На четврти јуни во раните утрински часови на автопатот Велес  – Скопје, по пунктот „Македонијапат“, полициски службеници пронашле 25 илегални мигранти и три автомобили „ауди“, „фоклсваген“ и „мерцедес“, кој бил превртен.

Возилата со скопски регистарски ознаки претходно биле забележени кај Демир Капија, но не застанале на даден знак за запирање и продолжиле со движење кон Скопје.

Во разговор со полициските службеници мигрантите појасниле дека биле симнати од трите возила.

Увид на местото извршила екипа од СВР Велес и се преземаат мерки за расчистување на случајот.

Гостиварското основното јавно обвинителство донесе наредба за истрага против лице од селото Чегране поради сомнение за сторено кривично дело обид за убиство.

Како што информираат од обвинителеството, осомничениот 33-годишник, на 4 јуни на гостиварската улица „Илинденска“, во близина на бензинска пумпа, се обидел да убие свој соселанец.

По претходен меѓусебен договор да се најдат на наведеното место, двајцата почнале меѓусебна расправија, по што осомничениот извадил нож од џебот и му задал два удара на оштетениот, во пределот на рамото и во задниот дел на главата, нанесувајќи му тешки телесни повреди.

По настанот, осомничениот се упатил кон полициска станица, каде што сам се пријавил како сторител нa делото.

Поради сериозноста на повредите, оштетениот бил префрлен од Ургентниот центар во Гостивар во Клиничкиот центар во Скопје.

Со оглед на тоа што постојат околности кои упатуваат на опасност од бегство, можност за влијание врз сведоците, како и основан страв осомничениот да се обиде да го доврши кривичното дело, јавниот обвинител до судијата на претходна постапка доставил предлог за определување мерка притвор.​

Во попладневните часови на 4 јуни кај стариот градски „Зелен пазар“ во Виница, претходно паркирано товарно возило „застава“ без регистарски ознаки се придвижило и удрило во две лица.

Притоа, од здобиените повреди на местото починала 47-годишна струмичанка, додека едно машко лице било пренесено во Медицинскиот центар Кочани за укажување на лекарска помош.

Увид на местото извршиле Јавен обвинител и екипа од полициската станица Виница.