Одделението за безбедност на сообраќајот при СВР Скопје вчера во периодот од 06.00 до 24.00 часот спроведе акциска контрола за откривање на возачи кои ја пречекориле брзината на движење со моторно возило на подрачјето на Скопје. Притоа, санкционирани се 34 возачи кои ја пречекориле брзината. Откриени се и 42 останати прекршоци, за кои се издадени 16 мандатни платни налози и 26 прекршочни платни налози.

Исто така, вчера од 22.00 часот до 05.00 часот утрово беше спроведена акциска контрола за откривање на возачи кои управувале со возило под дејство на алкохол на подрачјето на Скопје. Притоа, санкционирани се 19 возачи кај кои било утврдено присуство на алкохол. Откриени се и 13 останати прекршоци, за кои се издадени пет мандатни платни налози и осум прекршочни платни налози.

Вчера од 14.00 до 24.00 часот санкционирани се и пет возачи на мотори за сторени прекршоци, а откриени се и 68 останати прекршоци за кои се издадени 46 мандатни и 22 прекршочни платни налози.

На излез од државта на граничниот премин Богордица,при царинска контрола на автомобил „Мерцедес“ со албански регистарски ознаки, управувано од албански државјанин, биле најдени 13 паковки со марихуана.

Тие биле облепени со селотејп и се наоѓале во левата и десната страна на багажниот простор во внатрешноста на носечките шини, од задниот браник до задните седишта споени со специјално направен бункер над резервоарот за гориво. Вкупната бруто тежина на паковките е околу 11 килограми.

Царинската управа до надлежното Основно јавно обвинителство ќе поднесе кривична пријава, заради постоење на основано сомнение за сторено кривично дело „Неовластено производство и пуштање во промет на наркотични дроги, психотропни супстанции и прекурсори“.

Педесетичетиригодишен скопјанец е тешко повреден во сообраќајна несреќа што се случила вчера на крстосницата од ул.„Аминта Трети“ со ул.„Орце Николов“ во Скопје. Несреќата се случила помеѓу автомобил „киа конкорд“, управувано од Ј.К.(33) од с.Студеничани, скопско, и автомобил „форд фокус“, управувано од В.Н.(54) од Скопје.

Во незгодата со тешки телесни повреди се здобил В.Н., кој бил пренесен во Градска општа болница „8-ми Септември“. Увид на местото на незгодата извршила екипа од СВР Скопје.