Шеесет и деветгодишен скопјанец починал додека се движел по улицата „Карпошово востание“,  во попладневните часови на 19. ноември.

Како што информираат од МВР, според пријавата, 69-годишникот се движел по улицата и во еден момент му се слошило и паднал, а случаен минувач повикал Итна медицинска помош, која само констатирала смрт без траги на насилство.

По наредба на Јавен обвинител, телото на починатиот било дадено на обдукција.

Во текот на изминатиот ден на подрачјето на Секторот за внатрешни работи Скопје се случиле седум сообраќајни незгоди, од кои две со телесни повреди и пет со материјална штета, соопштија од МВР.

Од полицијата додаваат дека во сообраќајните незгоди две лица добиле телесни повреди. Од преземените мерки и активности констатирано е дека 42 возачи управувале возила со брзина поголема од дозволената.

Од сообраќај се исклучени седум возачи, велат од МВР, и тоа еден возач затоа што управувал возило под дејство на алкохол и шест возачи затоа што управувале возила без да стекнат право за управување моторно возило. Исто така, исклучени од сообраќај се шест возила бидејќи биле нерегистрирани.

Санкционирани се пет возачи поради поминување крстосница на црвено светло, двајца возачи поради недавање првенство на минување пешаци, 10 поради неправилно престројување и еден возач поради неправилно престигнување.

Во однос на пешаците, санкционирани се тројца пешаци поради поминување коловоз надвор од пешачки премин и 12 пешаци затоа што поминале коловоз на црвено светло. Во текот на изминатиот ден издадени се 84 мандатни платни налози и 78 возила се подигнати со специјално возило „пајак“, се наведува во соопштението на полицијата.

Триесетгодишник од тетовското село Мала Речица добил тешки повреди кога во него удрил автомобил на тетовскиот булевар Маршал Тито, во попладневните часови на 19 ноември.

Како што информираат од МВР, автомобилот „сеат леон“, со скопски регистарски ознаки, кој удрил во 30-годишниот пешак, бил управуван од 28-годишник од селото Порој.

Пешакот добил тешки телесни повреди и со возило на итната медицинска помош бил пренесен во Клиничкатa болница во Тетово.

Увид на местото извршила екипа на СВР Тетово.