Триесет и тригодишна жена со иницијали З. М. од Куманово пријавила во полицијата дека била нападната во својот дом од едно лице.

Според пријавеното, лицето се претставило дека е од кабелска телевизија и побарало да наплати сметки, а кога влегла да побара пари, тој ја нападнал.

Како што е пријавено, за неколку минути дошол нејзиниот сопруг и почнале физичка пресметка со лицето, кое потоа се дало во бегство и притоа му испаднал пиштолот.

Увид на местото извршила екипа од СВР Куманово, а пиштолот бил подигнат за вештачење. Се преземаат мерки за расчистување на случајот.

Сопственик на аптека на улицата Џон Кенеди починал набргу откако објектот бил ограбен, јави МВР.

Тој не бил во аптеката за време на грабежот, туку стигнал 10 минути подоцна и му се слошило.

Набргу со итната медицинска помош бил однесен во комплексот клиники „Мајка Тереза“, каде што од страна на лекар е констатирана смрт.

Грабежот се случил синоќа по 20 часот кога едно лице со закана со нож кон вработената го одзел дневниот промет.

Полицијата презема мерки за расчистување на случајот.

Во атарот на селото Лојане, општина Липково, поточно кај местото наречено Шорта, полицијата открила 52 лица илегални мигранти по потекло од африкански и азиски земји.

Тие биле приведени и однесени во Транзитниот центар „Табановце“.

Четири лица од Пакистан биле лишени од слобода затоа што кај нив биле пронајдени нелегални супстанции и ладно оружје, а биле посочени и дека физички ги напаѓале другите од групата.

Тие се предадени во СВР Куманово. По целосно документирање на случаите, против нив ќе бидат поднесени соодветни пријави.