Зампела, рече: „Тој навистина имаше дарба за создавање приказни и искуства што ја допираа сржта на човечкото искуство, без разлика дали стануваше збор за терор, страв, хероизам. Мислам дека тој навистина го долови тоа преку дизајнот на видеоигрите што ги создаде“.
„Тој беше многу, многу скромна личност. Беше многу свесен за влијанието што го имаше врз луѓето и никогаш не го земаше тоа здраво за готово“, додаде Парк.
ЕА објави соопштение нарекувајќи го влијанието на Зампела „длабоко и далекосежно“.
„Ова е незамислива загуба и нашите срца се со семејството на Винс, неговите најблиски и сите оние што беа допрени од неговата работа“, се вели во соопштението. „Влијанието на Винс врз индустријата за видеоигри беше длабоко и далекосежно. Пријател, колега, лидер и визионерски креатор, неговата работа помогна во обликувањето на модерната интерактивна забава и инспирира милиони играчи и развивачи од целиот свет. Неговото наследство ќе продолжи да го обликува начинот на кој се создаваат игрите и како играчите се поврзуваат со генерациите што доаѓаат“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп: Постои голема омраза меѓу Путин и Зеленски
Претседателот на САД, Доналд Трамп, изјави дека мировните преговори меѓу Украина и Русија се во тек и напредуваат „нормално“, но дека постои голема „омраза“ меѓу рускиот и украинскиот претседател, Владимир Путин и Володимир Зеленски.
„Постои огромна омраза меѓу овие двајца лидери, Путин и Зеленски. Разговараме. Сè оди добро. Војната мора да престане“, изјави Трамп пред новинарите во неговиот имот Мар а Лаго во Флорида, според Јутјуб каналот на Белата куќа, пренесуваат мердиумите во регионот.
Кога новинарите го прашаа дали ќе инсистира Божиќ да биде крајниот рок за постигнување мировен договор, Трамп рече дека се надева дека конфликтот ќе заврши.
„Веќе не трошиме пари за оваа војна. (Поранешниот претседател Џозеф) Бајден даде 350 милијарди долари и којзнае што се случи со тоа. Сега продаваме ракети, авиони и најдобра воена опрема на НАТО. Значи, не фрламе пари како што правевме во времето на Бајден. Тој беше будала и она што ѝ го направи на земјата е ужасно“, истакна американскиот лидер, според написите.
Тој повтори дека завршил осум војни и дека „сите се уморни од оваа војна“.
Во последните недели, САД ги обновија своите напори за посредување во мировен договор меѓу Москва и Киев. По неколку рунди разговори, нацрт-документот се смета за поприфатлив за Киев, но сè уште постојат разлики околу територијалните и безбедносните гаранции.
На 14 и 15 декември, украинската делегација ги продолжи преговорите во Германија со учество на специјалниот претставник на американскиот претседател Стивен Виткоф и Џаред Кушнер.
Во Мајами, од 19 до 21 декември, украинските и американските делегации одржаа серија состаноци за мировниот план и разговараа со претставници на Русија, но немаше знаци на напредок и не беа најавени нови состаноци.
Фото: депозитфотос
Свет
(Видео) Мексикански авион што превезувал повредено дете се урна во Тексас: најмалку 5 загинати
Најмалку пет лица загинаа вчера во Тексас кога авион на мексиканската морнарица се урна во густа магла во близина на Галвестон. Авионот бил на медицинска мисија и носел дете со тешки изгореници, објави Би-би-си.
Според веб-страницата за следење на летови „Флајт радар“, авионот последен пат бил виден во 15.01 часот по локално време над заливот Галвестон. Летот бил организиран за фондација што обезбедува грижа за мексикански деца со тешки изгореници. Секретаријатот на мексиканската морнарица соопшти дека едно лице сè уште е исчезнато, а две се спасени живи.
Видеото што го добиле од „Асошиетед прес“ ги прикажува остатоците од авионот во водата, а сведоци и полицајци влегуваат во морето за да ги бараат остатоците. Скај Декер, локален капетан на јахта, рече дека однел двајца полицајци до речиси потонатиот авион, а потоа самиот скокнал во водата и пронашол тешко повредена жена.
„Не можев да поверувам. Имаше само неколку сантиметри воздушен простор за дишење“, рече тој. „А внатре имаше гориво за авиони измешано со вода, испарувањата беа навистина лоши. Таа навистина се бореше за својот живот“, додаде тој.
Претходно, Секретаријатот на мексиканската морнарица соопшти дека операциите за пребарување и спасување се во тек во координација со крајбрежната стража на САД. Видеото снимено во близина на местото на несреќата ги прикажува спасувачите, вклучувајќи и нуркачки тим, како работат во густа магла.
Фондацијата Michou y Mau во соопштение на социјалните медиуми изрази најдлабоко сочувство до семејствата на жртвите од оваа трагедија.
Свет
Германскииот министер за одбрана: Путин е единствениот кој може бргу да ја запре војната
Германскиот министер за одбрана Борис Писториус во интервју за неделникот „Ди Цајт“ изјави дека, според него, рускиот претседател Владимир Путин не е заинтересиран за воспоставување мир во Украина, иако, како што изјави, токму Москва има клучна улога во брзото запирање на борбите.
„И покрај напорите на Американците, Европејците и на Украинците за постигнување прекин на огнот, од Москва нема сигнали дека Владимир Путин е заинтересиран за прекин на војната“, рече Писториус додавајќи дека рускиот лидер е единствениот што може да ги запре непријателствата на краток рок.
Во исто време, германскиот министер ги поздрави разговорите одржани во Берлин на 15 и 16 декември потсетувајќи дека германскиот канцелар Фридрих Мерц јасно изјавил дека Европа мора да го има својот глас во сите идни преговори за украинскиот конфликт.
Писториус исто така го нагласи значењето на, како што рече, невидениот заем за Украина, со вкупна вредност од 90 милијарди, кој, според него, треба да му помогне на Киев да ги покрие своите воени потреби во следните две години.
Од друга страна, рускиот претседател Владимир Путин на 19 декември изјави дека Москва е подготвена и има волја мирно да го реши конфликтот во Украина. Тој, сепак, оцени дека Киев одбива да ја заврши војната со дипломатски средства, иако, како што изјави, во исто време од Украина доаѓаат одредени сигнали за подготвеност за вклучување во некаков вид дијалог.
Фото: депозитфотос

