Седумдесетгодишен скопјанец го нарушил јавниот ред и мир на начин што со пиштол испукал неколку куршуми во воздух.

Според информациите од полицијата, пукањето се случило вчера на пладне од балкон во стан во Ѓорче Петров.

„Од лицето бил одземен пиштолот ‘М- 70’ калибар 9мм, две рамки за пиштолот, 12 куршуми калибар 9мм, футрола за рамка, ловечка пушка ‘црвена застава’ калибар 16/70мм, два патрона за ловечка пушка ‘белон 2,50 мм’, футрола за ловечка пушка и две дозволи за поседување и носење оружје на негово име“, велат од МВР.

По документирање на случајот ќе следува соодветен поднесок.

Сообраќајната полиција при СВР Битола, денеска, во периодот од 8 до 14 часот, спровела контрола за санкционирање возачи што управуваaт возило со брзина поголема од пропишаната.

Како што информираат од МВР, на територија на СВР Битола санкционирани биле 66 возачи. Од нив, 34 на територијата на Битола, 11 на територијата на Прилеп, 15 на територијата на Ресен.

Од Министерството порачуваат дека засилените сообраќајни контроли продолжуваат и во наредните денови.

Скопското Основно јавно обвинителство донесе наредба за спроведување истрага против 33-годишен скопјанец осомничен за кривично дело неовластено производство и пуштање во промет наркотични дроги.

Како што информираат од Обвинителството, постои основано сомнение дека 33-годишникот во станот во кој живеел и во станот на својот покоен дедо во Скопје недозволено одгледувал, преработувал и држел за продажба марихуана.

При претрес во домот на осомничениот на булеварот АСНОМ во Скопје биле пронајдени и одземени вкупно 71 стебло од растението канабис, повеќе пакувања со марихуана, гранки во процес на сушење, тегли и други пакувања со семки од марихуана.

Во втората илегална импровизирана лабораторија, пак, во стан на булеварот Партизански одреди, полициските службеници откриле уште 81 стебло од растението канабис, кои се одгледувале во специјално направени услови со инсталирано посебно осветление и температурни услови.

Во станот биле пронајдени и 12 помали саксии со насади, ламби, вентилатори, засилувачи и друга опрема за производство на марихуана.

Јавниот обвинител до судот доставил предлог за определување мерка притвор за осомничениот бидејќи постојат околности што укажуваат дека ваквата мерка е неопходна за непречено водење на постапката.​​