Полицијата денеска приведе четири лица осомничени за продажба на марихуана. Од МВР соопштија дека постојат докази дека се вмешани уште две лица, по кои се трага.

Според информациите на МВР, околу 11.45 часот на бул. Борис Трајковски во Скопје запрено е возило „џип“ со скопски регистерски таблички, управувано од В.М. (34) од Скопје, а како сопатник бил М.Г. (29) од Скопје и при извршениот преглед се пронајдени 3,5 килограми марихуана.

Од преземените дополнителни мерки и активности утврдено е дека организатор на нелегалната продажба е А.М. (27) од Дебар, кој заедно со Ф.П. (29) од Скопје договарале купопродажба на дрогата на паркинг на булеварот Кочо Рацин.

Во 12 часот во близина на Железничката станица во Скопје приведен е А.М. и при извршен преглед кај него пронајдени се 70.500 денари и 1.800 евра кои ги добил за продажбата на дрогата. Подоцна бил приведен и Ф.П..

Во истрагата се обезбедени докази за инволвираност во кривичното дело и за уште две лица: Р.А. (35) и П.Ѓ. (32).

По документирање на случајот ќе биде поднесена кривична пријава до Основното јавно обвинителство за гонење на организиран криминал и корупција.

Вчера, околу 8.30 часот, на локалниот пат Ново Село два – Боговиње, возило „фолксфаген поло“, со тетовски регистарски ознаки, управувано од Д. А. (39), изгубило контрола и излетало од коловозот. Во незгодата тешки телесни повреди добиле сопатниците М. А. (40) и малолетник, а возачот добил повреди. Тројцата биле пренесени во Клиничка болница Тетово за укажување лекарска помош. Увид на местото на настанот извршила екипа од Секторот за внатрешни работи Тетово, соопшти полицијата.

Полициски службеници од СВР Скопје вчера го приведоа Р. Р. (23) од Скопје, кого го барале со потерница од Основниот суд Скопје 1, за издржување затворска казна од три години за сторено кривично дело по чл. 236 од Кривичниот законик на Република Северна Македонија. Тој ќе биде спроведен во казнено-поправна установа, соопшти полицијата.