Црна хроника
Пакистанци криумчареле мигранти во Македонија

Полицијата до Обвинителството поднесе кривична пријава против М.А.(27) и А.Х.(20), двајцата од Пакистан, поради постоење основи на сомнение за сторено кривично дело криумчарење мигранти.
„Пред два дена по преземени мерки и активности на автопатот Куманово-Табановце, во напуштени објекти во село Горно Којнаре, Кумановско, полициски службеници од Одделот за сузбивање организиран и сериозен криминал пронашле 40 лица – мигранти од кои 21 лице од Индија, 15 од Сирија, две од Пакистан, и по едно лице од Мароко и Турција. Меѓу лицата три се малолетни. Исто така, при преземањето мерки било утврдено дека М.А. и А.Х., кои биле дел од групата, ја организирале групата и за финансиски надомест на лицата требало да им организираат илегален премин на македонско-грчката граница. Во текот на денот М.А и А.Х. ќе бидат изведени пред судија на претходна постапка, додека, останатите лица се сместени во Прифатен центар“, информираат од МВР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Тинејџер силувал малолетничка

Деветнаесетгодишно момче од селото Крупшек, Скопско е приведено за обљуба врз малолетничка од тетовско село.
„На 21.03.2023 во 18.45 часот во с.Радуша, скопско, полициски службеници од Полициското одделение Сарај го лишиле од слобода М.И.(19) од с.Крушопек, скопско, затоа што извршил обљуба врз малолетничка од тетовско село. Тој бил задржан во полициска станица“, велат од МВР.
По целосно документирање на случајот против него ќе биде поднесена соодветна пријава.
Црна хроника
Гостиварец изнајмил автомобил на 19 дена, па одлучил да не го враќа

Полицијата поднесе кривична пријава против маж од Гостиварско кој изнајмил автомобил во времетраење од 19 дена, а по истекот на рокот не го вратил возилото.
„Надворешната канцеларија за криминалистички работи Виница поднесе кривична пријава против Ј.Р. од село Врапчиште поради постоење основи на сомнение за кривично дело „затајување“. На 12.07.2022, пријавениот од правно лице од Виница изнајмил патничко возило „фолксваген“ во времетраење од 19 дена, а по истекот на договорениот рок не го вратил патничкото возило, со што му нанел штета на правното лице во износ од 361.500 денари“, соопшти МВР во дневниот билтен.
Црна хроника
Приведен малолетник, кој се заканувал на скопско средно училиште, полицијата открила како се праќани пораките

Денеска, Секторот за борба против тероризам, насилен екстремизам и радикализам при Одделот за сузбивање организиран и сериозен криминал до Основно јавно обвинителство за гонење организиран криминал и корупција поднесе кривична пријава против 15-годишник од Скопје за сторено кривично дело тероризам предвидено и казниво по член 394-б став 2 од Кривичниот законик.
Пријавениот малолетник на 24.2.2023, користејќи го својот мобилен телефон, креирал електронска адреса и истиот ден, користејќи го својот лаптоп од својот дом, испратил порака со заканувачка содржина на службената електронска адреса на едно средно училиште во Скопје за која, по извршените проверки, било утврдено дека е лажна. Притоа, со цел да ги прикрие своите активности при испраќање на поракaта, малолетникот користел VPN-апликација.
По преземени мерки и активности од страна на Секторот за компјутерски криминал и дигитална форензика, утврдена е користената ИП-адреса, чиј сопственик е таткото на малолетникот, а врз основа издадена наредба за претрес на домот од Основниот кривичен суд Скопје извршен е претрес во домот на родителот на малолетникот, од каде што привремено се одземени мобилен телефон, СИМ-картичка и лаптоп, што ги користело малолетното лице.
Од извршеното вештачење утврдено е дека истата електронска адреса е користена за да се испраќаат пораки со заканувачка содржина до неколку училишта на територијата на град Скопје од мобилен телефон и од лаптоп во повеќе наврати.
На 3.3.2023, во присуство на негов родител, инспектор за малолетници и семејно насилство од СВР Скопје и адвокат, во полициска станица е извршен службен разговор со малолетникот, во текот на кој тој го појаснил начинот на извршување на кривичното дело.