Македонија
Кисела Вода подготвува тридневна новогодишна приказна за граѓаните
Во Домот на култура „Билјана Беличанец“ денеска се одржа прес-конференција на која градоначалничката на Општина Кисела Вода, Бети Стаменкоска Трајкоска, заедно со дел од изведувачите, ја најави тридневната празнична манифестација „Новогодишна приказна“. Истата ќе се одржи од 28 до 30 декември во паркот „Шопен“.
Настанот го модерираше Миро Кацаров, кој воедно ќе биде и водител на целата празнична програма, внимателно осмислена за сите генерации.
Во рамки на „Новогодишната приказна“, посетителите ќе имаат можност да уживаат во настапите на Антониа Гиговска, Либеро бенд и Миле Кузмановски со бенд, а празничната атмосфера во овие три дена дополнително ќе ја збогатат Ди Џеј Марио со труба, „Пауза за ракија“, Оле Поцкова од „Зевзекманија“ со монодрама , како и Бока Конга и Боби Сакс.

Паркот „Шопен“ ќе биде празнично уреден, со поставени новогодишни куќарки и содржини наменети за посетителите во текот на тридневната манифестација.
Посебно внимание е посветено на најмладите. На 30 декември, за децата е предвидена програма со музички точки од градинките „8 Март“ и „Весели цветови“, претстава со Дедо Мраз, анимирана програма, мини-концерт на училишните бендови и настап на Ди Џеј Марио. Бесплатни новогодишни пакетчиња ќе добијат сите дечиња од општина Кисела Вода.

Во својата изјава, градоначалничката Бети Стаменкоска Трајкоска истакна дека заложбата на општината е Кисела Вода да биде место каде што се гради квалитетен живот во секоја смисла, преку континуирани инвестиции, грижа за граѓаните и создавање содржини што го оживуваат јавниот простор и му даваат дополнителна вредност на секојдневието.
-Токму во таа насока, од 28 до 30 декември, во паркот „Шопен“, организираме три дена новогодишни случувања со богата програма и настапи на квалитетни македонски изведувачи, наменета за сите генерации, вклучително и за децата за кои подготвивме бесплатни пакетчиња. Паркот ќе биде празнично уреден и исполнет со новогодишни куќарки, каде што ќе се нудат топли напитоци и празнична храна, со цел граѓаните во целост да уживаат во новогодишната атмосфера“, изјави Стаменкоска Трајкоска.

Воедно, градоначалничката ги покани граѓаните на 31 декември да се приклучат и на големата новогодишна забава организирана од Град Скопје на Градскиот плоштад, како заеднички завршеток на празничните случувања во пресрет на Новата година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Куќниот притвор за Груби е потврда дека сè е договорено, велат од СДСМ
Одредувањето куќен притвор за Груби е потврда дека сè е договорено, сметаат од СДСМ. Според партијата, затоа судството и обвинителството се ставени под директна контрола на Мицкоски и ВМРО-ОКГ.
„Дилот ВМРО–ДУИ се спроведува пред очите на јавноста. Прво со договореното враќање и режираното снимање на граничниот премин. Не работеа камерите кога Груби си замина преку граница, слободно, со пасош, иако бил на стоп-листата. Но, за договореното враќање на Груби камери има на секој чекор – од граница, пречек, па сè до Обвинителството и Судот. Потоа следуваше веќе подготвената кампања по медиумите под контрола на Орбан, а сега и одлуките за куќен притвор. Ако некој еднаш избегал од државата, зошто му се одредува куќен притвор?“, прашуваат од СДСМ.
Од таму велат дека ништо не е случајно и останува само да видиме која е цената.
„Пеш преминал преку граница и побегнал. А бил на стоп-листа. Сега, после 14 месеци бегство – се враќа и му се одредува куќен притвор. На кого уште не му е јасно ова сценарио? Ништо не е случајно. Ова е дел од договорот меѓу ДУИ и ВМРО-ОКГ. Останува само да видиме која е цената“, велат од СДСМ.
Македонија
Поради одрон во тунелот, сообраќајот на автопатот Скопје – Велес се одвива по една лента
Поради одрон во тунелот на автопатот Скопје-Велес, после Катланово, сообраќајот се одвива по една коловозна лента, информира АМСМ.
Денеска и утре на Автопат А-1 делница клучка Миладиновци клучка Петровец ќе се одвива времена измена во сообраќајот поради технички зафат од ДПТУГ Електра Груп ДООЕЛ, кај клучка Аеродром во дневен период од 6 до 8 часа, сообраќајот ќе се одвива во сообраќајните ленти за претекнување.
Македонија
Обвинителството бара замена од затворски во куќен притвор за Артан Груби
Основното јавно обвинителство Скопје побара мерката притвор за поранешниот вицепремиер Артан Груби да биде заменета со куќен притвор. Ваквата одлука, Обвинителството ја донело врз основа на тоа дека се обезбедени голем број докази, дека истиот доброволно се пријавил на органите на прогонот, како и дека постојат индиции дека во притворското одделение не може да се гарантира неговата лична безбедност.
„Основното јавно обвинителство Скопје по добивањето на известувањето дека второосомничениот во предметот за Државната лотарија каде е осомничен заедно со уште пет лица, доброволно се пријавил на органите на прогонот и изразил подготвеност да соработува со надлежните органи, ќе ја продолжи постапката за истиот со цел донесување на јавнообвинителска одлука“, соопштија од Обвинителството.
Од таму додаваат дека на барање на одбраната, Груби во текот на денешниот ден бил спроведен пред надлежниот обвинител каде вршел увид во списите на предметот, но поради обемноста на доказниот материјал увидот ќе продолжи наредните денови по што ќе му биде овозможено да ја даде својата одбрана.
„По однос на мерките за обезбедување на присуство на второосомничениот во понатамошниот тек на постапката Основното јавно обвинителство Скопје предложи замена на мерката притвор со мерка куќен притвор и одземање на патна исправа, имајќи го во предвид фактот во најголем дел се обезбедени доказите во текот на постапката, дека истиот доброволно се пријавил на органите на прогонот, како и дека постојат индиции дека во притворското одделение не може да се гарантира неговата лична безбедност, кои индиции се поткрепени со известувања од надлежните органи. Исто така индициите за загрозената безбедност се однесуваат и на членовите на неговото семејство“, се наведува во соопштението.

