На полицискиот полигон во Пенуш, Штипско, вчера за време на боево гаѓање од припадници на Министерството за внатрешни работи, со повреди се здобил полициски службеник, на кого му била укажана лекарска помош во Клиничка болница Штип.

Се работи на расчистување на случајот.

СВР Куманово поднесе кривична пријава против 17-годишен кумановец поради постоење основи на сомнение дека сторил кривично дело производство и дистрибуција на детска порнографија.

Пријавениот, по прекината љубовна врска со 15-годишна малолетничка, креирал лажен профил на социјалната мрежа „Фејсбук“ и објавувал фотографии со компромитирачка содржина од малолетничката.

Надлежен јавен обвинител од Основното јавно обвинителство Скопје поднесе oбвинителен акт против едно лице за неовластено производство и пуштање во промет наркотични дроги, психотропни супстанции и прекурсори предвидено и казниво по член 215, став 1 од Кривичниот законик.

„На 9 октомври полициски службеници го забележале обвинетиот во близина на село Грачани како управува моторцикл без регистарски таблички и го запреле за да извршат легитимирање. Обвинетиот се дал во бегство, но бил совладан од полициските службеници. При извршениот личен претрес под тренирката му била пронајдена кеса со наркотична дрога марихуана со вкупна нето-маса од 1.010 грама. Обвинетиот 22-годишен скопјанец дрогата ја набавил и ја држел неовластено заради продажба. Со оглед на тоа што и натаму постојат околностите поради кои на обвинетиот му беше определена мерка притвор, јавниот обвинител до Основниот кривичен суд Скопје достави и предлог за продолжување на притворската мерка“, соопшти Обвинителството.